Tito 1 - Lagano Iphya

¹ Ni mimi Pʼaulo, muhendikazi wa Mulungu, na muhumwa wa Jeso Kʼirisito. Mimi nátsagulwa na nichihumwa ni Mulungu kwa niahende atʼue oatsagula yiye mwenye amukuluphire, na niafunze amanye ujeri ulongozao atʼu kumwabudu Mulungu, na kumogopha kwa njira ya haki.

² Ujeri uo unaahenda atʼu osi akuluphirao, alolere na kanuni kuupata uzima uphya wa kare na kare, urio Mulungu yetsʼigomba ulongo, wahulaga phokala urumwengu hata kʼaudzangwe kuumbwa.

³ Na ukati okala udziupanga uriphofika, achiungʼaza lwazu-lwazu kwenye nenore. Ndo mimi náhewa neno riro nirisumurire kutuwirizana na lagizo ra Mulungu, ariye ni Mutivyi wehu.

⁴ Ninakwandikira uwe Tito, mwanangu wa chiroho, hurio hosi hunamukuluphira Mulungu. Baba Mulungu na Kʼirisito Jeso Mutivyi wehu naakuhatsʼe, na akuhende usagale na reri yao.

Vilongozi a makanisa ahenzwavyo akale

⁵ Tito, uwe nákuricha chisiwa cha Kirete, kwa hata ugamarigize garatʼu maneno gokala kʼagadzangwe kusira, na wachize vilongozi a makanisa, kwenye chila kanisa ra mudzi, kutuwirizana na gaga malagizo gangu gokupʼa.

⁶ Mimi nákwamba, chilongozi wa kanisa unahenzwa akale ni mutʼu yetsʼi ila, mwenye muche mumwenga tu, anae anahenzwa akale ni ajeso, na akale anamanyikana kukala tsʼi ai, hebu otsʼi lau.

⁷ Chilongozi wa kanisa ni mwimirizi wa kazi ya Mulungu, na ndiyo maana, unahenzwa akale ni mutʼu yetsʼi ila. Unahenzwa atsʼikale mutʼu wa chimvute, wa kutsukirwa maruru, munwadzi, wa rabusha, hebu wa chipherephere na pʼesa.

⁸ Kurichisa hivyo, unahenzwa akale mutʼu wa karibu, ahenzaye maneno madzo, murumwengu, mutʼu aahenderaye anzie ga haki, mutakatifu, na ariye unaidima kuzuliya tʼamaaze na mahendoge.

⁹ Na chisha, ni seti aenderere kukuluphira jeri udzumbe wa kukuluphirika ofunzwa. Chilongozi wa kanisa achikala u vivyo, ndipho undaidima kwaaviza atʼu atuwe mafunzo ga jeri, na angʼaze makosa ga aratʼu aremao kutuwa gago mafunzo.

¹⁰ Mimi nidzamba vivyo mana, kuko Kirete kuna atʼu anji apingao kutuwa mafunzo ga jeri, atʼu aayazao atʼu anjine kwa kwafunza maneno gotsʼi ga tende, na alembi anji a atʼu ao, ni aratʼu ahenzao ajeso osi atuwe shariya za Ayahudi, na kamwe shariya ya kubitwʼatsʼi.

¹¹ Dza mutumia wa kanisa, unahenzwa achiamanya atʼu dza ao, aakomese kwakukala, anaabananga atʼu osi kwa kufunza maneno garigo kʼaahenzwa afunze. Ao anafunza maneno gago kulemba atʼu tu kwa apate pʼesa.

¹² Hata mumwenga wa atʼu ao yekala achisema chimbere maneno, waamba, “Akirete agomba ulongo tsʼiku zosi, anga dza nyama ai, alaphe na akaha!”

¹³ Ndo yiye wagomba ujeri, na kwa vivyo, achemere muno o a Akirete atuwao mafunzo ga ulongo, kwa hata akuluphire mafunzo ga jeri dzulu ya Jeso.

¹⁴ Ela naatsʼenderere kugwiririra nganu zotungwa ni alimu a Chiyahudi, na malagizo ga chidamu galaago kwa atʼu orema ujeri.

¹⁵ Chila chitʼu ni chidzo kwa atʼu ario myoyo yao ni midzo. Ela kʼakuna chiricho chidzo kwa atʼu ario tsʼi adzo, na otsʼikuluphira, kwakukala, akili zao na myoyo yao yabanangwa.

¹⁶ Atʼu dza ao nikudzidai akaamba anamumanya Mulungu, ela gago mahendo gao mai ahendago ganaonyesa kukala, kʼaamukubali Mulungu. Ao kʼaahenzwa ni atʼu, kʼaana lau, na gao ahendago bee ni mai maphuphu.