Filemoni 1 - Lagano Iphya

¹ Ni mimi Pʼaulo na ndugu yehu wa chijeso Tʼimoti. Mimi vivi ni jela kwa dzulu ya Jeso Kʼirisito. Ninakwandikira baruwa uwe Filemoni muhendikazi wa Bwana munziwehu hukuhenzaye.

² Nilamusira akuluphiri avoyao kwako nyumbani, kamwe ndugu yehu wa chijeso wa chiche Afiya, na Arikipo shikari wa Bwana munziwehu.

³ Abayehu Mulungu na Bwana Jeso Kʼirisito naamuhatsʼe, na amuhende musagale na reri yao.

Menzwa na kuluphiro ra Filemoni

⁴ Filemoni mwenehu wa chijeso, mimi chila nichikuvoyera, ninamulavira mumvera Mulungu wangu,

⁵ kwakukala, ninasikira uwe unaahenza atʼu a Mulungu anzio osi, na unamukuluphira Bwana Jeso jeri.

⁶ Rangu nendereraro kurivoyera ni kwamba, washuhudiye anzio chicho chako ukuluphiracho, na vivyo vindakuhenda ugamanye chividzo gago manoso gosi arigo Mulungu unaapʼa atʼu kuchirira Jeso Kʼirisito.

⁷ Mwenehu wa chijeso, mimi niriphosikira kukala unaahenza akuluphiri anzio osi, na kwahenda ahamirwe, vivyo vyanihamira muno hata vichinitiya moyo mimi nami.

Voyo dzulu ya mugulwa muhumiki Onesimo

⁸ Filemoni, mimi dza muhumwa wa Jeso Kʼirisito, nina haki ya kukulagiza uhende gago uhenzwago uhende,

⁹ ela mino ninahendakuvoya kwakukala, hunahenzana. Ndo mimi mutumia Pʼaulo, niriye hata vivi ni jela kwa dzulu ya Jeso Kʼirisito,

¹⁰ nina voyo dzulu ya mugulwao Onesimo, ariye vivi ni mwanangu wa chiroho. Yiye hwaonana kuku jela, na nichimushuhudiyira dzulu ya Bwana hata achimukuluphira.

¹¹ Kuko hulaako, yiye wakala kʼakwaviza na chochosi, ela vivi unaniaviza muno mimi, na hata uwe nawe undakwaviza vivyo.

¹² Yiye vivi ninamuudza kwako, ela unauka na roho rangu.

¹³ Mimi vivi ni jela kwakukala, nákala ninasumurira Nguma Mbidzo, na ningehenza muno akale kuku kwa hata ahwale nafasiyo na anavize.

¹⁴ Ela hata vivyo, tsʼenzi kukugaramisha uniavize kwa kumwika yiye phapha photsʼi kuvoya uwe. Mino ninahenza uwe uniavize kwa henzoro mwenye.

¹⁵ Nikwenda akakala mugulwao Onesimo wahendwa ni Mulungu akutoroke tsʼiku chʼachʼe, kwa yiyo yikale njiraye ya kumukuluphira Jeso, na adze asagale nawe hata kare na kare.

¹⁶ Yiye vivi una tende muno kuchira mugulwa, kwakukala, ni ndugu yehu wa chijeso humuhenzaye. Mimi ninamuhenza muno, na uwe undamuhenza muno yenye kwakukala, ni mugulwao, na ni nduguyo wa chijeso.

¹⁷ Ndo uwe Filemoni, uchikala unanona mimi ni muhendikazi wa Bwana munzio jeri, muphokere Onesimo dza vivyo urivyo ungari kuniphokera mimi.

¹⁸ Achikala Onesimo wakukosa, hebu unamwisa chochosi, gago niisa mimi.

¹⁹ Na maneno gaga ninagaandika na mukono wangu mwenye mimi Pʼaulo kukala, “Chochosi umwisacho Onesimo, nindakuripha mimi,” na gago ga kukala hata mimi ninakwisa kwa uo uzimao wa chiroho, tsʼindagahadza.

²⁰ Ndo ninakuvoya mwenehu wa chijeso kukala, unihendere gago kwa dzina ra Bwana, na phapho bee unihende nihamirwe muno mimi nduguyo wa chijeso.

²¹ Mimi yiyi baruwa ninayandika na kanuni kukala, undagahenda gago godzikuvoya, na hata ninamanya kukala, undahenda manji genye.

²² Na chisha, niikira chumba chondakudzasagala mimi, kwakukala, ninakuluphira kukala, Mulungu undagasikira gago mavoyo genu mosi hata aniidimise kudza kwenu.

Mwajo wa kusindikiza

²³ Epafura ariye hu jela hosi kwa dzulu ya Jeso Kʼirisito unakulamusa.

²⁴ Mariko, Arisitako, Dema na Luka ario ni ahendikazi a Bwana asena, anakulamusa vivyo nao.

²⁵ Bwana Jeso Kʼirisito naenderere kuhatsʼa roho zenu.