MATHI 24 - SAOPOBÜ LAI (BSI)

Jisuei Lembüchem Lusaklabü shangabü Laubü

¹ Jisu lembüchem ka longan hao jembü lam to hauko kijinei, hao eikshuong hao la lembüchem dangbü shean lenla loukei.

² Haoei haoen to jongaikei, “Kanei habü pendou hapdaoba lo? Ngühmaia ngei kan to lenda, hanei laang che thüka che tenan alusakko akilabü.”

Khonsak hoba Shieikoe

³ Hao Oliv shongha setan kijinei eikshuong sanshoua loukei hoba laukei, “Habü ladang loushedla, hoba no loubü hoba kaodak thonbü amaaphilabü ai yingla? Kün la lenbüma.”

⁴ Jisuei haoen to jongaikei, “Kan aolakei ayinglamto aleilangtila maangsangshi.

⁵ Aishanga müt juongei kü nyena, ‘Ngo Khrista’, dogo lauko loulabü, hoba haoenei juong ayinglam to leilanglabü.

⁶ Kanei wapyobü langh hoba wapyolabü ngühlang ditlabü. Kan amokla maangsangashi. Ho haüthükjan, lausikei thonbü tou aying.

⁷ Aishanga phangei phang khulimbo hoba sangleei sangle khulimbo lolabü, kaoen kaoena mühsinou hoba selonyibü kilabü.

⁸ Khübü pendou kho khonkula khangbü ki.

⁹ “Kheijinei haoenei kan khonsak haptila khümbo kulabü hoba haitilabü, hoba kü nyen laüa phang pendouei kan mangsenlabü.

¹⁰ Kheijinei juongnyu phaiyetlabü, cheei che khüpettilabü, cheei che mangsenyolabü,

¹¹ hoba amlangbü thuseibü juong longlabü hoba juongnyu ayinglam to leilanglabü;

¹² hoba ngühkhüm lulimbü pühabuba müt juongeibü sanou litham aplabü.

¹³ Lausikei aoei thonbü sühko natenlaje hao khümenlabü;

¹⁴ hoba ho Khuthük Sangle Ngühlangmaibü kaodak pendoua phang pendou to aukabü shanga songlenlabü, hoba kho phaia thonbü kho loulabü.

Mangsenlabü Leilubü

¹⁵ “Daniel thuseibüei laubü mangsenlabü ladang kanei sao- pobü kaoena loan haplaje (webouei shuokashi);

¹⁶ kheijinei Jihudaa aoyou ki shongh to satjan;

¹⁷ chemdaka kibou müt hao chem to peisilei sungla ayanjan;

¹⁸ hoba seka khüpbou müt jembü neisimei sungla angaijan.

¹⁹ Khübü chaloua mang akongbü hoba senyopbü yaksa shuong shanga ügütü!

²⁰ “Kan satyobü khamalüha ayingsi Nounyet ayingtila welauashi,

²¹ aishanga kheijinei khonsak khonku yaang kilabü, kaopak jih ka tou sühko ho tegübü akitei; hoba toukei akilabü.

²² Khübü chalou ka awemauku tegüje müt aokei akhümenkhoulabü; lausikei khümenbü dan laüa khübü chalou shuong tuitikulabü.

²³ Kho jiha müt atei kan to, ‘Chühashi, Khrista hanei kia,’ ayingsi ‘Khünei kia’ dogo laua longa maitelemma;

²⁴ aishanga amlangbü Khrista dan hoba amlangbü thuseibü dan longlabü, hoba thüka longa saopobü shuongkei ayinglam to leilangla shanga amaaphilabü yaang hoba maangpanglabü lenlabü.

²⁵ Chühashi ngei kan la thedangto tham lena.

²⁶ Hibü haoenei kan to, ‘Chühashi, hao yama kia’, dogo laua longa tohauma; ‘Chühashi, maangkabü popchema kia’ dogo lausi maitelemma;

²⁷ aishanga chaang aeka langpon khitsi chanep ae sühkokei lai hauda, kho tegütham Müteibü Shou loubü kilabü.

²⁸ Lanei ong haibü mang kilaje, khonei hogon shuong chela shaian kilabü.

Müteibü Shou Loubü

²⁹ “Habü khonsak khonku wanbüsi chanyu nakthühan aplabü, hoba litnyuei jembü ngesakbü akulabú, müh ka khanshoulitshou shuong atlabü, hoba mühkabü hau shuong nyaakeilabü.

³⁰ “Hobaje kheijinei müha Müteibü Shou amaaphilabü longlabü hoba kheijinei kaodak phang pendouei khüklangto jangngaiko haaplabü, hoba haoenei Müteibü Shou mühkabü sangmai si sei hoba soneikangbü yaanga loubü haplabü.

³¹ “Hobaje teklaang ngühlang yaangbüei haoei jembü khuthük hangangbü shuong hautilabü, hoba haoenei müh jithon ka jithon sühko kaophei lei ka jembü pienbü shuong leishailabü.

Bhuklong ka Ditletbü

³² “Bhuklong ka ngühphatbü che ditletashi. Ladang hao bhekshou alibü sapbo yik longda, kanei sulang nepa dogo ngekei.

³³ Hibü kaneikei khübü pendou hapjinei, Müteibü Shou nyangbüa, khei koukhüm junga kia dogo ngeshi.

³⁴ Ngühmaia ngei kan to lenda, habü pendou aloushad shongko ho meten adanlabü.

³⁵ Müh si kaodak dankhümlabü lausikei kü ngüh adankhümlabü.

Aoeikei Chalou si Jih Angekei

³⁶ “Lausikei ho chalou hoba jihsiphai shangabü khuthük hangangbü shuongeikei, ayingsi Shoueikei angekei. Bouei ong ngekei.

³⁷ Aishanga Noa meten ailai kiteikei, kho tegü Müteibü Shou loubü kilabü.

³⁸ Aishanga yungsen asühjinei, hoba Noa longchem to ütshongko, haoenei ailai shauko, yungko hoba laolam yaknga kuyoko kikei,

³⁹ hoba yungsen loukouan haoen pendou ohaulang shongko haoenei ange. Müteibü Shou loubü kho tegü kilabü.

⁴⁰ Kheijinei müt nyi seka khüpan kilabü, che leilanglabü hoba che apyolabü.

⁴¹ Yaksa nyi shem shiko kilabü; che leilanglabü hoba che apyolabü.

⁴² Pialemashi, aieilausi ai chaloua kaneibü Bunyubou loulaje kanei angekei.

⁴³ “Kanei ho ngeashi, chembubouei ai jihsiphaia kokbü loula kho ngea tegüje, haoei lombo kikhoulabü hoba haoei jembü chem teleilutikhoulabü.

⁴⁴ Hibü kankei lamlean kishi, aieilausi kanei adambü jih chenei Müteibü Shou loulabü.

Maanglanbü ayingsi Alanbü Sambü

⁴⁵ “Kholongaje chembubouei jembü sambü shuong la jih tetbüa shausiyung kula shanga haoen thüka ikjai letibou maanglemenbü hoba songsido kibü sambü kho ao?

⁴⁶ Haoeibü chembubou loujinei, sambü aoei khei kümbo haplaje, hao olinbou.

⁴⁷ Ngühmaia ngei kan to lenda, haoei kibü pendou thüka hao ikjai letilabü.

⁴⁸ Lausikei amaibü sambüei, ‘Ngeibü chembubou loula phaida’ dogo lauda,

⁴⁹ hoba haoeibü jenabou sambü shuong to ngümla khangda, hoba ihyungbü dan yoa shaula hoba yungla khangda,

⁵⁰ sambüeibü chembubou haoei adambü chalou chenei hoba haoei angebü jihsiphai chenei loulabü,

⁵¹ hoba hao netla yeiko jemnyinlabü hoba hao phejan hibüyoubü dan yoa janletkulabü. Khünei haapbü hoba hauh uyobü kilabü.”