Eksotʋs 36 - Chahta Holisso Holitopa 1886

¹ Yohmi ma Besaleel, micha Aholiab, micha hatak chu̱kʋsh hopoyuksa puta kʋt natoksʋli ilaiyukali moma ʋlhtipo ya̱ isht atoksʋli ya chi̱ ho̱ Chihowah yʋt apesa tuk moma ka̱ yʋmihcha chi̱ ho, Chihowah yʋt hopoyuksa, micha nanithanʋt toksʋli imponna nukfohki tuk ʋt ikbi tok.

² Mihma Moses ʋt Besaleel, micha Aholiab, micha hatak chu̱kʋsh hopoyuksa aiyukali Chihowah yʋt chu̱kʋsh a̱ hopoyuksa nukfohki tuk, ʋlʋt natoksʋli ya̱ yʋmihcha chi ho̱ chu̱kʋsh ʋt a ayimmitʋchi tuk puta ka̱ hoyo tok.

³ Mihma ʋlhtipo ya̱ isht a toksʋli toba chi̱ ka̱ ishit toba ya̱ Islael im ʋlla ʋhleha hʋt im issʋt isht ʋla tuk moma ka̱ Moses a̱ im ai ishi tok, micha onnahinli moma ma chu̱kʋsh aiokpanchi hosh nana im issa ya̱ isht im ahanla tok.

⁴ Mihma hatak hopoyuksa moma ʋlhtipo ya̱ natoksʋli puta aiasha ka̱ toksʋli tuk ʋt nan ikbit toksʋli tuk ʋt issʋt ia tok.

⁵ Micha Moses a̱ okla im anumpulit, Okla hʋt natoksʋli toba ka̱ Chihowah yʋt apesa tuk a̱ atampa fehna ho̱ ishtʋlʋshke, achi tok.

⁶ Mihma Moses ʋt apesa na, okla anolit binah ha̱ hlopullichit, Hatak nana kia, micha ohoyo nana kia, ʋlhtipo toba chi̱ ka̱ natoksʋli ikbit iklo kashke, achi tok. Yohmit okla ha̱ im alʋmmi na, ishit iklo tok.

⁷ Nana im asha kʋt natoksʋli moma ishit toba ha̱ ʋlhpesa ka̱ ona, micha atampa fehna hoka.

⁸ Mihma hatak hopoyuksa aiyukali takla a̱sha tuk ʋt ʋlhtipo natoksʋli a̱ ikbi kʋt, nan tʋnna ʋba takali pokoli hosh linen tapʋski pʋna okchamali, micha hummaii, micha tishepa aiena ka̱ ikbi tok, natoksʋli inla Chelubim puta ka̱ ikbi tok.

⁹ Takali achʋfa kʋt falaia kʋt kubit pokoli tuklo akucha untuchinakma, takali achʋfakmʋt auata kʋt kubit ushta tok; ʋbatakali moma kʋt ʋlhpisa kʋt iti laui ha tok.

¹⁰ Takali tahlapi ka̱ itachakli tok; micha takali inla tahlapi ka̱ itachakli tok.

¹¹ Micha takali achʋfa ʋhli ai itʋchakʋchi ʋhli ya̱ ahlopulli okchamali ya̱ ikbi tok; micha takali achʋfa ont ʋhli fehna atukla itachakʋchi a̱ ai ikbi ak inli tok.

¹² Takali achʋfa ka̱ ahlopulli pokoli tahlapi ho̱ ikbi tok, micha atukla ai itachakʋchi takali ʋhli ha̱ ahlopulli pokoli tahlapi ho̱ ikbi tok; ahlopulli ʋt ita halʋlli tok.

¹³ Micha tʋli holisso lakna isht a kamʋssa pokoli tahlapi ho̱ ikbi tok, micha isht a kamʋssa ya̱ takali ya̱ ishit itachakli tok. Yohmi ho̱ ʋlhtipo achʋfa toba tok.

¹⁴ Micha issi kosoma hishi yo̱ takali ya̱ ʋlhtipo ya̱ im ikbi na, ʋlhtipo ya̱ ompoholmo tok; takali auahachʋfa ho̱ ikbi tok.

¹⁵ Takali achʋfa kʋt falaia kʋt kubit pokoli tuchinakmʋt, takali achʋfa kʋt auata kʋt kubit ushta tok; takali auahachʋfa kʋt ʋlhpisa kʋt iti laui tok.

¹⁶ Takali tahlapi ka̱ ila itachakli mʋt, takali hannali ka̱ ila itachakli tok.

¹⁷ Micha takali ai itachaka ont ʋhli fehna ya̱ ahlopulli pokoli tahlapi ho̱ ikbi tok, micha takali ai itachaka atukla ka̱ ahlopulli pokoli tahlapi ho̱ ikbi tok.

¹⁸ Micha ʋlhtipo ya̱ itachakali na, achʋfa chi̱ ka̱ asonak lakna isht a kamʋssa pokoli tahlapi ho̱ ikbi tok.

¹⁹ Micha ʋlhtipo ompoholmo ya̱ chukfi nakni hakshup humma ikbi mʋt, yʋmma paknaka ompoholmo ya̱ bacha hakshup o̱ ikbi tok.

²⁰ Micha ʋlhtipo ya̱ shittim iti yo̱ iti bʋsha hiohli yo̱ im ikbi tok.

²¹ Iti bʋsha ʋt achʋfa kʋt falaia kʋt kubit pokolikmʋt, iti bʋsha achʋfa kʋt auata kʋt kubit achʋfa cha iklʋnna tok.

²² Iti bʋsha achʋfa kʋt ishit shamʋlli tuklo hosh iti̱ hopaki kʋt iti laui tok, yakohmichi hosh iti bʋsha moma ka̱ ʋlhtipo ya̱ im ikbi tok.

²³ Micha ʋlhtipo ya̱ iti bʋsha im ikbi ka̱; oka mahli pilla oka mahli in tʋnnʋp a̱ iti bʋsha pokoli tuklo tok.

²⁴ Micha iti bʋsha pokoli tuklo kash nutaka ya̱ tʋli hʋta yosh ashamohli pokoli ushta ho̱ ikbi tok; iti bʋsha achʋfa im isht shamohli in tuklo ka̱ nutaka ya̱ ashamohli tuklokma, iti bʋsha achʋfa im isht shamohli tuklo ka̱ ashamohli tuklo tok.

²⁵ Micha ʋlhtipo in tʋnnʋp achʋfa falʋmmi pilla aiʋhli ya̱ iti bʋsha̱ pokoli tuklo ikbi tok.

²⁶ Micha tʋli hʋta yosh im ashamohli pokoli ushta ho̱ ikbi tok, iti bʋsha achʋfa nutaka ya̱ ashamohli tuklokma, iti bʋsha inla nutaka ya̱ ashamohli tuklo tok.

²⁷ Micha ʋlhtipo hʋshi aiokatula pilla in tʋnnʋp a̱ iti bʋsha hannali ho̱ ikbi tok.

²⁸ Micha in tʋnnʋp tuklo ʋlhtipo chukbi puta ka̱ iti bʋsha tuklo ho̱ ikbi tok.

²⁹ Micha akishtʋla ya̱ chʋnaha achʋfa ho̱ isht ita chakali mʋt, paknaka ya̱ ita chakali tok; yakohmi hosh chukbi ita tuklo ka̱ yʋmihchi tok.

³⁰ Mihma itibʋsha untuchinakma tʋli hʋta yash, ashamʋlli auah hannali tok; iti bʋsha achʋfa nutaka ya̱ ashamʋlli tuklo bieka tok.

³¹ Micha ʋlhtipo in tʋnnʋp achʋfa iti bʋsha ya̱ shittim iti yo̱ im okfoatkʋchi tahlapi ho̱,

³² Micha ʋlhtipo in tʋnnʋp achʋfa iti bʋsha ya̱ im okhowatkʋchi tahlapi; micha ʋlhtipo in tʋnnʋp hʋshi ai okatula pilla iti bʋsha ya̱ im okhowatkʋchi tahlapi ho̱ ikbi tok.

³³ Micha iklʋnna okhowatkʋchi iti bʋsha puta kash hlopullechi kʋt ant ʋhli ia kʋt ont ʋhli achʋfa ya̱ ona tok.

³⁴ Micha iti bʋsha ya̱ tʋli holisso lakna yo̱ lapalichi mʋt, okhowatkʋchi ashamohli ya chi̱ ka̱ tʋli holisso lakna chʋnaha im ikbi mʋt, okhowatkʋchi̱ ya̱ tʋli holisso lakna lapohlichi tok.

³⁵ Micha isht ompoholmo ya̱ okchamali, micha hummaii, micha tishepa, micha linen tapʋski itapana cha, tʋnna yo̱ ikbi tok toksʋli imponna yosh ikbi ho̱ chelubim atoba yo̱ ikbi tok.

³⁶ Micha shittim iti yo̱ toni̱k ushta ho̱ im ikbi cha, tʋli holisso lakna lapalichi tok; isht afacha yʋt tʋli holisso lakna, micha aiʋlbeha ya̱ tʋli hʋta yo̱ i̱ bilelit akmochi tok.

³⁷ Micha ʋlhtipo okhissa in takali ya̱ okchamali, micha hummaii, micha tishepa, micha itapana cha tʋnna linen tapʋski chufak ushi isht atahli yo̱ ikbi tok.

³⁸ Micha toni̱k tahlapi kash i̱ chanakbi aiena ka̱ ikbi tok, micha noshkobo micha im apakfopa aiena ka̱ tʋli holisso lakna lapalichi tok; amba ashamohli tahlapi kʋt o asonak lakna a tok.