Забур 6 - Делан Йозанаш

Хало тӀееача дина доӀа

¹ Эшарш локхучу тобанан куьйгалхочуьнга: Даудан хӀара назма бархӀ мерз болчу пондарца ала еза.

² ТӀех ма деттахьа суна, Веза Эла, Хьо оьгӀазвахханчохь. ТаӀзар ма дехьа суна Хьо дарвеллачохь.

³ Веза Эла, къинхетаме хилахьа соьца, со гӀел ма велла. Сан даьӀахкашка зуз догӀу, товехьа со.

⁴ Дог а ду сан, чӀогӀа гӀайгӀане доьжна. Мел Ӏан деза те сан Хьоьга сатуьйсуш?

⁵ Юха а валий, Веза Эла, паргӀатдаккхахьа сан са! Хьайн хедар боцучу безаман дуьхьа кӀелхьарваккхахьа со.

⁶ ХӀунда аьлча эхартехь Хьо цхьанна а дагавогӀур вац, веллачо Хьуна хастамаш а бийр бац.

⁷ Аса дечу узарша со гӀел а во, дӀавуьжу мотт аса сайн бӀаьрхишца бус-буса тӀун а бо. Сан велхаро со вуьжу мотт а башийна.

⁸ ГӀайгӀанехь хиларна сан бӀаьргаш гӀелделла. МостагӀий бахьанехь уьш телхина догӀу.

⁹ ДӀадовла уллора, харцонаш лелораш, хӀунда аьлча дӀахезна Везачу Элана сан велхаран узарш.

¹⁰ Со Шега кхайкхар дӀа а хезна, сан доӀанна жоп лур ду Везачу Эло.

¹¹ Кхерийна а, эхь хетийтина а хир бу сан массо а мостагӀий. ЦӀеххьана юха а бирзина, юьхьӀаьржачу хӀуттур бу уьш.