MATHI 26 - SAOPOBÜ LAI (BSI)

Jisu Khulimbo Meimeibü

¹ Tou Jisuei khübü pendou lenkhüman phaia haoei hao eikshuong to laukei,

² “Chalou nyinyet phaia Püetbülem sühlanglabü dogo kanei ngekei, hoba Müteibü Shou peiseia thüngla khümbomeiko kuan aplabü.”

³ Kheijinei ungshedbou shuong hoba jaishou shuong, Kaifa nyenbü thükkabou ungshedbou khonga liko takshatkei

⁴ hoba haoenei huonei youei Jisu lapla hoba haitila chela ngühthang yenkei;

⁵ lausikei haoenei laukei, “Senei ho Lem jiha akümjan. Senei khei kümalonga mütshuong yoa pühnyinlabü.”

Jisu la Bethania Onang Naangkubü

⁶ Jisu Bethania Simon imbou chema kijinei,

⁷ yaksa cheei nam juongnyu mubü ponlem onang laang thungdou thupaibü che jungan hao jungto loukei, hoba hao shaushanga setan kijinei, saoei haoeibü khu to kho jinkukei.

⁸ Ladang eikshuongei kho hapbei haoen khauangkei hoba laukei, “Aila kho apsileda?

⁹ Kho juong lu yakan shalebü la kuenakei.”

¹⁰ Jisuei kho shuokan haoen to laukei, “Aila kanei yaksanyu khonsaktida? Saoei kü to kümsilei maibü kümda;

¹¹ aishanga shalebü kan yoa ponpen kilabü, lausikei kan yoa ngo ponpen akilabü.

¹² Saoei kü mang to onang jinkubü kho, ngo heea khünla saoei lamlekula shanga kümbei.

¹³ Ngühmaia ngei kan to lenda, kaodak pendoua lanei ong ho Ngühlangmaibü phinthonlaje, ho yaksaei kümbükei sao damenko laueilabü.”

Judasei Jisu Yakshaula Maangangbü

¹⁴ Kheijinei Anthüknyi yoa, Judas Iskhariot nyenbü che ungshedbü shuong jungto haukei,

¹⁵ hoba laukei, “Ngei kan la hao khümbo kualonga kanei kü la ai kula?” Hobaje haoenei hao la sempak khujin wean jinkukei.

¹⁶ Kho jih ka jaüan haoei haoen la khümbomeiko kuan aplabü hangsilam lambei.

Jisu Hao Eikshuong yoa Püetbü Lem Shaubü

¹⁷ Tokai ajinbü Wentek Lem khangnyet eikshuong Jisu jungto louan laukei, “Ka shanga Püetbü lem shaula nyi kün la lan lamletimang sühda?”

¹⁸ Haoei laukei, “Sangnyu to atan müt khüto lenshi: Lenbouei lauda, ‘Ngeibü tetletbü jihsiphai sühlangda. Kü eikshuong yoa ka chema Püetbülem kho shaukho.’”

¹⁹ Jisuei haoen to laubü tegü eikshuongei kümbei, hoba haoenei Püetbülem lamlekei.

²⁰ Ladang chasem sühkei, eik Anthüknyi yoa hao shaushang yungshanga setkei;

²¹ hoba haoen shauji yungjinei haoei haoen to laukei, “Ngühmaia ngei kan to lenda, kan yoa cheei ngo yaakshaulabü.”

²² Haoen aeibou maang ngangkei hoba hao to mütpem wekoei laukei, “Maimaitham, Bunyubou, kho ngo yinglao?”

²³ Haoei jongaikei, “Aoei kü phaua jembü ik hambei khoei ngo yaakshaulabü.

²⁴ Müteibü Shou, hao shanga Laishibaei laubü tegü satlabü, lausikei ao danko Müteibü Shou khümbo kuan apdaje kho müt shangaje ügütü! Kho müt shangaje hao abukko kibü maibou yingkhoulabü.”

²⁵ Hao yaakshaubou Judasei jongaikei, “Lenbou, kho ngo sai?” Haoei hao to laukei, “Nyi laua.”

Bunyubou Lem

²⁶ Haoen shauji yungjinei, Jisuei wentek sungkei, hoba haükukei, hoba shaknyinkei hoba kho eikshuong la kuko laukei, “Sungashi, shauashi; ho ngeibü mang.”

²⁷ Haoei thung che sungkei, nyensang kukei, hoba kho hao eikshuong la kuko laukei, “Kan pendouei haka yungashi;

²⁸ aishanga ho ngeibü thebülanbü sii laobou juongnyu shabü apla shanga koukei.

²⁹ Ngei kan to lenda, kan yoa ngei Kübou sanglea semlühdei haanbü ayungshongko tou ka jaüan ngei ho semlühdei ayunglabü.”

³⁰ Haoenei chia che lauan phaia Oliv Shongh to angkei.

Jisuei Peterei Athekulabü Tetenkubü

³¹ Kheijinei Jisuei haoen to laukei, “Tao kü to kan pendou phaiyetlabü, aishanga Laishibaei lauda, ‘Ngei sanlombou to ngümlabü, hoba sanshuong aalabü’;

³² lausikei ngo langngaian phaia kan to shaang ngo Galil to haulabü.”

³³ Peterei hao to jongaikei, “Pendou ka to phaiyetasikei, ngo ladangkei aphaiyetlabü.”

³⁴ Jisuei hao to laukei, “Ngühmaia ngei ka to lenda, tao aunak akoutoua nyi ngo semnei athekulabü.”

³⁵ Peterei hao to laukei, “Ngo ka yoa hailabü kiasi dogokei ngei no athekuko akilabü.” Eikshuongeikei pendouei khei laukei.

Jisuei Gethsemena Welaubü

³⁶ Kheijinei Jisu haoen yoa Gethsemen dogo laubü kaoen che to loukei, hoba haoei hao eikshuong to laukei, “Ngo thi ae hauan welaujinei kan hanei kiashi.”

³⁷ Haoei Peter hoba Zebedi shounyi hao yoa leikei, hoba maangto shatko aeibou khonkula khangkei.

³⁸ Kheijinei haoei haoen to laukei, “Kü soushou haila tegü shaleda. Kan hanei kishi hoba kü yoa pianleman kishi.”

³⁹ Hao thedang ae tuisho lian kaoa khüpetan welauko laukei, “Abou, ho thüklabü yingsije, ho thung kü ka kuktikai; khei yinga tegükei ngei maangangbü tegü aying, lausikei nyi maangangbü tegü yingshi.”

⁴⁰ Hao eikshuong jungto loukei hoba haoen yepan hapbei, hoba haoei Peter to laukei, “Kan yepakei lo! Kan aokei angh che kü yoa pianleman kila athükda lo?

⁴¹ Kan takteibüa üatetla pialemashi, hoba welauashi. Maimaitham soushouje maangdakda, lausikei phea hau aki.”

⁴² Tokei hao nyiboukei haukei hoba welauko laukei, “Abou, ho ngei ayungko nangkula athüklonga, kamaang leshi.”

⁴³ Hao longeikei hoba tokei yepan hapbei, aishanga haoen ngakbü ka nyek yuian kikei.

⁴⁴ Haoei haoen apyokei hoba hauan semboukei jeteibü ngüh lauko welaukei.

⁴⁵ Kheijinei hao eikshuong jungto louan haoen to laukei, “Kan tou sühko yepakei lo hoba haksoda lo? Chühashi, jih nyangko loua, hoba Müteibü Shou shabü shuong ikmang to khümbo kuan apa.

⁴⁶ Meimeiashi, hauakho. Chühashi, ngo yaakshaubou nyangbüa kia.”

Jisu Lapbü

⁴⁷ Haoei lauko kijinei Judas, Anthüknyi yoa che loukei; hoba hao yoa ungshedbou si jaishou shuongei hautibü mütshang yaangbü che in si juthep jungan loukei.

⁴⁸ Hao yaakshaubouei haoen la amaaphelabü che kuko laukei, “Ngei ao to sembung sheplaje kho hao; hao lapashi.”

⁴⁹ Hao Jisu jungto tangshaitham louan salem kuko laukei, “Lenbou”, hoba haoei hao to sembung shepbei.

⁵⁰ Jisuei hao to laukei, “Jena, no ai kümla loukeije kümashi.” Kheijinei haoen louan Jisu to ik shatko hao lapbei.

⁵¹ Jisu yoa kibü yoa cheei haoeibü ik shingan jembü in setenan thükkabou ungshedbou sambü che to wapbei, hoba haoeibü nou shipan apbukei.

⁵² Kheijinei Jisuei hao to laukei, “Kaibü in hao phoshang to ngaitiashi, aishanga aoyouei in jungeilaje haoen pendou inei shemlabü.

⁵³ Kübouei toukei kü jungto khuthük hangangbü hajar juong to aei hautilabü lele, ngei hao to sulajala athüklep dogo nyi damda sai?

⁵⁴ Khei yinga longa Laishiba laobou hai haijan dogo lauda, kho ailai loushadla?”

⁵⁵ Kheijinei Jisuei noknyüh to laukei, “Kanei kokbü khulimbo loubü tegütham in si juthep jungan ngo lapla louda lo? Lembüchema ngo chalou weko lenko setkei, lausikei kanei ngo alap.”

⁵⁶ Habü pendou thuseibü Laishiba loushedla haüthükkei. Kheijinei eikshuong pendouei hao apyokei hoba linkei.

Jisu Kambü Thedanga

⁵⁷ Haoenei Jisu lapbei hoba hao thükkabou ungshedbou Kaifa chemto leian haukei, lanei Ngühkhüm lenbou shuong si jaishou shuong liko takshatan kiteikei.

⁵⁸ Lausikei Peter thükkabou ungshedbou khong sühko hekoheko sembei; hoba atan thonbü ngela shanga lombou shuong yoa setkei.

⁵⁹ Ungshedbou shuong hoba Khukabü Kambü pendouei Jisu haitila shanga aukabü lambei,

⁶⁰ lausikei amlangbü aukabü juong louasikei haoenei aikei ühüp. Phaila müt nyi thedangto loukei

⁶¹ hoba laukei, “Ho mütei laukei, ‘Ngei Mühghaü Lembüchem kho leiluan chalou semnyeta dangla thükakei.’”

⁶² Thükkabou ungshedbou lokei hoba laukei, “Nyi ai ajongaida si? kakhu limbo haoenei ai aukabü sungbada?”

⁶³ Lausikei Jisuei ai ngüh üang. Thükkabou ungshedbouei hao to laukei, “Langkeibü Mühghaü nyen phongko ngei ka to thelet lanletko lauda, no Mühghaü Shou Khrista kho yingasi ayingje kü la lenbü.”

⁶⁴ Jisuei hao to laukei, “Nyi laua; lausikei ngei kan pendou la lenda, tou ka jaüan kanei Müteibü Shou Thükenbou Mühghaü mae aenei setan, hoba mühkabü sangmei thüka setan louyenko haplabü.”

⁶⁵ Kheijinei thükkabou ungshedbouei haoeibü nei jitnyinko laukei, “Haoei Mühghaü nyikubü laua. Sen shanga aukabü aei ai khamda? Chühashi, tou Mühghaü khulimbü laubü kanei dida.

⁶⁶ Kanei ai damda?” Haoenei laukei, “Hao shedakei, hao haijan.”

⁶⁷ Kheijinei haoenei haoeibü thenyek to eok thokkei, hoba hao to ipbei, hoba atei jembü ikei hao to ipbo,

⁶⁸ laukei, “Hai, Khrista, ka to ngümbou kho ao? Kün to seiei tetenan lenashi.”

Peterei Jisu Atheletbü

⁶⁹ Peter khonga setan kikei. Sambüsao che hao jungto louan laukei, “Nokei Galilbü Jisu yoa kiteikei.”

⁷⁰ Lausikei haoei haoen pendou thedanga athekuko laukei, “Nyi ai laudaje ngei angekei.”

⁷¹ Hao tangto angjinei lubü yaksa nashou cheei hao hapbei, hoba khonei kibü shuong to laukei, “Ho mütkei Nazaretbü Jisu yoa kikei.”

⁷² Haoei nyiboukei hao athekuko thelet lanletko laukei, “Müt kho ngei angekei.”

⁷³ Longche kian nyangko loan kibü shuong louan Peter to laukei, “Maimaitham nokei haoen yo kabü che ki, aishanga kaibü ngühangei no ao yingkeije lenda.”

⁷⁴ Kheijinei haoei khükkeiuokkei hoba thelet lanletko laukei, “Müt kho ngei angekei.” Khoyam aunakei koukei,

⁷⁵ hoba Jisuei, “Aunak mokoujinei nyi ngo semnei athekulabü,” dogo laubü ngüh kho Peterei damenkei. Hao satkei hoba kaang haapbei.