2 Tʼimoti 1 - Lagano Iphya

¹ Ni mimi Pʼaulo, muhumwa wa Jeso Kʼirisito kwa henzo ra Mulungu, na náolohewa kwa hata niaambire atʼu uzima uphya wa kare na kare oulagwa, hurio hunao kwa kumukuluphira Jeso.

² Ninakwandikira uwe Tʼimoti mwanangu wa chiroho nikuhenzaye. Baba Mulungu na Bwana wehu Kʼirisito Jeso naakuhatsʼe, akonere mbazi, na akuhende usagale na reri yao.

Tʼimoti unatiywa moyo akaze kukuluphirika

³ Tʼimoti, mimi ninamulavira mumvera Mulungu kwa dzuluyo. Yiye Mulungu ninamuhikirahikira na maazo ga kukala, ninatuwa madzo dza akare ehu arivyokala. Mimi chila nichivoya usiku na mutsana, ninakukumbikira ukati wosi.

⁴ Mimi nichililikana vyoniririra ukati phokala hunarichana, ninatamani muno nikone kahiri, na nindahamirwa muno nichikona.

⁵ Mino nicheri kukumbikira vivyo urivyo na kuluphiro ra jeri, na kuluphiro dza riro, raanza kukala na aweyo Loisi, na ameyo Eunike naye, na nina kanuni kukala, hata uwe nawe unaro.

⁶ Gago ndigo gatumago hata ninakukumbikiza uchitsʼotsʼere chicho chipaji urichohewa ni Mulungu ukati niriphokwikira mikono kukuvoyera. Ndo mino ninakuhenza uchihumire chipaji chicho.

⁷ Maana, Mulungu wahupʼa Roho ahupʼaye widimi, ahuhendaye huhenzaneni, na ahuhendaye hudzidinise kwa hata hutsʼihende dambi, ela kʼahupʼire Roho wa kuhuhenda hukale aoga.

⁸ Ndo utsʼone haya kulavya ushuda dzulu ya Bwana wehu, hebu kwakukala, mimi ni jela kwa dzuluye. Itsʼiphokala, uwe nawe kubali kushononeswa kwa dzulu ya Nguma Mbidzo dza mimi kwa widimi wa kuvumirira uhewao ni Mulungu.

⁹ Mulungu wahutivya, na achihwiha hukale atʼue atakatifu. Gago kʼagahendere kwakukala, phanjine hwakala hudzihenda utʼu wowosi, ela ni kutuwirizana na lengore mwenye, na kwa vyopanga kuhwonera mbazi kuchirira Kʼirisito Jeso, phapho mwanzo phokala urumwengu kʼaudzangwe kuumbwa.

¹⁰ Ndo mbazi zizo vivi zangʼazwa lwazu-lwazu kwa kudzakwe Mutivyi wehu Kʼirisito Jeso. Yiye wahangamiza chifo, na achireha uzima na kutsʼahangamika kuchirira yo Nguma Mbidzo.

¹¹ Ndo mimi Mulungu wanoloha nikale musumuriri, muhumwa wa Jeso, na mwalimu wa yiyo Nguma Mbidzo.

¹² Na gago ndigo gatumago hata ninapatwa ni shenene zizi, ela mino hata tsʼinago haya, mana, ninamumanya yiye nimukuluphiraye, na nina kanuni unaidima kurindatʼo uratʼu niriomupʼa hata tsʼiku ya musindikizo wa urumwengu.

¹³ Gago mafunzo ga jeri nirigokufunza, nagakale mufano kwako kwakukala na kuluphiro na menzwa, maneno garehewago ni Kʼirisito Jeso.

¹⁴ Gamanyirire kwa widimi wa Roho wa Mulungu asagalaye mwehu ndani gago mafunzo ga jeri urigohewa ugasumurire.

¹⁵ Tʼimoti, unamanya uwe kukala, ajeso anziehu anji a jimbo ra Asiya ánitsupha, hata Fugelo na Herimogene nao.

¹⁶ Ela Bwana naahatsʼe adamungwa a Onesiforo, mana, yiye udzinitiya moyo kʼano nyinji. Yiye kʼanonerere waibu hata niripho ni chifungoni,

¹⁷ hata yiye ariphokudza mudzi ubomu wa Rumi tu, waanza kunitsakula muno hata achinona.

¹⁸ Bwana naamuhatsʼe muno tsʼiku yiyo ya musindikizo wa urumwengu! Hata uwe unamanya chividzo viratʼu Onesiforo arivyonihikirahikira kwa njira nyinji ko Efeso.