१ थेसलोनिकि 3 - चेपाङ1 ओउतझ्यान्ते जब सिलास, तिमोथि र ङा, निङकसय वेङ्काइति मुसा खाइङसुलु, अनि सिलास र ङाखे म्रोतिले एथेन्स सहरहाङ लयनिसले मुसा निर्नय जाह्ङालाङ्चु। 2 निचिइपाय परमेस्वरको लागि निचिकुसले मुति ख्रिस्तको पेओ खबर प्रचारको काम जाह्ङो निचिको हउ तिमोथिकाय निङकहाङ ल्होको खेङचुतो। निचिइ ओउकाय निङको बिस्वासकाय बल्यो जाह्ङ्ताक्सा र निङकाय हउसला बइताक्साको लागि ल्होको खेङचुतो। 3 निङ सु खेयाकायमा एतताह्ङो सतावतलमको कारनइ जाह्ङ्धार्ना निरास स्यावोखे नि चाहङसुलु। परमेस्वरइले नाङ-निकाय एतताह्ङो सतावतलमहाङ परताक्सा निर्नय जाह्ङ्सास्यावो खेना त दाह्यो कुरापाय निङइमा चिःओले मुतेनय। 4 धइतिदाह्य्सा नि निङकुस मुतोकहाङ, नाङ-निखे सतावतहाङ परसा लागओ मुनातहि त दाह्यो कुरापाय निइ निङकाय ङ्हाखाले तोओ खेङसुतो। अनि ओउखे तोओ अनुसारले स्यावो कुरामा निङइ चिःओले मुतेनय। 5 ओउतझ्यान्तेले जब ङाइ ओउ कुराकाय सहसा खाइङल, निङको बिस्वास बल्यो मुना या मुल या त दाह्य्ति चिःसाको लागि ङाइ तिमोथिकाय ल्होको खेङतो। धइतिदाह्य्सा सय्तानइ निङकाय परिछ्याहाङ परताक्ति निको कामकाय बेर्थ जाह्ङाकान या त दाह्यो कुराहाङ ङा रयो खेङतो। 6 तर तिमोथिखे निङको बिस्वास र रापमयको बारेहाङ पेओ खबर लात्ति देङे भखरले दाह्तिवाङो मुना। अनि नि निङकहाङ वाङो कुराकाय निङइ आन झाक्तिले सम्झति मुतेनय, र निइ निङकाय क्रुस्सा इच्छ्या जाह्ङोलेखाले निङइमा निकाय क्रुस्सा इच्छ्या जाह्ङो मुतेनय त दाह्यो कुराको बारेहाङमा ओउइ निकाय ल्हाक्ति छ्यानाताङ्सु। 7 ओउतझ्यान्ते ङाको राप्तो बिस्वासि होयालम, निङको बिस्वास बल्यो मुना त दाह्यो कुरा चिःति निको दुख-कस्तलमहाङमा निङको लागि निकाय हउसला मिलओ मुना। 8 मा, प्रभुहाङ निङको बिस्वास बल्यो मुना त दाह्यो कुराइ निकाय नया रुवाङ बइनाताङ्सु। 9 द्याहखे निइ निको परमेस्वरकाय निङको लागि झन् नाःतो धन्नेबाद बइसा खाइनाङ्सु। निङको कारनइ परमेस्वरको ङ्हा निइ दोःओ आनन्दको लागि निइखे परमेस्वरकाय धन्नेबाद बइसा चाहनाङ्सु। 10 निइ निङकाय फेरिले क्रुस्सा दोःपाङ्सु र निङकाय बिस्वासहाङ झन् नाःतो बल्यो स्याउसाकाय सहयोग जाह्ङ्सा खाइपाङ्सु त दाह्य्ति दिन-याह्दिङ त मा दाह्य्मात इमान्दारकुस प्राथना जाह्ङ्ति मुनाङ्सु। 11 निको परमेस्वर आपा र निको प्रभु येसुइले निङकताङ वाङ्साखेओ ल्याम निको लागि फेरिले तयार जाह्ङ्ति बइपाताङ्सु त दाह्य्ति प्राथना जाह्ङ्ति मुनाङ्सु। 12 निइ निङकाय रापो लेखाले, प्रभु येसुइ निङ यात-अर्काकाय राप्काइसाको लागि र अरु जुदा मान्तालमकाय राप्साको लागि निङको रापमयकाय झन् नाःतो जाह्ङ्ति बइतेपनय। 13 ओउतले प्रभु येसुइ निङको बिस्वासकायमा बल्यो जाह्ङो स्याउपाना, अनि जब निको प्रभु येसु लयको जुदा पबित्र मान्तालमकुस द्याह्न्ति वाङ्सास्याउना, ओउतोक बेलाहाङखे परमेस्वर आपाको ङ्हा निङ पबित्र र दोह दोसमा नाःमातो स्याउतेपनय। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.