MATHI 7 - SAOPOBÜ LAI (BSI)

Mümat Jembü

¹ Kan mat ajemlabü lele mü la matjem teku.

² Aishanga ai matjemei kanei jemlaje, kan mat khei jemlabü; hoba ai takletbüei kanei takletkulaje, kho kan la takletkulabü.

³ Aila nyi jembü nyek kabü inphou shanga adamenko, kaibü jaisina nyeka thamngu nepbü to chühkuda?

⁴ Ayingsi nyi kaibü jembü nyek kabü inphou kho ühüpbo kaibü jaisina to, “Ngei kaibü nyek ka thamngu kho apbukho” dogo lai laula thükkei?

⁵ Hibüyoubü, nyi jembü nyek ka shaang inphou kho apashi kheijinei ong nyi kaibü jaisina nyeka kibü thamngu kho apbula nyi shangashatko haplabü.

⁶ “Ai saopobü ki kho kei la teku, hoba uk thedanga kaneibü phülem tüpbu, ai ngenyu khübü kho haoenei youphanga nakeilabü, hoba sepeilabü hoba kan netla yeitilabü.

Hiashi, Lamashi, Kuokashi

⁷ “Hiashi, hoba kho kan la kulabü; lamashi, hoba kho kanei haplabü; kuokashi, hoba kho kan la ipbulabü.

⁸ Aishanga hibü wekoei hapda, hoba aoei lamda, haoei hapda, hoba aoei kuokeida kho hao la ipbulabü.

⁹ Ayingsi jembü shouei wentek che hisi hao la laang kulabü;

¹⁰ ayingsi haoei ngau che hisi hao la pinyu che kulabü, kan yoa müt ao ki?

¹¹ Khei yingsije, kan amaikokei, kan shousi la jongsak maibü kula ngealonga, khuthüka kibü kaneibü Bouei hao ka hibü shuong la peisilei maibü lai aei akula!

¹² “Kanei mütshuong la kan to ai ong kümtimang sühda, kho tegü kaneikei haoen to kümashi; aishanga ho Ngühkhüm si Thuseibü ngühtet ki.

Nyonyembü Bakou

¹³ “Bakou nyonyembü to atashi; aishanga maushang to leibü bakou ongayasetham, hoba lamnyu yaangbü ki hoba khüto atbü shuong juongnyu.

¹⁴ Aishanga langkeishang to leibü bakou aeibou nyonyembei, hoba kho hapbü shuong shijo ong.

Bunyu hoba khoeibü Hek

¹⁵ “Amlangbü thuseibü shuong, aoyou kan jungto saneibü hele lean louda, lausikei maangaenei sekbülakbü sho ki, haoen shanga maangsangashi.

¹⁶ Haoeneibü hekei kanei haoen shenlabü. Mütei jaklong ka semlühhek ayingsi, kamjak ka bhuk kheida si?

¹⁷ Hibü bunyu maibü wekoa buhek maibü hekda; lausikei bun- yu amaibüa buhek amaibü hekda.

¹⁸ Bunyu maibüa buhek amaibü hekla athük, ayingsi bunyu amaibüa buhek maibü hekla athük.

¹⁹ Laobou bunyua ong lang maibü eheklaje kho akan koutida hoba wana jinda.

²⁰ Hibü haoeneibü langei kanei haoen shenlabü.

Ngei Kan Ladangkei Angekei

²¹ “Kü to, ‘Bunyubou, Bunyubou,’ dogo ngabü wekoei Khuthük Sangle to atla aying, lausikei aoei khuthüka kibü Bouei maangangbü tegü kümlaje, hao ong atlabü.

²² Kho chalou khünei juongnyuei kü to, ‘Bunyubou, Bunyubou, künei ka nyena ateten lo, hoba ka nyena shabü sou shian asatti lo, hoba ka nyena kümsilei yaangbü juong aküm lo?’ dogo laulabü.

²³ Kheijinei ngei haoen la ngetilabü, ‘Ngei kan ladangkei angekei; kan amaibü kümbü shuong kü ka kukashi.’

Chemdangbü Müt Nyi

²⁴ “Hibü aoei ong kü ngüh habü ho ditda, hoba jungeida, hao laang thüka chem dangbü songsihon kibü müt phatko kilabü.

²⁵ Hobaje lang loukei, hoba yungsen loukoukei, hoba yei soukei, hoba kho chem to jangkei hoba kho atuong, aieilausi kho laang thüka huongkei.

²⁶ Hobaje aoei ong kü ngüh habü ho ditda hoba ajungeida, hao phetsen thüka chem dangbü asangadobü müt phatko kilabü.

²⁷ Hobaje lang loukei, hoba yungsen loukoukei hoba yei soukei, hoba kho chem to jangkei, hoba kho tuongkei; hoba kho tuongbü kho yaang kikei.”

Jisueibü Hau

²⁸ Ladang Jisuei kho laukhümbei, noknyühei haoei lenbüa maangpangkei,

²⁹ aishanga haoei Ngühkhüm lenbou shuong tegü aying, lausikei sei kibü che tegü haoen la lenkei.