Доладалар 5 - Делан Йозанаш

Адамна тӀера Нохьина тӀе кхаччалц йолу хан

¹ ХӀара ду Адаман тӀаьхьенах хиллачун тептар. Дала адам Шен вастехь кхоьллинера.

² Стаггий, зудий кхоьллинера Цо. Уьш декъал а бина, Ша уьш кхоьллинчу дийнахь царех «адамаш» элира Дала.

³ Адаман цхьа бӀе ткъе итт шо кхаьчнера, цуьнан кхин а цхьа кӀант хилча. Иза веккъа цуьнан аматехь а, вастехь а вара. Шен кӀантана ШатӀа аьлла цӀе тиллира Адама.

⁴ ШатӀа хиллачул тӀаьхьа кхин бархӀ бӀе шарахь вехира Адам. Оцу заман чохь цуьнан кхин а кӀентий а, йоӀарий а хилира.

⁵ Адам, исс бӀе ткъе итт шарахь ваьхна, дӀакхелхира.

⁶ ШатӀа цхьа бӀе пхеа шарахь ваьхча, цуьнан хилира кӀант Энош.

⁷ Энош хиллачул тӀаьхьа кхин бархӀ бӀе ворхӀ шарахь вехира ШатӀа. Оцу заман чохь цуьнан кхин кӀентий а, йоӀарий а хилира.

⁸ ШатӀа, исс бӀе шийтта шарахь а ваьхна, дӀакхелхира.

⁹ Энош дезткъе итт шарахь ваьхча, цуьнан хилира кӀант Къаим.

¹⁰ Къаим хиллачул тӀаьхьа кхин бархӀ бӀе пхийтта шарахь вехира Энош. Оцу заман чохь цуьнан кхин кӀентий а, йоӀарий а хилира.

¹¹ Энош, исс бӀе пхеа шарахь а ваьхна, дӀакхелхира.

¹² Къаим кхузткъе итт шарахь ваьхча, цуьнан хилира кӀант Махьаллал.

¹³ Махьаллал хиллачул тӀаьхьа кхин бархӀ бӀе шовзткъа шарахь вехира Къаим. Оцу заман чохь цуьнан кхин кӀентий а, йоӀарий а хилира.

¹⁴ Къаим, исс бӀе итт шарахь а ваьхна, дӀакхелхира.

¹⁵ Махьаллал кхузткъе пхеа шарахь ваьхча, цуьнан хилира кӀант Ярад.

¹⁶ Ярад хиллачул тӀаьхьа кхин бархӀ бӀе ткъе итт шарахь вехира Махьаллал. Оцу заман чохь цуьнан кхин кӀентий а, йоӀарий а хилира.

¹⁷ Махьаллал, бархӀ бӀе дезткъе пхийтта шарахь а ваьхна, дӀакхелхира.

¹⁸ Ярад цхьа бӀе кхузткъе шина шарахь ваьхча, цуьнан хилира кӀант ХӀанох.

¹⁹ ХӀанох хиллачул тӀаьхьа кхин бархӀ бӀе шарахь вехира Ярад. Оцу заман чохь цуьнан кхин кӀентий а, йоӀарий а хилира.

²⁰ Ярад, исс бӀе кхузткъе шина шарахь а ваьхна, дӀакхелхира.

²¹ ХӀанох кхузткъе пхеа шарахь ваьхча, цуьнан хилира кӀант Матушалахь.

²² Матушалахь хиллачул тӀаьхьа кхин кхаа бӀе шарахь, Дела даг чохь а волуш, вехира ХӀанох. Оцу заман чохь цуьнан кхин кӀентий а, йоӀарий а хилира.

²³ ХӀанох кхаа бӀе кхузткъе пхеа шарахь вехира.

²⁴ ХӀанох, Дела даг чохь а волуш, лелаш вара. Цхьана дийнахь иза къайлавелира, Дала иза дӀавигна дела.

²⁵ Матушалахь цхьа бӀе дезткъе ворхӀ шарахь ваьхча, цуьнан хилира кӀант ЛемакӀ.

²⁶ ЛемакӀ хиллачул тӀаьхьа кхин ворхӀ бӀе дезткъе шина шарахь вехира Матушалахь. Оцу заман чохь цуьнан кхин кӀентий а, йоӀарий а хилира.

²⁷ Матушалахь, исс бӀе кхузткъе исс шарахь а ваьхна, дӀакхелхира.

²⁸ ЛемакӀ цхьа бӀе дезткъе шина шарахь ваьхча, цуьнан кӀант хилира.

²⁹ ЛемакӀа шен кӀантана Нохьа аьлла цӀе тиллира (иза ду Ӏебархойн маттахь «синтем» бохург). ЛемакӀа элира: «Вай дукха къахьоьгуш ду, Везачу Эло неӀалт кхайкхийначу лаьтта тӀехь. Ткъа Нохьас синтем бохьур бу вайна».

³⁰ Нохьа хиллачул тӀаьхьа кхин пхи бӀе дезткъе пхийтта шарахь вехира ЛемакӀ. Оцу заман чохь цуьнан кхин кӀентий а, йоӀарий а хилира.

³¹ ЛемакӀ, ворхӀ бӀе кхузткъе вуьрхӀитта шарахь а ваьхна, дӀакхелхира.

³² Нохьа пхеа бӀе шарахь ваьхча, цуьнан хилира кӀентий Шима, Хьама, Япат.