Eksotʋs 26 - Chahta Holisso Holitopa 1886

¹ Micha ʋlhtipo ya̱ nantʋnna ʋba takali pokoli hosh linen tapʋski itapʋna yosh okchʋmali, micha hummaii, micha tishepa ish ikbashke: toksʋli imponna yosh ikbi yo̱ chelubim ish ikbashke.

² Nantʋnna ʋba takali achʋfa kʋt falaia kʋt kubit pokoli tuklo akucha untuchinashke, mikma auata kʋt nantʋnna ʋba takali achʋfa kʋt kubit ushtashke; micha nantʋnna ʋba takali moma kʋt ʋlhpisa aiachʋfashke.

³ Nantʋnna ʋba takali tahlapi kʋt itʋchakʋchashke, mikma nantʋnna ʋba takali inla tahlapi kʋt itʋchakʋchashke.

⁴ Nantʋnna ʋba takali achʋfa itʋchaka ʋhli ya̱ ahlopulli okchʋmali ya̱ ish ikbashke; micha nantʋnna ʋba takali inla atukla yʋt itʋchaka ʋhli fehna ka̱ yohmi akinli ho̱ ish ikbashke.

⁵ Nantʋnna ʋba takali achʋfa ka̱ ahlopulli pokoli tahlapi ho̱ ish ikbashke, micha nantʋnna ʋba takali atukla yʋt, itʋchaka yʋt ʋhli ha̱ ahlopulli pokoli tahlapi ho̱ ish ikbi na, ahlopullit iti halʋllashke.

⁶ Micha tʋli holisso lakna yo̱ ishtakamʋssa pokoli tahlapi ho̱ ish ikbashke, micha nantʋnna ʋba takali ya̱ ishtakamʋssa ak o̱ isht ish itʋchakalashke; mikma ʋlhtipo achʋfashke.

⁷ Micha issi kosoma hishi yo̱ nantʋnna ʋbatakali ish ikbi na, ʋlhtipo ya̱ ompoholmo yashke; nantʋnna ʋbatakali auahchʋfa ho̱ ish ikbashke.

⁸ Nantʋnna ʋbatakali achʋfa falaia kʋt kubit pokoli tuchinashke; micha nantʋnna ʋbatakali achʋfa auata kʋt kubit ushta hashke, micha nantʋnna ʋbatakali auahchʋfa kʋt ʋlhpisa kʋt ai achʋfashke.

⁹ Mikmʋt nantʋnna ʋbatakali tahlapi ka̱ ila ish itachakalashke; mikmʋt nantʋnna ʋba takali hanali ka̱ ila ish ita chakali cha, nantʋnna ʋbatakali ishit hannali ka ʋlhtipo itikba ya̱ ish a pohlomashke.

¹⁰ Micha nantʋnna ʋbatakali achʋfa itachahkʋchi ya̱ ʋhli fehna ʋhli ya̱ ahlopulli pokoli tahlapi, micha nantʋnna ʋbatakali atukla ai itachaka ya̱ ahlopulli pokoli tahlapi ho̱ ish ikbashke.

¹¹ Micha asonak lakna yo̱ isht akamʋssa pokoli tahlapi ho̱ ish ikbi cha, ahlopulli ya̱ ish apitta cha, ish itachakli na, ʋlhtipo ʋt achʋfashke.

¹² Mikma nantʋnna ʋbatakali atampa ʋlhtipo ompoholmo nantʋnna ʋbatakali iklʋnna kʋt ʋlhtipo ya̱ ont atampʋt a̱sha ka̱ pit takalashke.

¹³ Mikma ʋlhtipo ya̱ nantʋnna ʋbatakali afalaiaka atampa kʋt in tʋnnʋp achʋfa ka̱ kubit achʋfa ho̱, micha intʋnnʋp achʋfa ka̱ kubit achʋfa ho̱ ont ʋhlashke; ʋlhtipo ya̱ ompoholmot ont atampʋt in tʋnnʋp ilʋppa, micha in tʋnnʋp yʋmma takalashke.

¹⁴ Micha ʋlhtipo ya̱ ompoholmo ya chi̱ ka̱, chukfi nakni hakshup humma yo̱, micha paknaka isht ompoholmo ya chi̱ ka̱ bacha hakshup o̱ ish ikbashke.

¹⁵ Micha ʋlhtipo ya̱ shittim iti bʋsha hiohli ho̱ ish im ikbashke.

¹⁶ Iti bʋsha achʋfa kʋt falaia kʋt kubit pokolikma, auata kʋt iti bʋsha achʋfa kʋt kubit achʋfa cha, iklʋnna aienashke.

¹⁷ Iti bʋsha achʋfakma ai ishit shʋmohli ʋt tuklo cha, a shʋmohli ya̱ itʋlhpisashke; yʋmohmi bieka ho̱ ʋlhtipo im iti bʋsha moma ka̱ ish ikbashke.

¹⁸ Ʋlhtipo ya̱ oka mahli in tʋnnʋp, oka mahli pilla ho̱ iti bʋsha pokoli tuklo ho̱ ish ikbashke.

¹⁹ Micha iti bʋsha pokoli tuklo nutaka ya̱ a shamʋlli ya̱ tʋli hʋta pokoli ushta ho̱ ish ikbashke; iti bʋsha achʋfa nutaka ya̱ ishit shamʋlli tuklo ka̱ a shamʋlli kʋt tuklashke; mikma iti bʋsha inla nutaka ya̱ ishit shamʋlli in tuklo ka̱ ashamʋlli tuklo hashke.

²⁰ Mikma ʋlhtipo in tʋnnʋp atukla falʋmmi in tʋnnʋp a̱ iti bʋsha pokoli tuklashke.

²¹ Mikma ashamʋlli ʋt i̱ pokoli ushtashke; iti bʋsha achʋfa nuta ka ya̱ ashamʋlli tuklo; micha iti bʋsha inla nuta ka̱ ya̱ ashamʋlli tuklashke.

²² Mikma ʋlhtipo ya̱ in tʋnnʋp hʋshi aiokatula pilla ho̱ iti bʋsha hannali ho̱ ish ikbashke.

²³ Micha ʋlhtipo in tʋnnʋp tuklo chukbi ya̱ iti bʋsha tuklo ho̱ ish ikbashke.

²⁴ Micha nutaka yʋt itʋchakashke, micha paknaka ya̱ itachakʋt chʋnaha achʋfa ho̱ shamʋllashke, itatu̱klot yakohmashke; chukbi in tuklashke.

²⁵ Micha iti bʋsha untuchinashke; mikma ashamʋlli tʋli hʋta yʋt ashamʋlli im auah hannalashke; iti bʋsha achʋfa nutaka ya̱ ashamʋlli tuklo, micha iti bʋsha inla nutaka ya̱ ashamʋlli tuklashke.

²⁶ Micha im okhowatkʋchi ya̱ shittim iti yo̱ ish ikbashke, ʋlhtipo in tʋnnʋp achʋfa im iti bʋsha ya̱ tahlapashke.

²⁷ Mikma ʋlhtipo in tʋnnʋp achʋfa iti bʋsha ya̱ okhowatkʋchi tahlapashke; mikma ʋlhtipo in tʋnnʋp achʋfa hʋshi ai okatula pilla in tʋnnʋp tuklo iti bʋsha ya̱ okhowatkʋchi tahlapashke.

²⁸ Mikma itibʋsha iklʋnna okhowatkʋchi ʋt ʋhli ka̱ ʋttʋt iakmʋt ont ʋhli ka̱ onashke.

²⁹ Micha iti bʋsha ya̱ tʋli holisso lakna ish lapalechi cha, okhowatkʋchi aiʋlbiha chi̱ ka̱ tʋli holisso lakna chʋnaha ish ikbashke, micha okhowatkʋchi ya̱ tʋli lakna ish lapalechashke.

³⁰ Micha kaniohmit ʋlhtipo ʋt toba chi̱ ho̱ nʋnih ha̱ a chipesʋchi tuk mak o̱ ish hilechashke.

³¹ Micha isht ompoholmo ya̱ linen tapʋski itapʋna, okchʋmali, hummaii, micha tishepa aiena toksʋli imponna ikbi yo̱ ish ikbashke, chelubim a̱ tobashke.

³² Micha shittim iti toni̱k ushta hosh tʋli lakna alapali ho̱ ish atakalichashke; tʋli hʋta ashamʋlli ushta ka̱ tʋli lakna atakali ʋt a̱shashke.

³³ Micha isht ompoholmo ya̱ isht akamʋssa nutaka isht takalichashke; yʋmohmi ho̱ nan ʋlhpisa afohka itombi holitopo ya̱ ompoholmo kash anu̱kaka isht chukowʋt ish takalichashke, mikma ompoholmo yʋt aholitopa, micha holitopa i̱ shahli ya̱ chim iti̱ filʋmmichashke.

³⁴ Micha nanʋlhpisa afohka itombi holitopa moma i̱ shahli anu̱kaka talaia ka̱ im ai i̱ kana ai ombinili ya̱ ish ontalalashke.

³⁵ Micha iti patʋssa ompoholmo kocha ish talalashke, micha pʋla ai o̱ hikia ya̱ ʋlhtipo lapalika oka mahli pilla in tʋnnʋp iti patʋssa ichapa ka ak o̱ ish hilechashke; micha iti patʋssa ya̱ falʋmmi in tʋnnʋp ak o̱ ish hilechashke.

³⁶ Micha ʋlhtipo okhissa takali ya̱ linen tapʋski itapʋna hosh okchʋmali, hummaii, micha tishepa chufak ushi isht ʋlhtaha ho̱ ish ikbashke.

³⁷ Micha atakali ya̱ shittim iti toni̱k tahlapi ho̱ ish ikbi cha, tʋli holisso lakna ish lapalechashke; mikma atakali ʋt tʋli lakna yashke; micha asonak lakna ʋt tʋli lakna yashke, micha asonak lakna ashamʋlli tahlapi ho̱ bilelit ish im akmochashke.