Mariko 1 - Lagano Iphya

Johana Mubatizi unamutsengera njira Bwana

¹ Nguma Mbidzo dzulu ya Jeso Kʼirisito, yiye Mwana wa Mulungu,

² yaanza dza vyoandikwa chitabuni mwa mugomvi wa Mulungu Isaya. Gago Maandiko ga Mulungu ganaamba vivi, “Sirikisa, ninahuma mudzumbe wangu akulongolere, akakutsengere njirayo.”

³ Manjine ganaamba, “Kuna mutʼu unagomba kwa laka ra dzulu kuko nyika unaamba, ‘Mutsengereni Bwana Mulungu njiraye, yiikeni tititi mikondoye!’ ”

⁴ Vivyo, ndivyo Johana Mubatizi arivyokudza. Yiye walairira nyika, achisumurira kukala, ni seti atʼu atye na abatizwe, kwa hata Mulungu aasamehe dambi zao.

⁵ Ndo atʼu kulaa jimbo rosi ra Judea, na hata Jerusalemu yosi, ákala achenda kwakwe, na kusema madambi gao gokala adzigahenda, naye achiabatiza phapho muho wa Jorodani.

⁶ Johana wakala uvala valo rofumwa na nyoga za ngamia, na wakala ufunga mukanda wa chʼingo mwakwe chununi. Leure rakala ni nzije na nyuchi.

⁷ Johana wasumurira achiamba, “Mutʼu mumwenga wa widimi muno kuriko mimi, undakudza nyuma zangu. Mimi tsʼiwirya hata kukala muhendikaziwe wa kuvumbama na kumuvula virahu.

⁸ Mimi ninamubatiza na madzi tu! Ela yiye undamubatiza na Roho wa Mulungu.”

Kubatizwa kwa Jeso

⁹ Ukati uo, Jeso walaa mudzi wa Nazareti kuko jimbo ra Galilaya, achidzabatizwa muho wa Jorodani ni Johana.

¹⁰ Ariphokala unalaa mumo madzini tu, waona mbingu zifunuka, na Roho wa Mulungu unamutsererera na umbo dza ra ngiya na achidzamudulama.

¹¹ Phapho, laka kulaa mulunguni richisikirika richamba, “Uwe u Mwanangu nikuhenzaye, na uwe mimi unanihamira.”

Jeso unajezwa ni Shetani

¹² Ndo phapho kare, Roho wa Mulungu achimulongoza Jeso kwenda nyika.

¹³ Kuko nyika, wakwendakala tsʼiku mirongo mine na nyama a weruni tu. Musindikizowe, achijezwa ni Shetani, na gariphosira gago, malaika achimuhikirahikira.

Jeso unaaiha atʼu ane okala ni avuwi

¹⁴ Johana ariphofungwa jela, Jeso wakwenda Galilaya, achendasumurira Nguma Mbidzo kulaa kwa Mulungu. Yiye waamba,

¹⁵ “Ukati ufika, na Ufalume wa Mulungu ufika phephi. Ndo atyani, na muyikuluphire Nguma Mbidzo!”

¹⁶ Jeso ariphokala unaenenda na kʼanda-kʼanda ya ziya ra Galilaya, waona Simoni na nduguye Andireya anavuwa mabeshe na chimia phapho ziyani.

¹⁷ Jeso achiaamba, “Nituwani, nami mwimwi nindamuhenda mukale avuwi a atʼu.”

¹⁸ Phapho kare Simoni na Andireya achiviricha vimia vyao, achimutuwa Jeso.

¹⁹ Ariphokwenda mbere vichache, waona anangwa a Zebedayo, Jakobo na nduguye Johana. Ao ákala a mashuwani mwao anafuma-fuma vimia vyao.

²⁰ Jeso achiaiha phapho kare, nao achimuricha abayao Zebedayo mumo mashuwani phamwenga na ahendikazie, ao achimutuwa Jeso.

Jeso unamulavya mutʼu pʼepʼo

²¹ Jeso na ao anafunzie achendaphenya mudzi wa Kaparinaumu, na yiriphofika tsʼiku ya Sabato, Jeso wakwendaphenya sinagogini achanza kufunza.

²² Atʼu ariphomusikira, áangalazwa ni mafunzoge, mana, yiye wafunza na widimi, ela kʼafunzire dza vyokala achifunza alimu a shariya.

²³ Ndo mutʼu mumwenga mumo sinagogini wakala una pʼepʼo,

²⁴ na achigomba kwa laka ra dzulu phapho kare achiamba, “Unaswini uwe Jeso muchina Nazareti? Vidze, udzikudzahuhangamiza? Ninakumanya uwe u ani. Uwe u Mutakatifu wa Mulungu!”

²⁵ Ela Jeso achimuchemera yiye pʼepʼo achiamba, “Nyamala! Mulae mutʼu yuyu!”

²⁶ Phapho yiye pʼepʼo achimutetemesa yiye mutʼu, achirira kʼululu, na achimulaa.

²⁷ Atʼu osi achangalala, achikala anauzana-uzana vivi, “Ni maneno gani gano asena? Mutʼu yuyu unafunza mafunzo maphya, na una widimi wa kwachemera pʼepʼo, na ao anamogopha!”

²⁸ Nguma za Jeso zichigotʼa maruru chila phatʼu kuko jimbo ra Galilaya.

Jeso unaaphoza atʼu anji

²⁹ Jeso aripholaa mumo sinagogini tu, wakwenda mwenga kwa mwenga phamwenga na ao ano Jakobo na Johana hata mudzini kwa ano Simoni na Andireya.

³⁰ Kuko, mutsedzangwa wa chiche wa Simoni, wakala yu chitʼandani una chiphuti, na Jeso ariphofika tu, achambirwa kare gago.

³¹ Ndo Jeso achendamulola yiye muchetʼu, na achimugwira mukono achimuunula. Chiratʼu chiphuti chichimuricha, naye achanza kwahikirahikira.

³² Dziloni dzuwa ririphotoka, atʼu ámuphirikira Jeso akongo osi, na atʼu okala ana mapepo, mana, Sabato yakala yisira.

³³ Mudzi uo wosi wakwendarundikana muhala wa nyumba yokala Jeso,

³⁴ na achiaphoza atʼu anji okala ana makongo aina-aina. Chisha, achilavya pʼepʼo atʼu anji, ela kʼaahenzezere ao pʼepʼo agombe rorosi, kwakukala, ákala anamumanya yiye ni ani.

Jeso unasumurira neno ra Mulungu jimbo ra Galilaya

³⁵ Kunadzachakwe na dani-dani, Jeso wauka, achenda phatʼu kʼanda hicheye photsʼi atʼu, achendavoya.

³⁶ Chidzako, Simoni na anzie achendamutsakula,

³⁷ na ariphomona, ámwamba, “Chila mutʼu unakutsakula.”

³⁸ Jeso achiaudzidza achiaamba, “Mimi nárehewa ni kusumurira neno ra Mulungu. Kwa vivyo, hindeni midzi minjine yiriyo phephi na phapha, nikasumurire nako.”

³⁹ Ndo achenda chila phatʼu kuko Galilaya, achiasumurira atʼu neno ra Mulungu mumo mwao masinagogini, na achialavya pʼepʼo.

Jeso unamuphoza mutʼu wa mahana

⁴⁰ Mutʼu mumwenga wa mahana wakwenda kwa Jeso, achimitʼa mavindi na achimuvoya achimwamba, “Bwana, nitakasa. Ninamanya unaidima kunitakasa uchihenza!”

⁴¹ Jeso achimonera mbazi, na achigolosa mukonowe achimukumba, na achimwamba, “Ninahenza, takasika!”

⁴² Mahana gachimuricha phapho kare, na mutʼu yiye achikala utakaswa.

⁴³ Jeso achimwamba auke maruru, na achimukanya achimwamba,

⁴⁴ “Utsʼimwambire mutʼu yeyosi gaga godzikuhendera. Ela enda ukadzonyese kwa kuhani tu uwe, na ukalavye sadaka dza vihenzwavyo ni Shariya ya Musa, na yiyo yindaamanyisa atʼu kukala, udzitakaswa.”

⁴⁵ Ela yiye mutʼu aripholaa phapho, wakwendaambira chila mutʼu yemona, kukala, uphozwa ni Jeso. Na nguma za Jeso zichigotʼa chila phatʼu. Gago gachimuhenda Jeso atsʼiphenye mudzi wowosi chingʼangʼa. Yiye wakala konze ya midzi kutʼu kotsʼi atʼu, ela atʼu kulaa chila upande, achimutuwa kuko vivyo.