Eksotʋs 37 - Chahta Holisso Holitopa 1886

¹ Mihma Besaleel ʋt shittim iti yo̱ itombi holitopa ikbi tok; falaia kʋt kubit tuklo cha iklʋnakma, auata kʋt kubit achʋfa cha iklʋnakma, chaha kʋt kubit achʋfa cha iklʋna aiena tok.

² Micha tʋli holisso lakna bano ho̱ anu̱kaka, micha kohcha aiena lapalichi tok, micha tʋli holisso lakna i̱ fullota ikbit apakfobli tok.

³ Micha chukbi ushta ka̱ takohlicha chi̱ hosh chʋnaha tʋli holisso lakna ushta ho̱ bilelit akmochi tok; in tʋnnʋp achʋfa ka̱ chʋnaha tuklokma, in tʋnnʋp achʋfa ka̱ chʋnaha tuklo tok.

⁴ Mihmʋt shittim iti yo̱ tʋbi ikbi cha, tʋli holisso lakna lapalichi tok.

⁵ Micha tʋbi yash itombi holitopa naksika chʋnaha takohli kash isht sholachi̱ ho̱ shamohli tok.

⁶ Micha ai i̱ kana aiombinili ya̱ tʋli holisso lakna bano ho̱ ikbi tok; falaia kʋt kubit tuklo cha iklʋnakmʋt, auata kʋt kubit achʋfa iklʋna aiena tok.

⁷ Micha ai i̱ kana aiombinili ont ʋhli tuklo ka̱, Chelubim tuklo tʋli holisso lakna yo̱ ikbi tok; mih achʋfa ho̱ bolit ikbi tok;

⁸ Chelub achʋfa kʋt ont ʋhli ilʋppa o̱ hikiakma, chelub achʋfa kʋt ont ʋhli in tʋnnʋp yʋmma̱ o̱ hikia tok; ai i̱ kana aiombinili aiachʋfa ho̱ ont ʋhli tuklo ka̱ chilubim ikbi tok.

⁹ Mihma Chelubim ʋt sanahchi ya̱ ashatʋblit ʋba weli cha ai i̱kana aiombinili ya̱ sanahchi isht ompohomo hosh nashuka iti̱ sanalit hieli tok, Chelubim nashuka yʋt ai i̱ kana aiombinili pilla pit taloha tok.

¹⁰ Mikma shittim iti yo̱ aiimpa ikbi tok, falaia kʋt kubit tuklokma, auata kʋt kubit achʋfakma, chaha kʋt kubit achʋfa cha iklʋna tok.

¹¹ Micha tʋli holisso lakna bano ho̱ lapalichi cha, tʋli holisso lakna apakfoyupa im ikbi tok.

¹² Micha i̱ fullota ya̱ ibbak pʋtha achʋfa ho̱ im ikbit apakfobli tok; micha i̱ fullota yash tʋli holisso lakna yo̱ apakfoyupa ikbi tok.

¹³ Mihmʋt tʋli holisso lakna yo̱ chʋnaha ushta ho̱ bilelit akmochi cha, chʋnaha yash iyi ushta chukbi ushta takohlichi tok.

¹⁴ I̱ fullota yo̱ bili̱ka ak o̱ tʋbi ʋt shamohli hosh sholachi̱ ho̱ chʋnaha hʋt takohli tok.

¹⁵ Micha aiimpa ishit sholachi̱ tʋbi ya̱ shittim iti yo̱ ikbi cha, tʋli holisso lakna ya̱ lapalichi tok.

¹⁶ Micha nan aiʋlhto, aiimpa paknaka aiasha, im ampo patʋssa, micha im ishtimpa, micha im ampo ompoholmo isht ompoholmo aiena ka̱ tʋli holisso lakna bano ho̱ ikbi tok.

¹⁷ Micha pʋla aio̱hika ya̱ tʋli holisso lakna bano ho̱ ikbi tok; boʋt toba ho̱ pʋla aio̱hikia ikbi, im ʋpi micha i̱ naksish filamohli, im ampo, micha i̱ bikbina, micha i̱ pakanli ʋt mih makinli tok.

¹⁸ Yohmi ka̱ naksish ʋt hannali kʋt tʋhlala̱ka akohcha tok; pʋla aio̱hikia ya̱ naksish tuchina hosh in tʋnnʋp a̱ akohcha ma, pʋla aio̱hikia ya̱ naksish tuchina hosh akohcha tok.

¹⁹ Naksish achʋfa ka̱ almont holbʋt toba hosh, ampo tuchinakmʋt lumbo achʋfa, micha napakanli achʋfa; mikma naksish achʋfa ka̱, ampo tuchinakmʋt, almont holbʋt toba hosh, lumbo achʋfa, micha napakanli achʋfa tok; yohmi kʋt pʋla aio̱hikia ya̱ naksish ʋt akohchʋt ia hannali kʋt hlopulli tok.

²⁰ Mihma pʋla aio̱hikia ya̱ ampo ushta, almont holbʋt toba, micha in luboa, micha i̱ napakanli aiena kʋt a̱sha tok.

²¹ Yohmi ka̱ yʋmmak ash inli naksish tuklo, nuta ya̱ lumbo achʋfa, yʋmmak ash inli naksish tuklo nuta ya̱ lumbo achʋfa, yʋmmak ash inli naksish tuklo nuta ya̱ lumbo achʋfa, naksish hannali kohchʋt ia ka̱ ʋlhpi̱sa tok;

²² In lumbo, micha i̱ filamohlichi ʋt ai achʋfa hatok; moma kʋt tʋli holisso lakna achʋfa bano hosh boʋt toba hatok.

²³ Micha i̱ bila aiʋlhto untuklo ka̱, micha pʋla im isht tʋptohli, micha pʋla tʋptoha im aiʋlhto aiena tʋli holisso lakna bano ho̱ isht ikbi tok.

²⁴ Tʋli holisso lakna bano weki talent achʋfa ho̱ ikbi tok; micha im ai ʋlhto moma ka̱ ikbi tok.

²⁵ Nabalama ahukmi alta ya̱ shittim iti yo̱ ikbi tok; falaia kʋt kubit achʋfakma, auata kʋt kubit achʋfa tok, apatʋssa ushta hatok; micha chaha kʋt kubit tuklo hatok, in lʋpish ʋt yʋmmak inli hatok.

²⁶ Micha paknaka ya̱, micha apatʋssa apakfoyupa, micha lapish aiena ka̱ tʋli holisso lakna bano ho̱ lapalichi tok; micha tʋli holisso lakna yo̱ i̱ fullota apakfoyublit ikbi tok.

²⁷ Micha i̱ fullota nutaka ya̱ iti tʋpa ashamohli na, shohlachi̱ ka̱ tʋli holisso lakna chʋnaha tuklo ho iti chablit ont achukbi tuklo ka̱ takohlichi tok.

²⁸ Micha iti tʋpa ya̱ shittim iti yo̱ ikbi cha, tʋli holisso lakna lapalichi tok.

²⁹ Micha ishtahama bila holitopa, micha nabalama shobulli a̱hli ho̱ nabalama yo̱, ikhi̱sh atahli mak o̱ ikbi tok.