खबरदुत 27 - चेपाङपावलकाय इतालिया देसको रोम सहरताङ लात्ति आःलो 1 जब हाकिमिलमइ निकाय तिः जहासहाङ लह्न्ताक्ति इतालिया देसताङ आःल्सा निर्नय जाह्ङाकानि, अनि ओउमयइ पावल र झेलकनहाङ कुङ्तिगमो अरु मान्तालमकाय “माहाराजाको पल्तन” त तोओ रोमि सेनाको पल्तनको कप्तान युलियसको जिम्माहाङ सुम्पआकानि। 2 नि एद्रामितेनोस सहरसय एसिया इलाकाको तिः जहास न्यासो समुन्द्रको घातलम स्याउधय आल्साखेओ तिः जहासहाङ लह्न्ति आलालाङ्सु। माकेदोनिया इलाकाको थेसलोनिके सहरसय वाङो अरिस्तार्खस त तोओ मान्तामा निकुसि खेतो। 3 स्याह्ङ्लो पल्त नि सिदोन सहरहाङ दाहालाङ्सु। युलियसइखे पावलकाय योःनुतो, ओउतझ्यान्ते ओउइ पावलकाय होयालमकुस क्रुस्काइसा र लयकाय चाहओ सहयोग लेःसा अनुमति बयाथय। 4 जब निइ सिदोन सहर फेति तिःको यात्राहाङ ङ्हाताङ वाहालाङ्सु, ङ्हासयले माःरु निकताङ वाङोझ्यान्ते नि साइप्रस तापुको छेउ स्याउधय विखोल्ति आलालाङ्सु। 5 अनि नि किलिकिया र पामफिलिया इलाकाको समुन्द्र स्याउधय लुकिया छेत्रको माइरा सहरहाङ दाहालाङ्सु। 6 ओहाङ कप्तान युलियसइ अलेक्जेन्द्रिया सहरसय इतालिया देसताङ आल्धयमुओ यातज्यो तिः जहास ङाःयाकान, अनि निकायमा ओउ जहासहाङले लह्न्ताकाताङ्सु। 7 माःरु ङ्हासय निकताङले वाङोझ्यान्ते नि नाःतो दिनसम्म गुःनि-गुःनिले माहा दुक्तोकुसि तिः जहासको यात्रा जाह्ङ्ति केनिदस त तोओ यातज्यो मयो सहर द्याङ्तो दाहालाङ्सु। माःरुखे नि आल्साखेओ थाउसयले वाङ्धयमुओ खेतो, ओउतझ्यान्ते ओताङ आल्मात नि दखिनको क्रेत तापुताङ आलालाङ्सु। ओहाङ दाहापछि क्रेत तापुको सालमोने त तोओ सहर द्याङ्तो स्याउधय ङ्हाताङ आलालाङ्सु। 8 माःरु जोक्तोले वाङोझ्यान्ते नि गुःनि-गुःनिले समुन्द्रको किनार स्याउधय आल्ति तिः जहास न्यासो “समुन्द्रको पेओ घात” त तोओ थाउहाङ दाहालाङ्सु। ओहाङसय लासिया सहर द्याङ्तोले खेतो। 9 ओउ समुन्द्रको यात्राहाङ निको नाःतो समय खेरो वाया। ओउतोक बेलाहाङ तिः जहासहाङ लह्न्ति समुन्द्रको यात्रा जाह्ङ्साकाय मउसम माहाले रइसितो स्यावो खेतो, धइतिदाह्य्सा यहुदिलमको उपाङ मुओ पबित्र दिनमा द्योक्तिले भ्याओ खेतो। ओउतझ्यान्ते पावलइ तिः जहासको मान्तालमकाय सल्लाह बइधय तोआकान— 10 “अ होयालम, यदि नि इहाङसय तिः जहासहाङ ङ्हा आल्नातहि त खेया, तिः जहास र मालताललम मात्र खेल, निको रुवाङमा म्हेत्ति वाइलेना।” 11 तर सेनाको कप्तानइ पावलइ तोओ कुराकाय ग्यामात, तिः जहासको कप्तान र मालिकइ तोओ कुराकाय ग्याआ। 12 झ्युङकाले समय ओउ तिः जहास न्यासो समुन्द्रको घातहाङ मुसाकाय पेतो स्यावाक्ल। ओउतझ्यान्ते जुदा मान्तालम ओहाङसय तिः जहासहाङ लह्न्ति आल्सा, र झ्युङकाले समय फोनिक्स सहरहाङले मुति हुत्सा त दाह्य्ति निर्नय जाह्ङाकानि। ओउ फोनिक्स सहरखे दखिन-ब्लकन्याम र उत्तर-ब्लकन्यामताङ हिल्तिमुओ तिः जहास न्यासो समुन्द्रको घात खेतो। समुन्द्रहाङ ताह्ङो गाइध वाङो 13 जब दखिनसय पेओ माःरु वाङ्सा फाःङाकान, तिः जहासहाङ मुओ मान्तालमइ लयमयइ योजना जाह्ङो काम जाह्ङ्साकाय इखे पेओ समय खेना त म्हराकाय। ओउतझ्यान्ते ओउमयइ तिः जहास न्यास्ताक्साकाय समुन्द्रभित्र क्लाःतिगमो फालामको लिःओ लङ्गर तानति ग्ल्युनाकानि, अनि नि क्रेत तापुको छेउ स्याउधय यात्रा जाह्ङालाङ्सु। 14 तर यातयछिनहाङले “उत्तर-दाहन्यामको माःरु” त तोओ ताह्ङो गाइध क्रेतको तापु स्याउधय वाङा। 15 निको तिः जहासकाय ओउ गाइधइ आपोझ्यान्ते नि आल्साखेओ थाउताङ निइ आल्साले खाइङसुलु। ओउतझ्यान्ते गाइधइ तिः जहासकाय गाताङ आःल्यामा आःल्पनउ त दाह्य्ति फेआलाङ्सु। 16 निइ तिः जहासकाय कउदा त मय्ङ्ओ यातज्यो मयो तापुको काह्ल्यामसय आःलालाङ्सु। अनि निइ तिः जहासको लोन्हे पेह्न्ति गमो मयो दोङगाकाय माहा दुख जाह्ङ्ति दल्ताक्सा खायालाङ्सु। 17 ओउमयइ दोङगाकाय तिः जहासभित्र तानति वानापछि तिः जहास क्लह्य्लाम त दाह्य्ति तिः जहासकाय बोःनो लालमइ बल्योकुसि पाःनाकानि। अनि ओउमय लिबियाको किनारको सिर्तिस त तोओ बलुवाखानिहाङ तिः जहास ल्युप्ना या त म्हर्ति रयो खेइतो, ओउतझ्यान्ते माःरुइले तिः जहासकाय गाताङ आःल्यामा आःल्पनउ त दाह्य्ति र तिः जहासकाय गुःनि वाह्ताक्साको लागि ओउमयइ तिः जहासको नायको पालकाय समुन्द्रहाङ क्लाःति ल्होकाकानि। 18 ओउ रइसिओ गाइध वाङ्तिले मुआ, ओउतझ्यान्ते स्याह्ङ्लो पल्त ओउमयइ तिः जहासहाङ काति लात्ति वानो केहि मालताललम तातिवाइसा फाःङाकानि। 19 अनि चित्सयलोखे ओउमयइ तिः जहासहाङ प्रयोग जाह्ङो तिः जहासको मालताललममा ताति वायाकानि। 20 नाःतो दिनसम्मले निइ न्याम र कारालम च्यउसा दोःङसुलु, र ताह्ङो माःरु वाङ्तिले मुओझ्यान्ते नि स्याक्नाङ्सु त दाह्यो आसामा मिह्तिवाया। 21 नाःतो दिनसम्म सुइमा जेःगा जेःओ नाःआक्ल, ओउतझ्यान्ते पावल ओउमयको ङ्हा चिङाक्तिको एत दाह्या, “अ होयालम, निङइ ङाइ तोओ कुरा ग्याति क्रेत त तोओ तापुसय तिः जहासको यात्रा जाह्ङ्मालो खेयाकाय, देङे निइ एतताह्ङो दुखलम दोःआक्तहिलि र मालताललम वाइसामा परआक्तहिलि। 22 तर द्याह ङाइ निङकाय बिन्ति जाह्ङ्नेनाङ्स, आत्तिलाम! नि सुमा सितहिलि, तर तिः जहासखे म्हेत्ति वाइलेना। 23 ङाइ सेवा जाह्ङो र ङाइ आराधना जाह्ङो परमेस्वरको यातज्यो लाङकादुत योहको याह्दिङहाङ ङाकहाङ वाङा, 24 र ङाकाय एतदाह्य्ति तोआताङ, ‘पावल, नाङ रइलाम! नाङ रोमि माहाराजाको ङ्हा लयको मुद्दाको छिनोफानो जाह्ङ्साको लागि चिङसाले परतेना। अनि सायु, नाङको कारनइले इ तिः जहासहाङ मुओ जुदा मान्तालमकाय परमेस्वरइ दल्ताक्सास्याउलेना।’ 25 ओउतझ्यान्ते होयालम, निङ रइलाम! परमेस्वरइ लयइ तोसास्यावो अनुसारले जाह्ङ्सा स्याउना त दाह्यो कुराहाङ ङाइ बिस्वास जाह्ङ्नाङ। 26 तर निखे कुनय यातज्यो तापुहाङले प्लाह्लाङ ज्याल्नातहि।” 27 चउधम् याह्दिङको समयहाङ नि लह्नो तिः जहासखे एद्रियास त तोओ समुन्द्रहाङले वाह्धयमुओ खेतो, र ल्हाक-याह्दिङको समयहाङ निको तिः जहासखे कुनय भुयार द्याङ्तो आल्धय मुना त दाह्य्ति तिः जहासको कामदारलम म्हराकाय। 28 ओउतझ्यान्ते ओउमयइ समुन्द्रको तिःको नाप लेःधार्ना यात सय क्रुच्युककाय ज्युह्म्तो च्यवाकानि। अनि यातछिन लोन्हे बल मइतोकाय उताङ नापधार्ना पचहतर क्रुच्युककाय मात्र ज्युह्म्तो त दाह्य्ति चिःआकानि। 29 अनि ओउमय समुन्द्रको किनारको सिलाबाङहाङ तिः जहास थुङ्ना या त म्हर्ति रयाकाय, ओउतझ्यान्ते ओउमयइ तिः जहासको काह्सय प्लय गोता लङ्गरलम क्लाःआकानि र न्याम थोङ्पाना त दाह्य्ति प्राथना जाह्ङाकानि। 30 अनि तिः जहासको कामदारलमइ दोङगाकाय समुन्द्रहाङ क्लाःआकानि र तिः जहासको ङ्हासयको लङ्गरलममा क्लाःसा परना त दाह्य्ति माः जाह्ङाक्तिको ओउमयइ तिः जहाससय ग्ल्युह्ङ्ति क्रउसा कोसिस जाह्ङाकानि। 31 तर पावलइ सेनाको कप्तान र सिपाहिलमकाय तोआकान, “यदि तिः जहासको कप्तानलम तिः जहासभित्र मुइलि त खेयाकाय, निङ सुमा स्याक्लेतिइलि।” 32 ओउ कुरा साइति सिपाहिलमइ तिः जहासहाङ पाःन्तिगमो दोङगाको ला तात्ति बगाउति ल्होकाकानि। 33 बिहानको रिमरिम त स्याउतोक बेलाहाङ, पावलइ ओउमय जुदाकाय केहि जेःगालम जेःसाको लागि बिन्ति जाह्ङाकान— “निङइ आन लिह्ओझ्यान्ते दोहमा जेःमालो चउध दिन स्याउतेआकाय। 34 ओउतझ्यान्ते केहि थोक जेःसाको लागि ङाइ निङकाय बिन्ति जाह्ङ्नेनाङ्स, र निङइ लय स्याक्साको लागि खेयाकायमा जेःसाले परतेनय। निङपाय सुमा सिलेतेइलि र निङको यातज्यो म्याङमा म्हेत्ति वाइलेल।” 35 इच्युक तोति भ्याआपछि पावलइ केहि लाङ रोःताकान र ओउमयको ङ्हाहाङ परमेस्वरकाय धन्नेबाद बयाक्तिको जेःसा फाःङाकान। 36 अनि ओउमयइमा हउसला दोःआकाय र जुदाइले जेःसा फाःङाकानि। 37 निखे तिः जहासहाङ जुदा जाह्ङ्ति निस सय छयतर जना खेङसुतो। 38 जुदा मान्तालमइ कोस्तो जेःति भ्याआपछि, ओउमयइ तिः जहासकाय हाःतो जाह्ङ्साको लागि ओहाङ मुओ गहुङको नाःतो बोरालम समुन्द्रहाङ ताति वायाकानि। तिः जहास क्लह्य्ति तुकुरा-तुकुरा स्यावो 39 न्याम थोङापछि समुन्द्रको किनार च्यवा तर तिः जहासको कामदारलमइ ओउ थाउकाय तह्य्साले खाइनिलि। ओउमयइ समुन्द्रको किनारहाङ यातज्यो बलुवाखानिको दनि च्यवाकानि र सम्भब स्याउच्युक ओहाङले तिः जहासकाय न्यास्ताक्सा निर्नय जाह्ङाकानि। 40 ओउतझ्यान्ते ओउमयइ ला तात्ति लङ्गरलमकाय समुन्द्रहाङ फेति ल्होकाकानि, र ओउ बेलाहाङले पतवारलमकाय पाःन्तिगमो लालमकायमा फानाकानि। ओहाङसयको ओउमयइ तिः जहासको ङ्हासयको पालकायमा त्याःव च्युन्ति बयाकानि, र तिः जहास किनारताङ आला। 41 तर समुन्द्रको किनार दाह्सासय ङ्हा, तिः जहासको ङ्हाको भाकखे तिःको ताल्गेको बलुवाखानिहाङ थुङ्ति ल्युपोझ्यान्ते साह्ङ्साले खायुलु। अनि लोन्हेसयको भाकखे तिःको छल्काइ आपोझ्यान्ते क्लह्य्ति तुकुरा-तुकुरा स्यावा। 42 सिपाहिलमइखे झेलकनहाङ परओ मान्तालम तिः लाःति क्रउचनय त म्हर्ति ओउमय जुदाकायले सात्सा योजना जाह्ङाकानि। 43 तर सेनाको कप्तानइखे पावलकाय दल्ताक्सा चाहतो, ओउतझ्यान्ते ओउत जाह्ङ्साको लागि ओउइ सिपाहिलमकाय अनुमति बयुलु। बरु तिः लाःसा खायोलमखे ङ्हाले ज्योस्ति पाखाताङ आल्न त दाह्य्ति ओउइ जुदाकाय आग्या जाह्ङाकान। 44 अनि अरुलमकायखे सिङको फाल्याक र तिः जहासको तुकुरा स्यावो भाकलमकाय चुम्ति पाखाताङ आल्न त दाह्य्ति तोआकान। एतहाइति ओउमय जुदाले पेतोकुसि पाखाहाङ दाहाकाय। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.