MATHI 4 - SAOPOBÜ LAI (BSI)

Jisu Takteibü

¹ Kheijinei Jisu Satanei takteila shanga Soushouei yamlamang to leilangkei.

² Saonyi nyet hoba saonyi you ashau ayungko paian phaia hao mühei nyengkei,

³ hoba takteibou louan hao to laukei, “No Mühghaü Shou yinga longa habü laang ho wentek la yeishi dogo lenshi.”

⁴ Lausikei haoei jongaikei, “Ho doakei, ‘Mütei wentekei ong aying, lausikei Mühghaüeibü sembung ka longbü ngühpem wekoei lang kilabü.’ ”

⁵ Kheijinei Satanei hao Saopobü Sangnyu to leilangkei, haoei hao Lembüchem khusunga settikei

⁶ hoba hao to laukei, “No Mühghaü Shou yingsije no lolo atetashi; aishanga ho doakei: ‘Haoei haoeibü hangangbü shuong la ka shanga ngühkhüm kulabü, hoba no laang chenei ongkei youa kühsi shanga haoenei no haoeneibü ikmanga tonlabü.’ ”

⁷ Jisuei hao to laukei, “Hokei doakei, ‘Nyi kaibü Bunyubou Mühghaü atakteilabü.’”

⁸ Tokei Satanei hao shongh suokbü to leijung angkei, hoba kaodak sangle hoba khübü soneikangbü pendou hao la shean lenkei;

⁹ hoba haoei hao to laukei, “Nyi kü to khüpetan lema longaje habü pendou ngei ka la kulabü.”

¹⁰ Kheijinei Jisuei hao to laukei, “Satashi, Satan! aiei ho doakei, ‘Nyi Bunyubou kaibü Mühghaü to lemlabü, hoba hao ong khangenlabü.’”

¹¹ Kheijinei Satanei hao apyokei, hoba khuthük hangangbü shuong louan hao to thuikei.

Jisu Galila Haoeibü Kümsilei Khangbü

¹² Ladang Bunyubouei Johan lapakei dogo ditkei hao Galil to ngaikei.

¹³ Hao Nazaret apyoan loukei hoba Zebulun si Naftali kaonyek, Kapernaum yungkoa kikei.

¹⁴ Kho Isaia thuseibü danko laubü ngüh ho loushedla yingan kiteikei,

¹⁵ “Zebulun kaodak hoba Naftali kaodak, yungnyu aenei lamkhonga, Jordan deikoa phangshuongeibü Galil!

¹⁶ “Nakthüha setan kibü mütshuongei ngesakbü yaang hapa, hoba haibü kaodak hoba yemekoubü phanga setan kibü shuong thükto ngesak kho longa.”

¹⁷ Kho jih ka jaüan Jisuei songlenkei hoba laukei, “Maangpon sepeiashi, aishanga Khuthük Sangle nyangko loua.”

Jisuei Ngau Lapbü Müt Lei Ngabü

¹⁸ Hao Galil yungkoa paiko kijinei haoei jaisinanyi, Peter nyenbou Simon hoba haona Andria sia tak tekko hapbei; aishanga haoen ngau lapbü shuong kiteikei.

¹⁹ Haoei haosi to laukei, “Kaiya, kü phai semshi, hoba ngei kasi müt lapbü la yeitilabü.”

²⁰ Kheijinei haosiei haoeneibü tak apyokei hoba hao phai sembei.

²¹ Ladang hao khüka satkei haoei Zededieibü shou jaisinanyi, Jakob si haona Johan, long chenei haosieibü bou Zebedi yoa lamleko hapbei; hoba haoei haosi ngakei.

²² Kheijinei haosiei long hoba haosieibü bou apyokei hoba hao phai sembei.

Jisuei Songlenbü hoba Maitibü

²³ Hao Galil danko, haoeneibü sinagoga lenko Mühghaü Sangle Ngühlang Maibü phinthonko, hoba mütshuong yoa shatsinyat hoba mousisou pendou maitiko haukei.

²⁴ Haoeibü ngühlang Siria pendoua nyakkei, hoba haoenei hao jungto shatsinyat phang phangei shatbü hoba khonkua kibü, shabü souei lapbü, auleshat hoba pheihaibü pendou sungbakei hoba haoei haoen maitikukei.

²⁵ Galil, Dekapoli, Jerusalem, Jihuda hoba Jordan ji aeka mütshang yaangbangei hao phai sembei.