Лелар 34 - Делан Йозанаш

Везачу Эло лур бу аьллачу мехкан дозанаш

¹ Везачу Эло Мусага элира:

² «Исраилхошка, тӀе а дуьллуш, иштта дӀаала: „КанаӀан-махка шу дахча, цигахь шуна кхочун долчу лаьттан дозанаш хӀорш ду:

³ къилбехьа агӀор долу шун доза дӀадолалур ду Цин-яьссачу арара Эдомна юххехула. Шун къилбехьара долу доза Дуьрачу хӀордан къилбехьарчу меттера малхбалехьа дӀагӀур ду.

⁴ Иза, къилбехьа а дирзина, Акхрабайм-Ӏинна тӀе а кхаьчна, Цин-яьссачу аренгахула чекхдер ду. Цигара и доза, къилбехьарачу Кхадеш-БарнаьӀа цӀе йолчу метте а кхаьчна, Хьацар-Адар-гӀала а деана, Ӏацмун-гӀалахула чекхдер ду.

⁵ Ӏацмунера иза дӀагӀур ду Мисар-мехкан дозанехь долчу хи тӀе, цигара Дуьненаюккъера хӀорда тӀе а кхочуш.

⁶ Малхбузера дозанехь хир бу Боккха хӀорд. Иза шун малхбузехьара доза хир ду.

⁷ Къилбаседехьа долу шун доза дӀагӀур ду Боккхачу хӀорда тӀера ХӀор-ломана тӀе кхаччалц.

⁸ ХӀор-лома тӀера иза Хьамат-Ӏине кхачийта, Цедад-гӀалина тӀе а кхачош.

⁹ Цигара Зипрун-гӀалина тӀекхаччалц дӀагӀур ду и доза, Хьацар-Ӏейнан-гӀалина тӀе а кхочуш. Иштта хир ду къилбаседехьа долу шун доза.

¹⁰ Малхбузехь долу шайн доза чекхдаккха Хьацар-Ӏейнан-гӀалина тӀера Шипам-гӀалина тӀекхаччалц.

¹¹ Шипам-гӀалина тӀера, Ӏейн-гӀалина малхбалехь йолчу Рабила-гӀалина тӀекхочур ду и доза. Цигара дӀа иза Канарот-Ӏоман малхбалерчу бердашкахула чекхдер ду.

¹² Цул тӀаьхьа иза Йордан-хинехула дӀагӀур ду Дуьрачу хӀордана тӀекхаччалц. Массо а агӀор иштта дозанаш а долуш, шун мохк хир бу цунах“».

¹³ Исраилан халкъана тӀе а дуьллуш, Мусас элира: «Аша, кхаж а тесна, доккхун долу латта хир ду иза. Везачу Эло исс тайпанна а, Маннашан тӀаьхьенах долчу ахтайпанна а лур ду аьлла иза,

¹⁴ хӀунда аьлча Раабанан тайпанан а, Гадин тайпанан а, Маннашан ахтайпанан а доьзалша шайна догӀуш долу лаьттан дакъош дӀаэцна.

¹⁵ Оцу шина тайпанна а, ахтайпанна а делла долу лаьттан дакъош малхбалехь Йордан-хил дехьа лаьттачу Ерихон-гӀалина дуьхьал агӀор ду».

Латта декъа дӀахӀиттийна куьйгалхой

¹⁶ Везачу Эло Мусага элира:

¹⁷ «Шуна латта декъа дӀахӀиттийначу нехан цӀераш хӀорш ю: динан да ЭлиӀазар а, Нунин кӀант ЮшаӀ а.

¹⁸ ХӀора тайпанах цхьацца куьйгалхо схьакъаставе царна гӀо дан латта декъийта.

¹⁹ Церан цӀераш хӀорш ю: ЯхӀудан тайпанна иза Епунин кӀант Килаб хир ву;

²⁰ ШимӀин тайпанна – ӀамихӀудан кӀант Шамуал;

²¹ Бен-Яманан тайпанна – Кислунан кӀант Эли-Дада;

²² Данан тайпанна – ЙогӀлин кӀант волу эла Букхай;

²³ Юсупан кӀентан Маннашан тайпанна – Ийпадан кӀант Хьаниал;

²⁴ Юсупан кӀентан Эпрайман тайпанна – Шиптанан кӀант волу эла Къамуал;

²⁵ Забулан тайпанна – Парнакан кӀант Эли-Цапан;

²⁶ Иссарханан тайпанна – Ӏазанан кӀант волу эла Палтиал;

²⁷ Ашаран тайпанна – Шалумин кӀант АхьъяхӀуд;

²⁸ Напталан тайпанна – ӀамихӀудан кӀант волу эла ПидӀаил».

²⁹ КанаӀан-махкара царна кхочуш долу лаьттан дакъош исраилхошна декъа Везачу Эло дӀахӀиттийна берш бу уьш.