Забур 31 - Делан Йозанаш

Къиношна дохкодовларх а, Дала гечдарх а

¹ Даудан хьехаме назма. Декъала ву Везачу Эло цуьнан къинош цкъа а цунна дуьхьал ца лоруш волу стаг!

² Декъала ву Везачу Эло бехке веш воцу а, шен синца мекарло йоцу а стаг!

³ Айса къа латадар дӀа а ца дуьйцуш, Хьоьга вист а ца хуьлуш, со Ӏачу хенахь, хӀора денна ас узарш дарна, малъелла дӀаяьллера сан даьӀахкаш.

⁴ ХӀунда аьлча дийнаххьий, буьйсанний Хьан куьг суна тӀехь дазделла лаьттара. Аьхкенан йокъа хӀоьттинчу хенахь санна, бос а байна сан.

⁵ Амма айса латийначу къинна къера а хилира со, сайн бакъонца цалелар хьул а ца дира аса Хьох. Ас элира: «Везачу Эле сайн къинош дӀадоьллур ду ас». ТӀаккха Ахь дӀабаьккхира суна тӀера сан къинан бехк.

⁶ ХӀора Делан лаамехь волчо доӀа дойла Хьоьга, ша нийса вац аьлла хетачу хенахь, даккхий хиш дистина догӀучу хенахь, цунна тӀе уьш кхочур дац.

⁷ Хьо волчохь ю сан дӀалочкъийла, Ахь ларво со халонех, кӀелхьарваларан хазахетар а ло Ахь суна.

⁸ Ас хьо кхетор а ву, хьо ваха везачу новкъа а воккхур ву. Ас куьйгалла а дийр ду хьуна тӀехь, Сан бӀаьрг а бу хьуна тӀехь.

⁹ Ма хилийша дин санна, я кхеташ йоцу вирбӀарза санна, шаьш бохург цаьрга дайтархьама, церан мочхалш тӀе дуьрстанаш а, гаьллаш а йоьхкина, сецо езаш йолу.

¹⁰ Дог цӀена доцучу стеган дукха баланаш бу, ткъа Везачу Элах тешна Ӏаш волчунна Цуьнан хедар боцу безам хуьлу.

¹¹ Везачу Эло шайна динарг бахьанехь, самукъане хилалаш, Делан лаамехь дерш, даккхийделаш, дог цӀена дерш.