Забур 19 - Делан Йозанаш

Толам баккхарна дина доӀа

¹ Эшарш локхучу тобанан куьйгалхочуьнга: Даудан назма.

² Холчу хӀоьттинчу дийнахь дӀахезийла хьо Везачу Элана, ларвойла хьо Якъубан Делан цӀаро.

³ Цо гӀо доккхийла хьоьгахьа Шен цӀа чуьра, Цийон-лам тӀера хьо чӀагӀвойла Цо.

⁴ Ахь сагӀина мел деанарг дагатосийла Цунна, ахь дийнаташ дагоран сагӀа даккхарх там хуьлийла Цунна.

⁵ Кхочушбойла Везачу Эло хьан деган лаам а, ерриге хьан Ӏалашонаш а кхочушйойла Цо.

⁶ Ахь толам баьккхича, тхуна хазахетар ду, тӀаккха вайн Делан дуьхьа вай байракх ойур ю. Кхочушдойла Везачу Эло хьан дерриг а дехарш.

⁷ ХӀинца хиъна суна Везачу Эло Ша къобалвинарг кӀелхьарвоккхийла. Шен сийлаллин стигалшкара Цо жоп ло цунна Шен нуьцкъалчу кӀелхьарвоккхучу куьйгаца.

⁸ Цхьаболчара гӀудалкхех, вукхара говрех, ткъа оха тхайн Везачу Делан цӀарах дозалла до.

⁹ Уьш, мал а белла, ийгира, ткъа тхо, дӀа а хӀиттина, нисделира.

¹⁰ Веза Эла! Паччахье толам баккхийтахьа, тхо дӀа а хазахьа, Хьайга орца дохучу хенахь.