MATHI 25 - SAOPOBÜ LAI (BSI)

Medei Aneibü Ngühphatbü

¹ “Kheijinei Khuthük Sangle kho saosüngbü medei an wanthung jungan, chemkanbü shuokla haubü phatko kilabü.

² Haoen yoa ngao asangbü hoba ngao sangbüdobü kiteikei;

³ aishanga asangbü shuongei jembü wanthung jungkei lausikei wandei akün;

⁴ lausikei sangbüdobü shuongei jembü wanthung yoa lathunga wandei künkei.

⁵ Chemkanbou loula phaisije haoen pendou ngakkei hoba nyeket shikei.

⁶ “Lausikei metuphanga ngekko laukei, ‘Chemkanbou, chühashi! Hao to shuokyola hauashi.’

⁷ Kheijinei saosüngbü medei shuong pendou pienkei hoba jembü wanthung lamlekei.

⁸ Asangbü shuongei sangbüdobü shuong to laukei, ‘Kaneibü wandei ka kün la shijo jinbüma, aieilausi küneibü wanthung nyetda.’

⁹ Lausikei sangbüdobü shuongei jongaikei, ‘Kün shanga hoba kan shanga wandei souko akila thükkei. Kan yakbü shuong jungto haushi hoba kan shanga jekashi.’

¹⁰ Haoen jekla hauko kitoua chemkanbou lousühkei, hoba aoyou lamlean kiteikei haoen hao yoa chemkan lem to haukei, hoba kou khinngailangkei.

¹¹ “Phaila joubü saosüngbü medei shuongkei louan laukei, ‘Yaangbou, Yaangbou, kün la ipbü.’

¹² Lausikei haoei jongaikei, ‘Ngühmaia ngei kan to lenda, ngei kan angekei.’ ”

¹³ Hibü pianleman kishi, aieilausi kanei chalou ayingsi jih angekei.

Sambü Semeibü Ngühphatbü

¹⁴ “Ho müt cheei jembü sambü shuong ngashaian, jembü peisilei haoen la khümbo kuan lubü kaonyek to satbü phatkei;

¹⁵ che la haoei namsen ngao kukei, lubü che la nyi, hoba lubü che la che, dogo mütpem weko la luluei thükbü minbü thüng kukei hoba hao lubü kaonyek to satkei.

¹⁶ Namsen ngao sungletbouei tongde hauan khoei nam seikei hoba haoei namsen ngao pailetkei.

¹⁷ Jeteitham namsen nyi sungletbouei kei namsen nyi pailetkei.

¹⁸ Lausikei aoei che sungletkei haoei hauan kao thuan jembü bunyueibü nam huan phokei.

¹⁹ “Jihsiphai lounyu kian phaia khübü sambü shuongeibü bunyu loukei hoba haoen yoa we- yokei.

²⁰ Aoei namsen ngao sungletkei haoei tokei namsen ngao aeila sungbako laukei, ‘Yaangbou, nyi kü la namsen ngao kukei, chühashi, ngei namsen ngao aei paileda.’

²¹ Hao sambouei hao to laukei, ‘Thumai, maibü hoba maanglembü sambü! Peisilei shijo thüka ka to maanglemenkei; ngei no juongnyu thüka phokulabü. No kaibü chembubou olinbü to lotashi, kaiya.’

²² Aoei namsen nyi sungletkei haoeikei louan laukei, ‘Yaangbou, nyi kü la namsen nyi kukei. Chühashi, ngei namsen nyi aei paileda.’

²³ Hao sambouei hao to laukei, ‘Thumai, maibü hoba maanglembü sambü! Peisilei shijo thüka ka to maanglemenkei; ngei no juongnyu thüka phokulabü. No kaibü chembubou olinbü to lotashi, kaiya.’

²⁴ Lausikei aoei namsen che sungletkei hao louan laukei, ‘Yaangbou, ngei no ngekei; no kausakbü müt, nyi lan awen khüka latda, hoba nyi lan aphin khüka yoshaida.

²⁵ Ngo hatko kikei hoba hauan kaibü namsen kaoa hukei. Chühashi, kaibü hanei kia.’

²⁶ Hao sambouei hao to laukei, ‘No amaibü hoba haulohaushed sambü! Ngei ainei awen khüka latda, hoba ainei aphin khüka yoshaida, dogo nyi ngekei lo?

²⁷ Palongaje namthanbü dan la nyi kü nam kuan phokujan; hoba ladang ngo longeilaje künam yoa phopnam yoan hapmeikhoulabü.’

²⁸ Hao ka namsen kho sungashi hoba namsen an kibou la kuashi;

²⁹ aishanga aoei ki hao la aei kuyolabü, hoba haoei apsileko kilabü; lausikei aoei aki, haoei ai ki khokei hao ka langlabü.

³⁰ Lejim akibü sambü kho khongaenei nakthühbü kaoena apashi; khonei haapbü hoba hauh uyobü kilabü.”

Thonbü Matjem

³¹ “Ladang Müteibü Shou jembü soneikangbü hoba hao yoa khuthük hangangbü pendou louyenlaje, kheijinei hao jembü soneikangbü setshanga setlabü;

³² hoba phang pendou hao thedanga leisheilabü, hoba sanlombouei lon ka san pinyinbü tegü, haoei haoen che ka che pin- yinlabü,

³³ hoba haoei san shuong haoeibü mae aenei hoba lon shuong nanaenei pholabü.

³⁴ Kheijinei Chobaei haoeibü mae aenei kibü shuong to laulabü, ‘Kaiya, Kübouei haükubü shuong, kan shanga kaopakjinei thama lamlean phokubü sangle phet phanashi;

³⁵ aishanga ngo mühei haiko kikei hoba kanei kü la oknyinkei; ngo deilako kikei hoba kanei kü la inkei; ngo yenla lean kikei hoba kanei ngo leiyetkei;

³⁶ ngo mütkong kikei hoba kanei kü la neikukei; ngo shatko kikei hoba kanei ngo pean chühkei; ngo thüngdanga kikei hoba kan kü jungto loukei.’

³⁷ Kheijinei sao- pobü shuongei hao to jongaikei, ‘Bunyubou, ladang künei no mühei haiko hapan oknyinkei, ayingsi deilajinei inkei?

³⁸ Ladang künei no yenla lean hapan leiyetkei, ayingsi mütkong kian neikukei?

³⁹ Ladang künei no shatko hapan, ayingsi thüngdanga kian kajungto loukei?’

⁴⁰ Chobaei haoen to jongaikei, ‘Ngühmaia ngei kan to lenda, habü ngeibü jaisina hanboutham yoa che to ongkei, kanei ai kümbei, kho kanei kü shanga kümbei.’

⁴¹ Kheijinei haoei nanaenei kibü shuong to laulabü, ‘Kan shedsikhau baubü shuong, kü jungka kukashi, hoba Satan hoba haoeibü hangangbü shuong shanga thon akibü wan lamlean phobü khüto atashi;

⁴² aishanga ngo müh kikei hoba kanei aoknyin; ngo deilako kikei hoba kanei yungla aku;

⁴³ ngo yen la lean kikei hoba kanei ngo aleiyet; ngo mütkong kikei hoba kanei kü la aneiku, shatko hoba thüngdanga kikei hoba kanei ngo pean achüh.’

⁴⁴ Kheijinei haoeneikei jongailabü, ‘Bunyubou, ladang no mühei haiko, ayingsi deilako, ayingsi yen la lean ayingsi mütkong, ayingsi shatko, ayingsi thüngdanga hapbei, hoba künei ka to athui?’

⁴⁵ Kheijinei haoen to jongailabü, ‘Ngühmaia ngei kan to lenda, habü phangkabou shuong yoka che to ongkei kanei ai aküm, kho kanei kü shanga aküm.’

⁴⁶ Haoen thon akibü shieikoe to haulabü, lausikei sao- pobü shuong ponpen thon akibü langkei to haulabü.”