Забур 18 - Делан Йозанаш

Делан сийлалла Цуьнан кхоллараллехь ю

¹ Эшарш локхучу тобанан куьйгалхочуьнга: Даудан назма.

² Стигалша Делан сийлалла гойту. Цо динчу гӀуллакхех лаьцна дуьйцу цара.

³ Таханалерчу дийно кханалерчуьнга хаам бо, тховсалерчу буьйсано кханалерчу буьйсане дуьйцу цунах лаьцна.

⁴ Ца дуьйцу иза я меттанашца, я дешнашца, церан аз а дац хезаш.

⁵ Дерриг а лаьтта тӀехула чекхйолу церан лар. Дуьне мел ду дӀакхочу церан тоьшалла. Стигалшкахь маьлхана Ӏан меттиг елла Дала.

⁶ Шен нускал долчуьра воккхавеш араволу кӀант санна, араболу малх а, къийсаршкахь хьалхейоккхург санна, ша бан безачу некъах боккхабеш.

⁷ Стигалийн цхьана йистера схьаболу иза, вукху йисте кхаччалц некъ а бу цуьнан. Малхо луш йолчу йовхонах цхьа а хӀума хьул ца ло.

⁸ Везачу Эло белла хьехам билггала нийса бу, цо синан чӀагӀо йо. Везачу Эло дӀадиллинарг а тешаме ма ду, Цо хьекъална кӀоргге волчунна а хьекъалалла ло.

⁹ Везачу Элан омранаш бакъахьара ду, цара дог айадо. Везачу Элан весет сирла ду, цо бӀаьргаш серладоху.

¹⁰ Везачу Элах кхерар цӀена ду, иза абаделлалц ду. Везачу Элан кхелаш билггал бакъ а ю, уьш нийса а ю.

¹¹ И дерриге а дешил деза ду, мазал а, улха чуьра мезан тӀадамал а мерза ду.

¹² Хьан лена а цара боккха хьехам бо, уьш кхочушбарна йоккха ял а хуьлу.

¹³ Ша латийна массо а къинош хьанна го? Сан къайлаха долчу къинойх цӀанвехьа Ахь со.

¹⁴ Лаам болуш леточу къинойх ларвехьа Хьайн лай, цаьрга суна тӀехь толам а ца боккхуьйтуш. ТӀаккха цӀена хир ву со, даккхийчу къиношна бехке а воцуш.

¹⁵ Веза Эла, сан Тарх а, суна паргӀато Лург а, сан бетера долу дешнаш а, сан деган ойланаш а тамехь хуьлийла Хьуна хьалха.