Aefeso 1 - Lagano Iphya

¹ Ni mimi Pʼaulo, muhumwa wa Jeso Kʼirisito yeolohewa ni Mulungu. Ninamwandikira mwimwi ajeso a Efeso, murio mu anafunzi a Jeso Kʼirisito a kukuluphirika.

² Abayehu Mulungu na Bwana Jeso Kʼirisito naamuhatsʼe, na amuhende musagale na reri yao.

Manoso gosi ga chiroho garehewa ni Jeso Kʼirisito

³ Naalikwe Mulungu Abaye Bwana wehu Jeso Kʼirisito! Maana, wahwajaliya manoso gosi ga chiroho galaago dzulu, kuchirira Kʼirisito,

⁴ na hata chisha, Mulungu wahutsagula hangu phokala kʼadzangwe kuwumba hata uo urumwengu, hukale atʼue kwa njira ya kumukuluphira Jeso Kʼirisito kwa hata hukale atakatifu, na otsʼina ila yoyosi mbereze. Gago gosi wahuhendera, kwakukala, unahuhenza.

⁵ Chisha, Mulungu waamula hangu pho pʼindi kuhuhenda hukale anae, na Jeso Kʼirisito achidzagachimiza gago. Gago ndigokala Mulungu unagahenza, na ganamuhamira.

⁶ Ndo nahumulikeni Mulungu kwa vyohwonyesa unahuhenza muno kuchirira Mwanawe amuhenzaye.

⁷ Mulungu wahwika tsare kuchirira milatso ya Mwanawe, yaani, wahusamehe madambi gehu, na gago ganaonyesa kukala, Mulungu unahuhenza jeri.

⁸ Mulungu wahwonyesa unaswi mbazi, na achihupʼa hekima yosi na kumanya.

⁹ Yiye wahufunulira garatʼu gokala kʼakuna agamanyaye. Gago ndigokala Mulungu udzamula kugahenda kuchirira Jeso Kʼirisito.

¹⁰ Maneno goamulwa kuhendwa ni Mulungu, garigo undagamala tsʼikuye yichifika, ni kuvireha phamwenga vyumbe vyosini vya mbinguni na vya duniani vitawalwe ni Jeso Kʼirisito.

¹¹ Maneno gosi gahendwa kutuwiriza Mulungu aojavyo, na aamulavyo. Siswi Mulungu wahutsagula hukale atʼue kuchirira kumukuluphira Jeso Kʼirisito, na gago waamula kugahenda hangu pho pʼindi, mana, ndigokala unagahenza.

¹² Ndo siswi oanza kumukuluphira Jeso Kʼirisito, hunahenzwa humulike Mulungu kwa ubomuwe.

¹³ Mwimwi namwi vivi mwausikira uo udzumbe wa jeri, yaani Nguma Mbidzo yimuhendayo mutiye. Na muriphomukuluphira Kʼirisito, Mulungu wamupiga mola wa konyesa mu atʼue kuchirira kumupʼa Rohowe yekala ulaga.

¹⁴ Mulungu wahupʼa yiye Rohowe dza muzamana kukala, undahupʼa gosi golaga atʼue, na neno riro rinahuhenda hukale na kanuni kukala, Mulungu undaakombola osi ario ni akwe. Nahumulikeni Mulungu kwa ubomuwe!

Ajeso a Efeso niamanye ubomu wa Kʼirisito

^15-16 Enehu a chijeso, mimi ninamulavira mumvera Mulungu ukati wosi kwa gomuhendera mwimwi. Gago nágaanza kulaira niriphosikira munamukuluphira Bwana Jeso, na munaahenza ajeso anzienu osi. Ndo mimi chila nivoyapho, ninamuvoyera hata mwimwi

¹⁷ kukala, Mulungu wa Bwana wehu Jeso Kʼirisito, ariye ndiye Abayehu wa widimi unji, amupʼe Rohowe. Yiye Rohowe ndiye yendamufunulira mumanye maneno ga chiroho, na ujeri dzulu ya Mulungu, kwa hata mumumanye jeri.

¹⁸ Ninamuvoyera mwidimiswe kumanya ujeriwe, na phapho mugamanye gago maneno madzo arigo wamwiha kwa mugalolere, na chisha phapho ndipho mundamanya ubomu wa manoso golaga kwapʼa atʼue.

¹⁹ Na mumanye kukala, uo widimi wa Mulungu uhendao kazi mwehu ndani siswi hukuluphirao, bee ni unji muno yenye. Widimi uu uhwavizao siswi ajeso, bee unga dza uo urio

²⁰ Mulungu wauhumira kumufufulira Jeso Kʼirisito kulaa kuzimu, na achimuzagaza mukonowe wa kulume ko mulunguni atawale.

²¹ Ndo Jeso Kʼirisito kuko dzulu unatawala na widimi unji muno kuchira chila mutawali, mwenye widimi, mwenye cheo, chila chilongozi, na chila chitʼu kwenye urumwengu uu, na hata uo udzao.

²² Mulungu waika vitʼu vyosi tsʼini za utawala wa Jeso, na achimulavya yiye mutawali wa vyosi, akale chitswa cha kanisa.

²³ Na riro kanisa ririro ni mwiriwe, richimizwa ni Kʼirisito ariye ndiye achimizaye chila chitʼu, chila phatʼu.