Забур 7 - Делан Йозанаш

Нийсо йоьху доӀа

¹ Бен-Яманан тӀаьхьенах волчу Хушин гӀуллакх бахьана долуш Дауда Везачу Элана аьлла тийжаме назма.

² Сан Веза Дела! Ахьа со ларвар лоьху ас. Массо а суна тӀаьхьабевллачех кӀелхьара а ваккхий, Ахьа паргӀатваккхахьа со,

³ хӀунда аьлча, лоьмо санна, со хьаьшна, сан са доккхур ду цара, кӀелхьарвоккхург суна уллохь воцучу хенахь.

⁴ Сан Веза Дела! Нагахь соьгара цхьа хӀума даьллехь, я сан куьйго къа латийнехь,

⁵ нагахь аса сайца машарехь Ӏаш волчунна зе динехь, я сан мостагӀчунна, бехк а боцуш, со бахьана долуш ницкъ хиллехь,

⁶ мостагӀчо, суна тӀе а кхиъна, схьа а лаьцна, лаьттахь сан са а хьаьшна, сох чан а йина, вуьтийла со.

⁷ Валахьа, Веза Эла, Хьайн оьгӀазаллица дуьхьал, и оьгӀазалла сан мостагӀийн дераллина дуьхьал а йоккхуш. Самавалахьа, Сан Дела, меттахӀоттаехьа нийсо.

⁸ Массо а халкъаш Хьайна гонах а гулдай, Хьо волчу лакхахь царна тӀехь Куьйгалхо хилахь.

⁹ Везачу Эло йо халкъашна тӀехь кхел. Со бакъхиларе хьаьжжина, ехьа, Веза Эла, суна кхел. Сан дог а цӀена ма ду.

¹⁰ Адамийн хьекъал а девза Хьуна, дегнаш а чекх го Хьуна, тхан бакъволу Дела. Зуламхойн зенаш а сацадехьа Ахь, ткъа Хьайн лаамехь берш чӀагӀ а бехьа.

¹¹ Со ларвеш долу турс ду Дела, догцӀена берш кӀелхьарбоху Цо.

¹² Дела бакъонца кхел Йийриг ву. ХӀора дийнахь зуламхошна кхел кхайкхош ву Иза.

¹³ Нагахь ишттачех цхьаъ Шегахьа ца верзахь, Цо, Шен тур а ирдой, Шен Ӏад а дулий, уьш цунна тӀе хьажадо.

¹⁴ Ӏожалла тӀейоуьйту Цо, Шен гӀирс схьа а оьций, Шен догу пхерчий цунна тӀехьажадо.

¹⁵ Шен даг чохь зуламаш кхоьллинчо, кхечарна вон болх хила луучо ша-шена харцо кхуллу.

¹⁶ Кхечунна ор доккхург ша оцу ор чу вужур ву.

¹⁷ Ша кхоьллина баланаш цунна тӀе юхабоьрзур бу, цо дина зулам а цуьнан шен коьртах кхетар ду.

¹⁸ Ас хастам бо Везачу Элана Иза бакъ хиларна. Веза Воккхачу Элан цӀеран сийнна йиш а локху аса.