Eksotʋs 27 - Chahta Holisso Holitopa 1886

¹ Micha shittim iti yo̱ alta falaia kʋt kubit tahlapi, micha auata kʋt kubit tahlapi itilaui banot fullota ho̱ ish ikbashke, mihma chaha kʋt kubit tuchinashke.

² Micha chukbi ushta ka̱, lapish ushta ho̱ ish ikbashke, lapish ʋt yʋmmakinlashke; micha asonak lakna ya̱ ish lapalechashke.

³ Micha i̱ hituk chubi aiʋlhta chi̱ ka̱ im ampmahaia, micha hituk chubi im isht piha, micha im ampushi, micha nipi im isht yichiffi, micha luak im ai ʋlhto mahaia aiena ka̱ ish ikbashke, nan aiʋlhto moma ka̱ asonak lakna yo̱ ish ikbashke.

⁴ Micha asonak lakna tʋnna ya̱ ish im ikbashke; micha tʋnna ʋt chukbi ushta ka̱ asonak lakna chʋnaha ushta ho̱ ish ikbashke.

⁵ Micha nuta alta aiʋhli ka̱ ish bohlashke: yohmi na, tʋnna ʋt alta iklʋnna ya̱ ont ʋhlashke.

⁶ Micha alta ya̱ shittim iti tʋbi yo̱ tʋbi ish im ikbashke, micha asonak lakna ish lapalechashke.

⁷ Mikma tʋbi ʋt chʋnaha ya̱ aiʋlhtashke, micha ishit shola chi̱ ho̱, tʋbi ʋt alta ya̱ in tʋnnʋp tuklo ka̱ shʋmohlashke.

⁸ Itombi ʋt chiluk a̱sha ho̱ iti bʋsha yo̱ isht ish ikbashke; nʋnih ha̱ a chi pesʋchi tuk mak o̱ yohmi ho̱ okla ikbashke.

⁹ Micha ʋlhtipo i̱ wanuta ya̱ ish ikbashke, oka mahli in tʋnnʋp oka mahli pilla wanuta ya̱ na takohli ʋt linen tapʋski ita pʋna yosh in tʋnnʋp achʋfa ka̱ falaia kʋt kubit tahlepa achʋfashke.

¹⁰ Mikma in toni̱k pokoli tuklo, micha ashamʋlli pokoli tuklo kʋt asonak lakna yashke: toni̱k i̱n chanakbi, micha afohoma aiena kʋt tʋli hʋta yashke.

¹¹ Mikma falʋmmi in tʋnnʋp ak kia falaia ka̱ na takali ʋt falaia kʋt kubit tahlepa achʋfakma, toni̱k pokoli tuklo, micha ashamʋlli pokoli tuklo kʋt asonak lakna yashke; to ni̱k i̱ na chanakbi afohoma aiena kʋt tʋli hʋta yashke.

¹² Mikma hʋshi ai oka tula in tʋnnʋp wanuta auata natakali ʋt kubit pokoli tahlapashke, in toni̱k ʋt pokolikma ashamʋlli ʋt pokolashke.

¹³ Micha hʋshi ak ochaka in tʋnnʋp hʋshi akochaka pilla, ho̱ wanuta auata kʋt kubit pokoli tahlapashke.

¹⁴ Okhissa in tʋnnʋp achʋfa natakali ʋt kubit auah tahlapashke, in toni̱k ʋt tuchinakma, ashamʋlli ʋt tuchinashke.

¹⁵ Mikma in tʋnnʋp achʋfa ya̱ natakali ʋt kʋbit auah tahlapashke, in toni̱k ʋt tuchinakma, ashamʋlli ʋt tuchinashke.

¹⁶ Mikma wanuta okhissa ya̱ natakali ʋt linen tapʋski itapʋna okchʋmali, hummaii, micha tishepa chofak ushi isht ʋlhtaha hosh kʋbit pokoli tuklashke, mikma in toni̱k ʋt ushtakma, ashamʋlli ʋt ushtashke.

¹⁷ Toni̱k moma wanuta apakfoyupa kʋt tʋli hʋta isht afohomashke, i̱ na chanakbi ʋt tʋli hʋta yokma, ashamʋlli ʋt asonak lakna yashke.

¹⁸ Wanuta falaia kʋt kubit tahlepa achʋfakma, auata kʋt pokoli tahlapi bi̱kashke; mikma chaha kʋt kubit tahlapi hosh linen tapʋski itapʋna yashke, micha ashamʋlli ʋt asonak takna yashke.

¹⁹ Ʋlhtipo ya̱ nan aiʋlhto moma, nan isht apilesa, micha isht a honʋhla moma, micha wanuta ya̱ isht a honʋhla moma aiasha kʋt asonak lakna yashke.

²⁰ Micha Islael im ʋlla ʋhleha ha̱ ish im apesa na, bila pʋla hʋt lu̱a na, bilia chi̱ ka̱ alif bila a̱hli boʋt pʋla hʋchin toba ya̱ isht chim ʋlashke.

²¹ Okla moma im ʋlhtipo isht ompoholmo kocha yʋmmʋt ishtatokowa itikba ya̱ Alon, micha ushi ʋhleha aiena kʋt hielit opiaka, micha onnahinli aiena Chihowah i̱ tikba talaia chi̱ ka̱ apihi̱sa hi oke, im isht atiaka bilia ka̱ nan ʋlhpisa bilia yosh in toyula cha, Islael im ʋlla ʋhleha ha̱ i̱ yʋmohmashke.