Забур 9 - Делан Йозанаш

Делан нийсо

¹ Эшарш локхучу тобанан куьйгалхочуьнга: «КӀант валар» олучу эшаран мукъамехь лакха еза. Дауда язйина назма ю иза.

² Веза Эла, сайн дерриг а даггара ас Хьуна хастамаш бийр бу, Хьан массо а тамашийна гӀуллакхаш аса дӀакхайкхор ду.

³ Ахьа мел дийриг бахьана долуш, хазахеташ а, воккхавеш а со хир ву. Веза Воккха Дела, Хьан цӀарна лерина иллеш ас эр ду.

⁴ Сан мостагӀий дӀабоьрзучу хенахь, Хьуна хьалха охьа а оьгий, хӀаллакьхуьлу.

⁵ Сан гӀуллакхна тӀехь Ахь нийсонца кхел яйтира. Бакъволу Кхелахо волу Хьо Хьайн Ӏарша тӀе охьахиира.

⁶ Кхидолу къаьмнаш Ахьа бехкедира, Ӏесанаш Ахьа хӀаллакбира, абаденналц церан цӀераш а дӀаяйира.

⁷ МостагӀий Ахьа кхаьллина дӀабехи. Церан гӀаланаш а Ахь хӀаллакйина дӀаехи, царах болу дагалацам а цаьрца цхьаьна дӀабели.

⁸ Ткъа Везачу Эло массо а хенахь олалла дийр ду. Цо Шен Ӏарш кхел ярна кечйина ю.

⁹ Цо дуьненна нийсонца кхел йо, халкъашна тӀехь а Цо бакъонца иза йо.

¹⁰ ГӀело йиначарна Веза Эла гӀап санна а ву, баланаш тӀехӀиттинчу заманахь тӀетовжа меттиг а ю.

¹¹ Хьан цӀе шайна евзинарш Хьуна тӀетевжа, хӀунда аьлча, Веза Эла, Хьо лоьхурш Ахьа дӀатесна ца буьту.

¹² Цийон-лома тӀера олалла дечу Везачу Элана ала аша иллеш. Къаьмнашна юкъахь дӀакхайкхаде аша Цуьнан гӀуллакхаш.

¹³ ЧӀир йоькхуш волчу Цо гӀело хьоьгучеран узарш диц ца до. Цо уьш дагахь а латтабо.

¹⁴ Веза Эла, Ахьа сох къинхетам бехьа, со цавезачаьргахьара аса хьоьгучу баланашка хьажахьа. Ӏожаллин кевнера со хьалаваккхахьа,

¹⁵ Цийонан йоӀан кевнехь соьга Хьайна хастамаш байтархьама. Воккхавеш хир ву со, Ахьа кӀелхьарваккхарна.

¹⁶ Шаьш даьккхинчу ор чу эгна халкъаш, кӀело еш, шаьш тийсинчу бойнех тасабелла церан когаш.

¹⁷ Веза Эла Цо йинчу кхелехула вевзинера. Ӏесанаш шайн куьйга динчу гӀуллакхаша дӀалаьцна.

¹⁸ Эхарте кхочу Ӏесанаш а, Дела вицвеш долу дерриг къаьмнаш а.

¹⁹ Гуттаренна а хир дац мисканиг вицвар, массо а ханна дӀадаьлла дац къечун сатийсар.

²⁰ ГӀаттахьа, Веза Эла! Адаме толам ма баккхийтахьа, Хьайна хьалха халкъашна кхел яйтахьа.

²¹ Веза Эла, Хьайгара кхерам тасахьа царна, шаьш адамаш бен доцийла хаийтахьа къаьмнашна.

Нийсонах лаьцна доӀа

²² Веза Эла, суна иштта генахь хӀунда ву Хьо? Со баланехь волуш къайла хӀунда волу Хьо?

²³ Дегнаш курадовларна къечарна тӀаьхьабовлу Ӏесанаш. Шайна дагадаьхкинчу хӀилланаша дӀалоцийла уьш.

²⁴ Шен синан лаамех дозалла до Ӏесачо. Шена харц пайда лоьхучо Веза Эла дӀа а тосу, Цунна сардам а буллу.

²⁵ Дозаллаш дарца Ӏесачунна моьтту, ша цхьаммо а жоьпе озор вац, Цуьнан цхьана а ойланехь Дела вац.

²⁶ Муьлххачу хенахь а цо дечу некъаша цуьнан аьтто боккху. Хьан кхел а цунна ма генахь ю. Иза шен массо а мостагӀашка цавашарца хьоьжу.

²⁷ Шен дагахь цо олу: «Со вухур вац. Цкъа а суна зуламе дерг тӀедогӀур дац».

²⁸ Цуьнан бага сардамех а, мекарлонех а, гӀело ярх а юьзна ю. Цуьнан меттан буьххьехь зуламениг а, вониг а ду.

²⁹ Ярташна уллохь кӀело йо цо, къайлаха йолчу меттигашкахь бехке воцург воь цо, къайлаха декъазачуьнга бӀаьргаш хьежабо цо.

³⁰ Коьллашкахь кӀело йина Ӏуьллучу лоьмо санна, къечунна къайлаха кӀело йо цо. Шен бой а тосий, къениг дӀалоцу цо.

³¹ Сатта а сеттий, таба а тебий, шен ондачу мӀарашца декъазанаш дӀалоцу цо.

³² Шен дагахь цо олу: «Далла дицделла ас динарг. Шен юьхь дӀа а ерзийна, ца го Цунна ас лелориг».

³³ Сан Веза Дела, гӀаттахьа, Хьайн куьг хьалаайахьа, Ӏазапехь берш а Ахь биц ма бехьа.

³⁴ Ӏесачунна Дела дегаза хӀунда хета те, шен дагахь: «Ахьа-м жоьпе озор вацара со», – олуш?

³⁵ ХӀетте а Хьуна дерриг а го, зуламан а, халахетаран а тидам бо, Ӏазап хьоьгуш берш а Ахьа Хьайн каралоцу. Къечо а ша Хьан кара дӀало. Байлахь висинчунна а Хьо гӀоьнча ву

³⁶ Ӏесачун а, зуламечун а ницкъ бохабехьа, церан Ӏесаллех уьш жоьпе озабехьа, церан Ӏесаллех хӀумма а ца диссалц.

³⁷ Веза Эла абаденналц а, гуттаренна а Паччахь ву! Кхин къаьмнаш Цуьнан лаьтта тӀера дӀадовр ду.

³⁸ Веза Эла! Хьуна дӀахеза Хьайна хьалха шаьш кӀезиг хетачийн лаамаш. Церан дегнаш Ахь чӀагӀ а до, Хьайн лерг царна дӀа а делла.

³⁹ Байлахь висинчунна а, Ӏазап хьоьгучунна а Ахь нийса кхел йо, лаьттарчу адаме кхин цкъа а кхерамаш ца тийсийтархьама.