Забур 20 - Делан Йозанаш

Баьккхинчу толамна хастам бар

¹ Эшарш локхучу тобанан куьйгалхочуьнга: Даудан назма.

² Веза Эла! Хьо нуьцкъала хиларна самукъадаьлла ву паччахь, Ахь толам баккхийтарна барам боцуш хазахетта ву иза.

³ Цуьнан дагна лиънарг делла Ахь цунна, цуьнан бето дехнарг дӀа а ца теттира Ахьа.

⁴ ХӀунда аьлча диканна декъалварца дуьхьалвеара Хьо цунна, цӀеначу деших дина таж диллира Ахь цуьнан коьрта тӀе.

⁵ Цо дахар далар дийхира Хьоьга, Ахьа абаделлалц хан яхйира цуьнан.

⁶ Деза ду цуьнан сийлалла Ахь толам баккхийтарна. Ахь ларам а белла цунна, сийлахь хилар а делла.

⁷ Абаделлалц Хьайн декъалалла делла Ахь цунна. Хьо цуьнца хиларна, хазахетарца самукъадаьккхина Ахь цуьнан.

⁸ ХӀунда аьлча паччахь Везачу Элах тешна ву, Веза Воккхачун хедар боцучу безамах шеко а яц цуьнан.

⁹ Хьан куьйгана карор бу берриг Хьан мостагӀий, Хьан кара гӀур ма бу массо Хьо цавезарш.

¹⁰ Хьо оьгӀазвахча, йогучу пешах тарбийр бу Ахь уьш. Ша оьгӀазваханчохь Везачу Эло хӀаллакбийр бу уьш, цӀеро буур бу уьш.

¹¹ Лаьттара церан тӀаьхье а хӀаллакйийр ю Ахьа, адамийн кӀенташна юкъара церан хӀу а дойур ду Ахьа.

¹² ХӀунда аьлча цара Хьуна дуьхьал зулам а даьккхира, вон Ӏалашонаш а хӀиттийра, амма уьш кхочуш ца янъелира цаьрга.

¹³ ТӀаккха цаьрга баккъаш берзабойтур бу Ахь. Хьайн секхаӀодаца пхерчий кхуьссур ду Ахьа царна тӀе.

¹⁴ Оха лакхавоккху Хьо, Веза Эла, Хьо нуьцкъала хиларна. Оха хастор ву Хьо иллешкахь Хьан сийлахь гӀуллакхаш бахьанехь.