लुका 24 - चेपाङयेसु सिओसय उह्ति च्योक्सास्यावो ( मति २८:१-१० ; मर्कुस १६:१-११ ; युहन्ना २०:१-१० ) 1 साताको ङ्हा अइतबारको दिन बिहान सइबर च्योक्ति लयमयइ तयार जाह्ङ्तिगमो म्हक-म्हक त बासना वाङो मलम र अत्तर लात्ति ओउ मोम्चोलम येसुको तेसहाङ आलाकाय। 2 जब ओउमय ओहाङ दाहाकाय, तेसहाङ पोको दह्य्लो राक्तिगमो ताह्ङो ब्लेकबाङ यातताङ सारतिगमो ओउमयइ च्यवाकानि। 3 ओउतझ्यान्ते ओउमय तेसभित्र पोकाकाय, तर ओउमयइ प्रभु येसुको ज्यानकाय च्यउनिलि। 4 जब ओउमय येसुको ज्यान च्यउमात अकमक्क स्याउति ग्याह्ङ्तिमुओ खेइतो, अचानक प्लिह्ङो नाय लावओ निसचाक मान्ता ओउमयको छेउसय थाआकाच। 5 ओउ मोम्चोलम आन जोक्तो रइति खुङाकाय। अनि ओउ निसचाक मान्ताइ तोआथास, “निङइ धइति जिउदो मान्ताकाय सिओ मान्तालमको थाउहाङ बोःङ्तेनानि? 6 येसु इ तेसहाङ मुसास्याउल। येसु सिओसय उह्ति च्योक्सास्यावो मुना। येसु निङकुस गालिलहाङ मुसास्याउधार्ना येसुइ निङकाय दोह तोसास्यावो खेतो ओउ कुरा निङइ सम्झनु— 7 ‘ङा मान्ताको चोः पापि मान्तालमको क्रुतहाङ परलेनाङ, र ओउमयइ ङाकाय क्रुसहाङ योकोनाताङ्स। तर सुम दिनहाङखे ङा फेरि सिओसय उह्ति च्योक्लेनाङ।’” 8 अनि ओउ मोम्चोलमइ येसुइ तोसास्यावो इ आखर सम्झआकानि। 9 ओहाङसयको ओउ मोम्चोलम तेसराङसय द्याह्नाकाय, अनि जुदा कुरालम एघार जना मुख्य चेलालम र अरु जुदा मान्तालमकायमा ल्हाक्ति छ्यानाकानि। 10 ओउमयखे मरियम मग्दलिनि, योअन्ना, याकुबको आमा मरियम, र अरु मोम्चोलममा खेइतो। अनि ओउमयइ ओहाङ स्यावो जुदा कुरा मुख्य चेलालममकाय ल्हाक्ति छ्यानाकानि। 11 तर ओउ मोम्चोलमइ तोओ कुराकाय मुख्य चेलालमइ बिस्वास जाह्ङ्निलि। ओउ मोम्चोलमइ तोओखे गेमालो कुरा खेना त दाह्य्ति ओउमय म्हराकाय। 12 तर पत्रुसखे क्र्यानोक्त चिङ्ति तेसताङ तन्ति आला। जब ओउ तेसहाङ पोको दह्य्लोहाङ दाहा, ओउइ खुःङ्ति भित्रताङ योआकान, अनि येसुको ज्यानकाय पोतोलो सुतिको नाय मात्र च्यवाकान। ओउत च्यउति ओउ ग्याह्ङ्ति किमताङ द्याह्ना। येसु इम्माउसको ल्यामहाङ ( मर्कुस १६:१२-१३ ) 13 ओउ अइतबारको दिनले येसुको निसचाक चेलानिस इम्माउस त तोओ गाउताङ आल्धय खेचतो। ओउ गाउखे यरुसलेम सहरसय लगभग एघार किलोमितर च्युककाय लोक्तो खेतो। 14 ओउनिस निसचाकले येसुको रुवाङहाङ स्यावो घतनाको बारेहाङ कुरा जाह्ङ्धय खेचतो। 15 जब ओउनिस ओउतहाइति नोःति वाह्धय खेचतो, अचानक येसु ओउनिसको द्याङ्तो वाङ्सास्यावा अनि ब्रक्त वाह्सास्यावा। 16 ओउनिसइ लयको मिकइ येसुकाय च्यवाकाचु, तर ओउले येसु खेसास्याउना त दाह्य्ति तह्य्सा खाइचुलु। 17 येसुइ ओउनिसकाय ह्वत्सास्यावा, “निङ्जि दोह कुराको बारेहाङ नोःधय वाह्ति मुतेनाज?” ओउनिस न्यासाकाच, र आन लिह्सिओ कुरा ओउनिसको खेनहाङ च्यउतो। 18 ओउ निसचाक मध्येको क्लेओपास त तोओइ येसुकाय तोआथय, “यरुसलेम सहर दुलति वाङ्तिमा केहि दिन ङ्हा स्यावो घतनाको बारेहाङ दोह कुरामा चिःमालोपाय नाङ मात्र एकान खेसास्याउना खेचा।” 19 येसुइ ह्वत्सास्यावा, “दोह घतना घतआ र?” ओउनिसइ जवाफ बयाकाचु, “ओउ घतनाखे नासरतको येसुको रुवाङहाङ स्यावो खेतो। येसु अगमबक्ताझ्यान्ते ग्याह्ङ्सिओ कुरालम जाह्ङ्सास्यावा अनि परमेस्वर र मान्तालमको नजरहाङ जिःङकालि गुरु स्याउसास्यावा। 20 मुख्य पुजारिलम र निको अरु अगुवालमइखे येसुकाय सात्साको लागि निर्नय जाह्ङ्साकाय रोमि सासकलमकाय सुम्पति बयाकानि। अनि ओउमयइ येसुकाय क्रुसहाङ योकोति साताकानि। 21 येसुइले नि इस्राएलिलमकाय छुत्कारा बइसास्याउना त दाह्य्ति निइ आसा-भरोसा जाह्ङो खेङसुतो। र उच्युक मात्र खेल, तर तेनखे इ घतना स्यावोमा सुम दिन स्यावा। 22 अनि निको समुहहाङ येसुकाय गुह्ल्ति वाहो केहि मोम्चोलमइ निकाय ग्याह्ङ्ताकाताङ्सु। ओउमय बिहान सइबर च्योक्ति तेसराङहाङ आलाकाय। 23 तर ओउमयइ येसुको ज्यान तेसहाङ च्यउनिलि। ओउमय द्याह्न्ति पाह्य्ति वाङाकाय र लाङकादुत च्यवालाङ्सु त दाह्याकाय। अनि लाङकादुतनिसइ ओउमयकाय येसुपाय जिउदोले मुसास्याउना त दाह्य्ति तोआथास। 24 ओहाङसयको निको केहि मान्तानिस तेस योलाङ आलाकाच, र ओउनिसइमा जुदा थोक मोम्चोलमइ तोओलेखाले च्यवाकाचु। तर ओउनिसइमा येसुकायखे च्यउचुलु।” 25 अनि येसुइ ओउ निसचाक चेलानिसकाय तोसास्यावा, “निङ्जि निसचाकमा गतताह्ङो मान्ताते खेतेनाज, धइतिदाह्य्सा परमेस्वरको अगमबक्तालमइ तोओ कुरालमहाङ बिस्वास जाह्ङ्सा निङ्जिकाय गच्युक दुक्तो स्याउति मुना। 26 ख्रिस्तइ लयको महिमाको राज्य जाह्ङ्सा थाल्सासय ङ्हा ओउइ इ जुदा कुरालमसय दुख च्यउसा परना त दाह्यो कुरा दोह निङ्जिइ चिःतेजुलु र?” 27 अनि धर्मसास्त्रहाङ लयको बारेहाङ तोओ कुरा येसुइ ओउ निसचाककाय मोसाको कितापलमसय सुरु जाह्ङ्ति अरु जुदा अगमबक्तालमको कितापलमसय ल्हाक्ति छ्यान्सास्यावा। 28 ओउ निसचाक लयनिस आल्साखेओ इम्माउस त तोओ गाउ द्याङ्तो दाहाकाच। तर येसुखे अझले उताङ आल्सा झाकोलेखा हाइसास्यावा। 29 तर ओउ निसचाक चेलानिसइ येसुकाय बिन्ति जाह्ङाकाचु, “तेनको याह्दिङ निचिकुसि मुसास्याउपाना, धइतिदाह्य्सा न्याम याह्साले लागआ र याह्दिङ स्याउसाले लागआ।” ओहाङसयको येसु बास मुलाङ ओउनिसकुस आल्सास्यावा। 30 जब येसु ओउनिसकुस जेःसाकाय च्युःङ्सास्यावा, येसुइ लाङ रोःत्सास्यावा र परमेस्वरकाय धन्नेबाद बइसास्यावा। अनि लाङ फह्न्ति ओउनिसकाय बइसास्यावा। 31 ओहाङसयको परमेस्वरइ ओउपाय येसु खेसास्याउना त दाह्य्ति ओउनिसकाय चिःताक्सास्यावा। तर अचानकले येसु ओउनिसको नजरसय अलप्सास्यावा। 32 ओउ निसचाक लयनिस नोकायाकाच, “ओउ निचिकुस ल्यामहाङ नोधार्ना र धर्मसास्त्रको माने तोति बइधार्ना, दोह निचिको ल्हुङतुक आसओ नाःआक्ल र?” 33 ओहाङसयको ओउनिस रेह्न्तोले चिङ्ति यरुसलेम सहरताङ द्याह्नाकाच। ओहाङ दाह्धार्ना ओउनिसइ एघार जना मुख्य चेलालम र ओउमयकुस हुम्तिमुओ अरु मान्तालमकाय क्रुसाकाचु। 34 र ओउमय एत दाह्य्धयमुओ खेइतो, “प्रभु दोङ्सिले सिओसय उह्ति च्योक्सास्यावो मुना, र सिमोन पत्रुसकहाङ थासास्यावो मुना!” 35 अनि ओउ निसचाक चेलानिसइ इम्माउसको ल्यामहाङ स्यावो कुरा, र येसुइ लाङ फह्न्सा स्याउधार्ना गतहाइति ओउनिसइ येसुकाय तह्याकाचु त दाह्यो कुरा ओउमयकाय ल्हाक्ति छ्यानाकाचु। येसु चेलालमकहाङ थासास्यावो ( मति २८:१६-२० ; मर्कुस १६:१४-१८ ; युहन्ना २०:१९-२३ ; खबरदुत १:४-८ ) 36 जब ओउ निसचाक चेलानिस इ कुरालम ल्हाक्धय खेचतो, अचानक ओउमयको माझहाङ येसु थासास्यावा र चिङसास्यावा अनि तोसास्यावा, “निङकाय धोमाइतो स्याउपाना।” 37 तर ओउमयखे सिओ मान्ताको ग्वालाम च्यवो त म्हर्ति आन जोक्तो रयाकाय। 38 येसुइ ओउमयकाय तोसास्यावा, “निङ धइति माहा जोक्तो रइतेनय? र धइति निङको मनहाङ सङ्खा जाह्ङ्तेनानि? 39 ङाको क्रुत-दोमकाय योनु, अनि ङा दोङ्सिले सु खेनाङ त दाह्यो कुरा निङइ पेतो चिःतेनानि। ङाकाय धिन्नाङ्स र ङा ग्वालाम खेङल त दाह्यो कुराहाङ निङ पक्का स्याउन, धइतिदाह्य्सा निङइ चिःतेनानि ग्वालामको ज्यान स्याउल, तर निङइ च्यउतेआकानि ङाकोपाय जुदाले मुना।” 40 एत तोतिभ्याआपछि, येसुइ ओउमयकाय लयको क्रुत र दोम छ्यान्सास्यावा। 41 चेलालम आन जोक्तो आसआकाय र ग्याह्ङाकाय, ओउतझ्यान्ते अझले ओउमयइ ओउ कुराकाय बिस्वास जाह्ङ्सा खाइनिलि। अनि येसुइ ओउमयकाय ह्वत्सास्यावा, “दोह इहाङ निङकुसि केहि जेःओथोक मुना या?” 42 ओउमयइ येसुकाय यात चोक्ता खाङो ङाः बयाकानि। 43 अनि येसुइ ओउ ङाः त्याक्ति ओउमयको ङ्हाले जेःसास्यावा। 44 अनि येसुइ ओउमयकाय तोसास्यावा, “जब ङा निङकुसि ङ्हा ब्रकले खेङतो, ङाइ ओउबेलाहाङ निङकाय तोओ कुरालम देङे पुत्लाङ वाङो मुना। ङाको बारेहाङ परमेस्वरइ मोसा दुवारा बइसास्यावो नेम-कानुन, अगमबक्ताको कितापलम र भजनसङ्ग्रहहाङ लेखओ जुदा कुरा पुत्साले परना त दाह्य्ति ङाइ निङकाय तोओ खेङतो।” 45 अनि येसुइ ओउमयकाय धर्मसास्त्रहाङ लेखओ कुरालम चिःसाकाय सहयोग जाह्ङ्सास्यावा। 46 येसुइ ओउमयकाय तोसास्यावा, “धर्मसास्त्रहाङ लेखओ मुना— ख्रिस्तइ दुख दोःसा र सिसा, अनि सुम दिनहाङ सिओसय उह्ति च्योक्सा परलेना। 47 ख्रिस्तको मय्ङहाङ पस्ताप जाह्ङोलमकाय प्रभु परमेस्वरइ पापको छेमा बइसास्याउना त दाह्यो कुरा यरुसलेम सहरसय सुरु जाह्ङ्ति जुदा जातिको मान्तालमकाय प्रचार जाह्ङ्साले परना। 48 ङाकहाङ स्यावो कुरा च्यवो मान्तालम निङले खेतेनय। ओउतझ्यान्ते निङइले इ घतनाको बारेहाङ जुदाकाय तोसा परना। 49 तर साइनु, ङाको आपाइ जाह्ङ्सास्यावो बाचा अनुसार ङाइ निङकहाङ पबित्र ग्वालाम ल्होक्नेनाङ्स। तर निङ लाङकासय वाङ्साखेओ जिःङइ भरपुर स्याउमाच्युककाय इ यरुसलेम सहरहाङले ल्युह्ङ्ति मुन।” परमेस्वरइ येसुकाय लाङकाताङ आःल्सास्यावो ( मर्कुस १६:१९-२० ; खबरदुत १:९-११ ) 50 ओहाङसयको येसुइ चेलालमकाय यरुसलेम सहरसय बेथानिया त तोओ गाउताङ आःल्सास्यावा। ओहाङ दाहापछि येसुइ लयको क्रुत च्युन्ति ओउमयकाय आसिक बइसास्यावा। 51 जब येसुइ ओउमयकाय आसिक बइसास्याउधय खेतो, प्रभु परमेस्वरइ येसुकाय ओउमयकसय वेङ्ति लाङकाताङ च्युन्ति आःल्सास्यावा। 52 अनि येसुको चेलालमइ खुःङ्ति येसुकाय सेवआकानि, र आन आसति यरुसलेम सहरताङ द्याह्नाकाय। 53 र ओउमयइ लयको समय सधय परमेस्वरकाय प्रसङ्सा जाह्ङ्धय परमेस्वरको मन्दिरहाङ मुति हुताकानि। आमेन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.