MATHI 28 - SAOPOBÜ LAI (BSI)

Langngaibü

¹ Nounyet phaia, balea shaangbounyet lange saojinei, Mari Magdalin si lubü Mari heekhün to chühla loukei.

² Tou selo kaang nyikei; aishanga Bunyubou khuthük hangangbü khuthük ka louyenan laangdak kho khokan apbei hoba kho thüka setkei.

³ Hao chühla langpon tegü, hoba haoeibü neisimei ninthu tegü thupaian kikei.

⁴ Lombou shuong hao to hatbü ka lühkei hoba haibü tegü yeikei.

⁵ Kheijinei khuthük hangangbüei yaksa shuong to laukei, “Kan ai tehüt, Jisu ao peiseia thüngkei kanei hao lamda dogo ngei ngeakei.

⁶ Hao hanei aki; aishanga haoei laubü tegü hao langngaia. Kaiya, hao yepshang chühashi;

⁷ hoba tongde hauan hao eikshuong la lenashi, ‘Hao haibü ka langngaia; hoba hao kan to shaang Galil to hauda; kanei hao khünei haplabü. Chühashi, ngei kan la lena.’ ”

⁸ Haoen hatbü hoba olinbü ka hee ka tongde satkei, hoba haoeibü eikshuong la lenla laangjung haukei.

⁹ Mangde Jisu haoen thedanga lokei hoba laukei, “Maisho kishi!” Haoen louan haoeibü youa hatan hao lembei.

¹⁰ Kheijinei Jisuei haoen to laukei, “Tehüt. Hauan ngeibü jaisinasi shuong to Galil to hauashi dogo lenshi, hoba khünei haoenei ngo haplabü.”

Lombü shuongeibü Ngühlang

¹¹ Yaksa shuong lama hauko kitoua, lombü shuong atei sangnyu to louan ungshedbou shuong to ai ong haüthükkei pendou lenkei.

¹² Haoen jaishou shuong yoan kamshaian lauyoan phaia, haoenei sepai shuong la nam juong kuko

¹³ laukei, “ ‘Kün yepan kijinei, hao eikshuong nangnak louan hao sunglangkei’ dogo kanei lauashi.

¹⁴ Hobaje ho governorei dida longa künei hao suletlabü hoba kan maangmau ka püetlabü.”

¹⁵ Haoenei nam kho sungkei hoba haoen la lenbü tegü kümbei. Ho ngüh Jihudabü yoa tat sühko nyakko phinthonda.

Jisu Hao Eikshuong la Longan Lenbü

¹⁶ Eik Anthükche kho Galila kibü, Jisuei haoen la lenbü shongh to haukei.

¹⁷ Haoenei hao hapjinei hao lembei; lausikei atei toknokkei.

¹⁸ Jisu louan haoen to joyoko laukei, “Khuthüka hoba kaodaka sei pendou kü la kua.

¹⁹ Hibü, hauashi hoba phang pendou eik la yeitiashi. Bou, Shou hoba Soushou Saopobü nyena haoen baptikushi;

²⁰ ngei kan la ai ong sakkukei kho pendou jungeila haoen la lenashi; hoba chühashi, kaodak athon shongko ngo kan yoa ponpen yoakei.”