1 Tʼimoti 1 - Lagano Iphya

¹ Ni mimi Pʼaulo muhumwa wa Jeso Kʼirisito. Mimi ni muhumwa wa Jeso kutuwirizana na lagizo ra Mulungu Mutivyi wehu, na ra Kʼirisito Jeso, ariye ndiye humuloleraye adze ahupʼe manoso gosi.

² Ninakwandikira uwe Tʼimoti mwanangu mwenye wa chiroho. Baba Mulungu na Bwana wehu Jeso Kʼirisito naakuhatsʼe, akonere mbazi, na akuhende usagale na reri yao.

Tʼimoti unalagizwa amanyirire mafunzo ga jeri

³ Tʼimoti, nicheri kukuhenza ukale kuko mudzi ubomu wa Efeso dza nirivyokwamba niriphokala ninenda jimbo ra Makedonia. Kuko, kuna atʼu anjine afunzao mafunzo ga ulongo. Ndo ninakuhenza wenderere kukala kuko, kwa hata wakomese atʼu ao.

⁴ Ao aambire ariche kubananga ukati wao kwa kwambirana nganu za ulongo, na kutarirana-tarirana maneno gotsʼisika gokala gachihendwa ni akare ao. Maana, maneno gago gandaahenda ahenderane kʼani tu, ela kʼagandaaviza kuhenda kazi ya Mulungu, yiriyo yihendwa kwa kuluphiro.

⁵ Lengo ra kukwandikira lagizo riri uwe Tʼimoti, bee ni waambire ajeso a kuko kukala, ahenzane. Na atʼu kuhenzana, bee ni akale ana myoyo midzo, ana maazo ga kukala anatuwa madzo, na akale ana kuluphiro jeri.

⁶ Atʼu anjine kʼaagahendere gago, na phapho achiyaywa ni kutuwa njira ya jeri, na achiphenyerera kugomba maneno gotsʼi ganjira.

⁷ Atʼu ao anahenza akale alimu a Shariya ya Mulungu, ela hata ao enye kʼaagamanya gago agagombago, hebu gago agaelezago na nguvu.

⁸ Hunamanya kukala, Shariya ni mbidzo, ela ni mbidzo tu chikala mutʼu undayihumira chivyopanga Mulungu.

⁹ Ndo hunamanya kukala, Mulungu kʼaikire Shariya kwa dzulu ya atʼu ahendao ga haki, ela, wayiika kwa aratʼu ayivunzao, na aratʼu aremao kuyituwa. Yaani, wayiika kwa otsʼimogopha na adambi, kwa atʼu ario tsʼio atakatifu na otsʼijali Mulungu, kwa aapigao abazao na amezao, kwa aulagi,

¹⁰ kwa adiya, ahendanao ache chinyume na vyopangwa ni Mulungu, achuzi a agulwa ahumiki, atʼu alembao, atʼu alavyao ushaidi wa ulongo, na atʼu ahendao chochosi chinjine chiricho chichinyume cha garatʼu mafunzo ga Mulungu ga jeri.

¹¹ Mafunzo ga jeri ni garatʼu garigo kwenye Nguma Mbidzo yenye widimi ya Mulungu alikwaye, yiriyo mimi nátsagulwa niyisumurire.

Mumvera wa Pʼaulo kwa konerwa mbazi muno

¹² Ninamulavira mumvera Bwana wehu Kʼirisito Jeso, ariye ndiye waniidimisa kuhenda yiyi kaziye. Nina mumvera kukala, wanona ninakuluphirika kwa kunoloha nimuhikirehikire.

¹³ Mimi hata niripho phapho pʼindi námukufuru yiye, náahendera mauku ajeso, na nárihakana riro dzinare, ela náonerwa mbazi, kwakukala, nákala tsʼikuluphira, na kwa vivyo, nákala tsʼimanya nihendaro.

¹⁴ Yiye Bwana wehu wanonera mbazi muno yenye, na achinipʼa kuluphiro bomu na menzwa kamare yilaayo kwa Kʼirisito Jeso.

¹⁵ Musemo uu wambao, Kʼirisito Jeso wakudza duniani kudzativya adambi, bee ni wa jeri, na unawirya kukubaliwa kamare. Na mimi Pʼaulo, bee ndimi mubomu wa adambi,

¹⁶ ela náonerwa mbazi vivyo mimi mubomu wa adambi kwa Jeso Kʼirisito aonyese kukala, unaavumirira muno hata adambi abomu. Na gago Wagahenda, kwa hata anjine nao amanye anaidima kukuluphira, na akapata uzima uphya wa kare na kare.

¹⁷ Mulungu naakale na widimi, na alikwe hata kare na kare. Yiye ndiye Mufalume ariyeko hata kare na kare, yetsʼifa, yetsʼioneka, na ndiye Mulungu wa jeri tu hicheye. Amina.

¹⁸ Mwanangu wa chiroho Tʼimoti, ninakwandikira malagizo gaga kutuwirizana na maneno ga ugomvi wa chimulungu gogombwa pʼindi dzuluyo. Gaga ninagahenda kwa hata widime kugatuwa chividzo gago maneno, na phapho widime kupiga kʼondo mbidzo ya kumuhehera Bwana.

¹⁹ Uwe henda vivyo kwa kwenderera kugwiririra kinyi kuluphiroro, na uhende maazo ga kukala unatuwa madzo. Atʼu anjine kʼaarituwire riro, na phapho achihangamiza kuluphiro rao.

²⁰ Kati yao ni Humenayo na Alekizanda, ario náarichira Shetani afunzwe kukala, kumukufuru Mulungu tsʼiko kudzo.