Забур 5 - Делан Йозанаш

Ларвар доьху доӀа

¹ Эшарш локхучу тобанан куьйгалхочуьнга: Даудан хӀара назма шедагашца лакха еза.

² Сан дешнаш дӀахазахьа, Веза Эла, тергам бехьа сан узарийн.

³ ЛадогӀахьа, сан Паччахь волу Дела, аса доккхучу орцане. Хьоьга деш ма ду аса сайн доӀанаш.

⁴ Ӏуьйранна Хьуна хьалха сайн дехарш охьадохку ас, Хьоьгара сайна жоп даре са а туьйсуш.

⁵ Хьо зулам хаза ца хета Дела ма ву. Харцонаш еш берш Хьо волчохь бехар бац.

⁶ Курачу нахана меттиг яц Хьуна юххехь, цхьа а зуламхо Хьуна ца веза.

⁷ Харцлуьйраш хӀаллакбо Ахь. Ца беза Хьуна, Дела, цӀий Ӏенош берш а, мекарлонаш лелораш а.

⁸ Ткъа со, Хьан хедар боцу безам бахьана долуш, Хьан цӀа чу вер ву, гора а хӀоьттина, Хьан дезачу цӀа чохь Хьох кхоьруш лаьттар ву.

⁹ Ва Веза Эла! Лелавехьа со Хьайн бакъболчу новкъахула, дуьхьалбевлла мостагӀий сан болу дела. Нисбехьа Хьайна тӀебоьду сан некъ.

¹⁰ Цара дуьйцург цхьа а бакъ дац! Церан дегнаш хӀаллакдаран лаамех дуьзна ду, церан къамкъаргаш дӀаделладелла кешнаш санна ю, шайн мекарчу маттаца ямартло йо цара.

¹¹ Дела, ларахьа уьш бехке! Шаьш йина харцонаш шайна дуьхьал ерзийла царна. И харцонаш мел лелораш дӀабахахьа Ахьа, Дела, Хьайна дуьхьал уьш бовларна.

¹² Баккхийбеш хир ма бу Ахьа шаьш лардаре сатийсинарш. Цара даим хазахетарца иллеш лоькхийла. Ткъа Ахьа ларбехьа уьш. Хьо везарш самукъане хуьлийла, Ахьа мел дийриг бахьана долуш.

¹³ Ахь декъалво, Веза Эла, Хьайн лаамехь верг. Хьан безамо иза, турсо санна, ларво.