MATHI 27 - SAOPOBÜ LAI (BSI)

Jisu Pilat Jungto Leian Haubü

¹ Ladang lang ngekei, ungshedbou shuong hoba jaishou shuong pendouei Jisu haitila shanga hao khulimbo lauyokei;

² hoba haoenei hao khühkei, hoba leian hauan Pilat governor la khümbo meiko kuan apbei.

Judas Haibü

³ Ladang hao yakshaubou Judasei Jisu la shedbü kubü hapbei, hao jembü lolo maangpon sepeikei, hoba ungshedbou shuong si jaishou shuong jungto nam khujin kho sungbako laukei,

⁴ “Shedbü akibü müt che haitila yaakshaubü ka ngei shabü shona.” Lausikei haoenei laukei, “Hoei künla ai yingla? Kamaang leshi.”

⁵ Haoei lembü chema nam kho apyoan satkei, hoba hao satan jembü lolo phenetnyu haikei.

⁶ Ungshedbou shuongei nam kho jungan laukei, “Ho sii munam yingsije ho lembü chem namphot to jinjan aying.”

⁷ Haoenei lau- yoan khoei yensiau mang khünshang shanga chakyaüboueibü kao phoukei.

⁸ khoei tat sühko kho kao to Siieibü Sekphai dogo lauda.

⁹ Kheijinei Jeremia thuseibouei laubü ngüh kho loushedkei: “Israel shousi yoa atei laobou müt shangabü namngüm tetkei, kho namngün tetbü müteibü mu sempak khujin haoenei lekei,

¹⁰ hoba Bunyubouei kü la sakkubü tegü, haoenei kho chakyaüboueibü sekphai shanga kukei.”

Pilatei Jisu to Ngüh Phebü

¹¹ Jisu governor thedanga lotikei, hoba governorei hao to phekei, “No Jihudabü Choba sai?” Jisuei laukei, “Kho nyi lauda.”

¹² Ungshedbou shuong hoba jaishou shuongei hao yuktijinei haoei ai ajongai.

¹³ Kheijinei Pilatei hao to laukei, “Haoenei ka khu limbo aukabü lajuche sungbada kho nyi aditda lo?”

¹⁴ Lausikei haoei hao to ngühpem che ongkei ajongai, khoei governor aeibou maangpangkei.

Jisu Haibü

¹⁵ Kho lema, shuong la maangangbü thüngdang kabü che haoen la litikulabü kho governor song kikei.

¹⁶ Kheijinei Baraba nyenbü amaibü nyenshen che thüngdanga kiteikei.

¹⁷ Hibü haoen liko takshatan kijinei Pilatei haoen to laukei, “Ngei kan la ao litila kanei maangangda? Baraba si ayingsi Messia dogo laubou Jisu?”

¹⁸ Aishanga theshoubüei haoenei hao khümbo kukei dogo haoei ngekei.

¹⁹ Hao matjem setshanga setan kijinei haoyakei hao jungto hautiko laukei, “Ho shedbü akibü müt shanga nyi ai teküm aishanga ngo tat hao shangabüa mangha aeibou khonsaka.”

²⁰ Lausikei ungshedbou shuong si jaishou shuongei haoen shanga Baraba litian Jisu haitishi dogo lautila noknyüh suletkei.

²¹ Governorei haoen to jongaikei, “Khünyi yo ka ngei kan la ao litikula kanei maangangda?” Haoenei laukei, “Baraba.”

²² Pilatei haoen to laukei, “Khülonga Messia dogo laubou Jisu to ngei ai kümla?” Haoen pendouei laukei, “Hao peiseia thüngashi!”

²³ Haoei laukei, “Aila, haoei ai amaibü kümbei?” Lausikei haoenei aei aei kaangbou ngekko laukei, “Hao peiseia thüngashi!”

²⁴ Pilatei hao ngüh ai ühaüthük lausikei noknyüh pühnyintibü ong hapan, haoei dei sungbaan noknyüh thedanga ik sakko laukei, “Ho müt haibüa ngeibü onat aki. Kan maang leshi.”

²⁵ Müt pendouei jongaikei, “Hao sii kün thükto hoba kün shousi shuong thükto yingshi.”

²⁶ Kheijinei haoei haoen jungto Baraba litikei, lausikei haoei Jisu to sembei hoba peiseia thüngla khümbomeiko kukei.

Sepai shuongei Jisu Nyikubü

²⁷ Kheijinei governor sepai shuongei Jisu Choba chemto leian atkei; hoba sepai san pendou hao kaijembo kambei.

²⁸ Haoenei haoeibü nei khuokkei hoba hao la nakthüngle sakbü nei che neikukei;

²⁹ hoba jakei Choba khun che yikan haoeibü khua hankukei; hoba haoeibü mae ika liju che jungtikei; hoba haoenei hao thedanga khüpetan nyikuko laukei, “Jihudabü Choba, maisho kishi!”

³⁰ Haoenei hao to eokei thokkei, hoba liju kho soan haoeibü khu to ngümbei.

³¹ Haoenei hao la nyikuan phaia, hao ka nakthüngle sakbü nei kho sungngaikei hoba hao la jembü neisimei lekukei, hoba hao peiseia thüngla leilangkei.

Jisu Thüngbü

³² Haoen longjinei haoenei Simon nyenbü Kurinibü müt che hapbei. Haoenei hao la Jisueibü peisei pela jangkukei.

³³ Ladang haoen Golgotha, tetlabü, “Khulo kaoen” che to loukei,

³⁴ haoenei Jisu la ih khauekbü to kheian yungla kukei; lausikei haoei kho jepan chühan yungla asunglet.

³⁵ Haoenei hao peiseia thüngan phaia phaang pakko, haoeibü neisimei janan lekei;

³⁶ hoba haoen setan hao lombo kikei.

³⁷ Haoeibü khu thüka, “HO JIHUDABÜ CHOBA JISU” dogo doan thipbei.

³⁸ Kheijinei hao yoa kokbü müt nyi, che maenei hoba che nanaenei dogo thüngkei.

³⁹ Haubü ngaibü shuongei jembü khu ngomeiko hao to nyikuko

⁴⁰ laukei, “No Lembüchem leilutian chalou semnyeta danglabü mút, no lolo püetashi; no Mühghaü Shou longa peisei ka lotashi.”

⁴¹ Kho tegü ong ungshedbou shuongeikei, Ngühkhüm lenbou shuong si jaishou shuong yoa hao nyikuko laukei,

⁴² “Haoei mü püetkei; jembüje püetla athük. Hao Israelbü Choba yingkei! Tou hao peisei ka lotashi hoba künei hao to mailemlabü.

⁴³ Haoei Mühghaü to maanglembei; Mühghaüei hao to maangshikda longa, tou hao Mühghaüei napüeta; aishanga haoei, ‘Ngo Mühghaü Shou’ dogo laukei.”

⁴⁴ Hao yoa peiseia thüngbü kokbü shuongeikei kho tegütham hao to nyikukei.

Jisu Haibü

⁴⁵ Anthüknyi jih ka sem jih sühko kaodak khümboa nakthühkei.

⁴⁶ Sem jih thünga Jisuei ngüh yaangbüei ngekko laukei, “Eli, Eli, lema sabakthani?” kho tetlabü, “Kü Mühghaü, kü Mühghaü, aila nyi ngo apyokei?”

⁴⁷ Khünei loan kibü atei kho ditjinei laukei, “Haoei Elija ngada.”

⁴⁸ Haoen yoa müt cheei langjung hauan, od che sungbakei hoba kho haijepbüa haman phodong chenei lonan hao la yungla kukei.

⁴⁹ Lubü shuongei laukei, “Elija hao püetla loula si aloulaje senei chühkho.”

⁵⁰ Jisuei nyibou ngüh yaangbüei ngekkei hoba jembü soushou bangtikei.

⁵¹ Lembüchem thangtet nei kho thük ka koubü kaoa atko penyi la jitnyinkei, hoba selo nyikei, hoba laangdak shuong nyinkei,

⁵² hoba hee shuong ipbei hoba nyeket shibü saopobü mang juongnyu langngaitikei;

⁵³ hoba hao langngaian phaia haoen hee ka longkei hoba Saopobü Sangnyu to atan juong la haptikei.

⁵⁴ Saongao thükkabou, hoba hao yoa lombo kibü shuongei selonyibü hoba haüthükbü kümsilei shuong hapan aeibou hatkei. Haoenei laukei, “Maimaitham ho müt Mühghaü Shou yinga!”

⁵⁵ Yaksa shuong juong hebü ka chühko kikei. Haoen Galil ka Jisu phai sembei hoba hao to thuiyokei.

⁵⁶ Haoen yoa Mari Magdalin, Jakob si Josefeibü nyu Mari, hoba Zebedi shousi shuongeibü nyu yoan kikei.

Jisu Khünbü

⁵⁷ Chasem, Arimathia ka Josef nyenbü keibü müt che, haokei Jisu eik, khüto loukei.

⁵⁸ Hao Pilat jungto haukei hoba Jisueibü mang hikei. Kheijinei Pilatei kho kuan apla sakkukei.

⁵⁹ Josefei mang kho sungletkei hoba kho hinseibü nei inyaibüei shokei

⁶⁰ hoba haoei laang jakenan phobü jembü hee haanbüa kho phokei, hoba haoei hee koukhüna laang yaangbünyu thangan phoan satkei.

⁶¹ Mari Magdalin si lubü Mari heekou tangko setan kikei.

Heekhüna Lombü

⁶² Nyibounyet, kho Lamlebü chalou phainyet, ungshedbou shuong liko Pilat jungto loukei

⁶³ hoba laukei, “Yaangbou, ho yepeibouei, ‘Chalou semnyet kian ngo langngailabü’, dogo hao lang kijinei laubü künei damenda.

⁶⁴ Hibü sembounyet sühko hee lomla ngühkhüm kubüma, aingenyu hao eikshuong louan hao koklanglabü hoba mütshuong to, ‘Hao haibü ka langngaia’ dogo laulabü; hoba thonbou khüpsilang kho shaangbou tokei amaibou yinglabü.”

⁶⁵ Pilatei haoen to laukei, “Lombü leashi. Hauashi hoba hee kho kanei thükbü tegü lomtiashi.”

⁶⁶ Haoen haukei hoba lombü shuong thedanga laanga amaaphilabü shangjinan lomtikei.