Eksotʋs 35 - Chahta Holisso Holitopa 1886

¹ Micha Moses ʋt Islael im ʋlla ʋhleha moma ka̱ itʋnnali cha, Anumpa ilʋppa puta kak o̱ hʋsh yʋmihcha chi̱ ho̱, Chihowah yʋt hʋchim apesa tuk oke.

² Nitak hannali ho̱ natoksʋli ʋt ʋlhtahashke, amba nitak isht untuklo hokʋto nitak chi̱ holitopa Chihowah i̱ nitak hullo a foha hi oke: kʋna hosh yʋmmak o̱ natoksʋli nana kia yʋmihchikmʋt illi pullashke.

³ Nitak hullo ya̱ hʋsh aiasha ahlopulli ka̱ luak nana kia hʋchik ikbo kashke, achi tok.

⁴ Micha Moses ʋt Islael im ʋlla ʋhleha okla moma ka̱ im anumpulit, Nana ilʋppak o̱ Chihowah yʋt hʋchim apesʋt,

⁵ Hʋch itin takla ya̱ Chihowah nan im issa hʋsh ai ishashke; kʋna hosh chu̱kʋsh aiokpanchikmʋt, Chihowah isht aiokpʋchi, tʋli holisso lakna, tʋli hʋta, micha asonak lakna,

⁶ Micha nan okchamali, micha hummaii, micha tishepa, micha linen tapʋski, micha issi kosoma hishi,

⁷ Micha chukfi nakni hakshup humma, micha bacha hakshup micha shittim iti,

⁸ Pʋla ha chi̱ ka̱ bila micha ishtahama bila ya chi̱ ka̱ micha nabalama ya̱ chi̱ ka̱ nabalama,

⁹ Micha oniks tʋli, micha efot micha ikkishi alata ontʋla chi̱ ka̱ tʋli puta ka̱ isht ʋlashke.

¹⁰ Mikma chu̱kʋsh hopoyuksa ʋhleha hʋchi takla aiasha kʋt ʋlʋt Chihowah yʋt apesa tuk moma ka̱ yʋmihchashke.

¹¹ Ʋlhtipo tabanake, micha im ompoholmo, im ishtakamʋssa, micha im iti bʋsha, im okhowatkʋchi, in toni̱k, micha im ashamʋlli,

¹² Itombi holitopa, micha in tʋbi, ai i̱ kana ai ombinili aiena, micha isht ompoholmo, ompoholmo,

¹³ Ai impa, micha in tʋbi, micha nan im aiʋlhto moma, micha pʋska otʋni,

¹⁴ Micha tohwikela chi̱ ka̱ pʋla ai o̱ hikia, micha i̱ nachukushpa, micha pʋla bila aiʋlhto tohwikela chi̱ ka̱ bila aiena,

¹⁵ Micha alta nabalama ai o̱ hukmi, micha in tʋbi, micha ahama bila, micha nabalama, micha ʋlhtipo ya̱ achukowa okhissa ya̱ atakali,

¹⁶ Alta ai o̱ hukmit isht aiokpʋchi, im asonak lakna tʋnna im aiena in tʋbi, micha nan im aiʋlhto moma, ampo mahaia chito, micha iyi,

¹⁷ Wanuta ya̱ natakali, in toni̱k, micha im ashamʋlli, micha wanuta okhissa ya̱ in takali,

¹⁸ Ʋlhtipo ya̱ isht akamʋssʋt shʋmohli, micha, wanuta isht akamʋssʋt shʋmohli, micha im asita puta.

¹⁹ Aholitopa nan isht ai ʋtta chi̱ ka̱ nafohkʋt isht ʋtta, naholitompa isht ʋtta, Alon i̱ nafohka holitopa, micha naholitompa isht ai ʋtta isht a̱sha chi̱ ka̱ ushi ʋhleha i̱ nafohka puta ka̱ ikba chi̱ hoke, achi tok oke, im achi tok.

²⁰ Mihma Islael im ʋlla ʋhleha okla moma kʋt Moses a̱ ai i̱ filʋmmit ia tok.

²¹ Mihma chu̱kʋsh ʋt ayimitʋchi tuk puta kʋt, micha shilombish ʋt ʋlhpiesa ahnichechi tuk puta kʋt ʋla tok; micha Chihowah nan im issa ya̱ okla moma im ʋlhtipo, micha nan isht aiahanta moma, micha nafohka holitopa a toba chi̱ ka̱ isht ʋla tok.

²² Mihma chu̱kʋsh aiokpanchi aiyukali kʋt hatak, micha ohoyo aiena kʋt, ʋlʋt, ibbak ʋlbeha, micha haksobish takali, micha ibbakushi ʋlbeha, micha shakba ʋlbeha tʋli lakna isht ilakshema moma isht ʋla tok, mihma im issa tuk aiyukali hatak ʋt tʋli holisso lakna, im issa ya̱ Chihowah im issa tok.

²³ Mihma hatak kʋna hosh nan okchamali, micha nahummaii, micha na tishepa, micha linen tapʋski, micha issi kosoma hishi, micha chukfi nakni hakshup homma, micha bacha hakshup aiena kʋt im a̱sha tuk ʋt isht ʋla tok.

²⁴ Kʋna hosh tʋli hʋta, micha asonak lakna im issa ya̱ im issa aiyukali kʋt Chihowah nan im issa ya̱ isht ʋla tok; mikma hatak nana hosh shittim iti nan isht aiasha toba he ʋt in tonlakmʋt isht ʋla tok.

²⁵ Mikma ohoyo chu̱kʋsh hopoyuksa moma kʋt ibbak ishit shʋnni cha shʋnni tuk ʋt nan okchamali, micha na hummaii, micha natishepa micha linen tapʋski aiena ka̱ isht ʋla tok.

²⁶ Micha chu̱kʋsh ʋt hopoyuksachit ayimitʋchi tuk ohoyo moma kʋt issi kosoma hishi o̱ shʋnni tok.

²⁷ Mihma pehlichi ʋhleha hʋt efot, micha ikkishi alata ya̱ ontʋla chi̱ ka̱ oniks tʋli, micha tʋli puta ka̱ isht ʋla tok.

²⁸ Micha ahama ya chi̱ ka̱, micha nabalama chi̱ ka̱, nabalama, micha tohwikeli ya chi̱ ka̱ bila aiena ka̱ isht ʋla tok.

²⁹ Islael im ʋlla ʋhleha hʋt hatak micha ohoyo moma kʋt chu̱kʋsh ʋt ʋlhpesa ahnichichi na, na toksʋli ilaiyukali moma kʋt toba chi̱ ho̱ Chihowah yʋt Moses a̱ toksʋli apesa tuk a̱, chu̱kʋsh aiokpanchi hosh Chihowah nana im issa ya̱ isht ʋla tok.

³⁰ Mihma Moses ʋt Islael im ʋlla ʋhleha ha̱, Yakeh, Chihowah yʋt hochifot Chutah apehlichi aiachʋfa Hu ushi Uli ya̱ ushi Besaleel ahe atokoli tuk oke.

³¹ Micha Chitokaka shilombish alotoli na, hopoyuksa nanithana, micha nana kostininchi, micha natoksʋli ilaiyukali moma imponna;

³² Micha natoksʋli inla fehna anukfillit, tʋli holisso lakna, micha tʋli hʋta, micha asonak lakna toksʋli,

³³ Micha on taloha chi̱ kʋt tʋli tʋhli, micha iti ya̱ bambakechi natoksʋli inla fehna nana kia ikbi ya̱ nukfohki tuk oke.

³⁴ Micha im abʋcha he ya̱, yʋmma, micha Tan apehlichi aiachʋfa Ahisamak, Aholiab itatuklo ka̱ nukfohki tuk oke.

³⁵ Yʋmmak o̱ natoksʋli ilaiyukali moma nan in chunli, micha natoksʋli inla fehna imponna, micha alakali, okchamali, micha hummaii, micha tishepa, micha linen tapʋski, nantʋnna, micha natoksʋli kaniohmi kia yʋmihchi, natoksʋli inla fehna kia anukfilli aiena ka̱ imponna nukfohki tuk oke.