MATHI 9 - SAOPOBÜ LAI (BSI)

Jisuei Tuokshatei Shatbü Müt che Maitibü

¹ Hobaje hao long to atkei hoba dei khatjung hauan jembü sang to loukei.

² Haoenei tuokshatei shatbü müt che, yepshanga lengan hao jungto sungbakei; hoba ladang Jisuei haoeneibü mailem hapbei haoei tuokshatei shatbou to laukei, “Nashoubou, maang kangashi! Kaibü shabü apbua.”

³ Hobaje Ngühkhüm lenbou shuong atei maangphanga laukei, “Ho mütei Mühghaü nyikuda.”

⁴ Jisuei haoenei dambü ngekei hoba laukei, “Ainyula kanei kaneibü maangpona amaibü dameida?

⁵ Aishanga, ‘Ka shabü apbua’, dogo laula sobou si; ayingsi, ‘Laksepashi, hoba paiashi,’ dogo laula sobou?

⁶ Lausikei kaodaka Müteibü Shou la shabü apbula sei kia dogo ngei kan la lenlabü.” Kheijinei haoei tuokshatei shatbou to laukei, “Laksepashi, ka yepshang peashi, hoba chem to ngaiashi.”

⁷ Hobaje hao pienkei, hoba haoen chem to haukei.

⁸ Ladang noknyühei kho hapbei haoen hatkei, hoba müt la seisihau khütetche kubou Mühghaü la nyensang kukei.

Jisuei Mathi Ngabü

⁹ Hobaje Jisuei khüka satjinei Mathi nyenbü müt che khüm heshanga setan hapbei, hoba haoei hao to laukei, “Kü phai semashi.” Hobaje Mathi meimeikei hoba hao phai sembei.

¹⁰ Hobaje Jisu chema shaushang yungshanga setjinei khüm hebü hoba shabü shuong juong loukei hoba hao hoba eikshuong yoa setkei.

¹¹ Ladang Farisibüei kho hapbei, haoenei hao eikshuong to laukei, “Aila kaneibü lenbouei khüm hebü hoba shabü shuong yoa shauda yungda?”

¹² Lausikei haoei kho ditkei hoba laukei, “Ashat anyatbü shuong shanga daktar akhamda, lausikei shatbü shuong shanga kümsilei.

¹³ Lausikei hauashi hoba, ‘Ngei lembü ji, lausikei onou mangsühda’ dogo laubü kho ngühtet ai yingkeije ditletashi. Aishanga ngo saopobü shuong aying, lausikei shabü shuong ngala loukei.”

Nyengbü shangabü Pheyobü

¹⁴ Kheijinei Johaneibü eikshuong hao jungto louan laukei, “Aila kün hoba Farisibü shuongei hanghangko nyengda, lausikei ka eikshuongei anyengda?”

¹⁵ Jisuei haoen to laukei, “Chemkanbou haoen yoa ki shongko, chemkanshanga kibü thangbou shuongei manghaapla thükkei sai? Lausikei chemkanbou haoen ka ngailanglabü chalou che sühlabü; kheijinei haoenei nyenglabü.

¹⁶ Aishanga neisimei hangbüa aoeikei nei haanbü athipda, aieilausi thipbü nei khoei neinyu ka jitlangda hoba khün amaibou yetda.

¹⁷ Hobaje mütshuongei ih haanbü phekhon shongmok hangbüa atakda; khei kümsije phekhon shongmok kho thada, hoba ih kho apda hoba phekhon shongmok kho leiluda; lausikei haoenei ih haanbü phekhon shongmok haanbüa takda, hoba ham püetda.”

Yaangboueibü Nouyangshou hoba Jisueibü Nei to Meitinyu Yaksa

¹⁸ Haoei khübü kho haoen to lautoua sinagog kabü pangsa che loukei hoba hao thedanga khüpetko laukei, “Kü shou nouyangshou toutham hakshema; lausikei kaiya hoba sao to ka ikei jungashi, hoba sao singngailabü.”

¹⁹ Hobaje Jisu hao eikshuong yoa meimeikei hoba hao phai sembei.

²⁰ Hobaje chühashi, yaksa che, ao po anthüknyi sii koubü kiteikei, hao phaito loukei hoba haoeibü neiyik to meitikei;

²¹ aishanga saoei jembü lolo maangpona laukei, “Ngei haoeibü neia ongkei meitialonga ngo maian aplabü.”

²² Jisuei sepeikei hoba sao hapbei; hoba haoei laukei, “Nashounyu, maang kangashi! Ka mailemei no maitia.” Hobaje yaksa kho kho jihatham maian apbei.

²³ Hobaje ladang Jisu pangsa chem khüto atkei, hoba pithung metbü hoba noknyüh panglangyoko hapbei,

²⁴ haoei laukei, “Satkhümashi! Yaksa kho ühaikei; lausikei sao yepbei!” Hobaje haoenei hao to nyikukei;

²⁵ lausikei ladang noknyüh kho lintikei, hao atkei hoba saoeibü ika jungkei, hoba medeinyu kho laksepbei.

²⁶ Hobaje kho ngühlang kaonyek pendoua phinthonkei.

Jisuei Nyekthubü Müt Nyi Maitibü

²⁷ Hobaje Jisu khüka satjinei nyekthubü müt nyi hao phai sembei, hoba ngekko laukei, “Dawid Shou, küsi to onoukai.”

²⁸ Hobaje ladang hao chem to atkei, nyekthubü nyi hao jungto loukei. Hobaje Jisuei haosi to laukei, “Ngei ho kümenlabü dogo kasiei mailemda si?” Hobaje haosiei hao to laukei, “Haü, Bunyubou.”

²⁹ Kheijinei haoei haosieibü nyek to meitiko laukei, “Kasieibü mailem thüng kasi to yingkushi.”

³⁰ Hobaje haosieibü nyek khitkei. Hobaje Jisuei kaangkhühtham haosi to sakkuko laukei, “Aolakei tengeti.”

³¹ Lausikei haosi satkei hoba kaonyek jembo kho ngühlang phinthonkei.

Jisuei Ngoubü Maitibü

³² Hobaje haoen ngaijinei, chühashi shabü souei lapbü ngoubü müt che hao jungto leibakei.

³³ Hobaje ladang shabü sou kho shian sattikei, ngoubü müt khoei ngüh joyokei. Hobaje noknyüh maangpangkei hoba laukei, “Israela ho tegü ladangkei hapan achühkei.”

³⁴ Lausikei Farisibüei laukei, “Haoei shabü sou shian sattila shabü soushou shuongeibü Choba jungeida.”

³⁵ Hobaje Jisuei sangshou hoba sangyaang pendoua sinagoga lenko, hoba Khuthük Sangle Ngühlangmaibü songlenko, hoba shat phang phangei shatbü hoba shatsinyat phang phanga maitiko paikei.

³⁶ Ladang haoei noknyüh hapbei, haoei haoen shanga aeibou sanouko dambukei, aieilausi haoen lombou akibü sanshuong tegü haoen khonkuko hoba aan kiteikei.

³⁷ Kheijinei haoei hao eikshuong to laukei, “Youlatlabü shangakei, lausikei eik shijo ong.

³⁸ Hibü kanei youlatbü Bunyubou to, haoei jembü youlatbü to eik koutila welauashi.”