MATHI 23 - SAOPOBÜ LAI (BSI)

Maangsanglabü Lenbü

¹ Kheijinei Jisuei noknyüh to hoba hao eikshuong to lenko,

² laukei, “Ngühkhüm lenbou shuong si Farisi shuong Mosa setshanga setda.

³ Hibü haoenei kan to ai ong lenlaje kümashi hoba jungeiashi; lausikei haoenei tegü kanei teküm, aishanga haoenei lauda hoba akümda.

⁴ Haoenei on atshaibü chela khühyoan müteibü phak to jinkuda, lausikei haoeneije khübü phonenla ikjishou ongkei topeimang asühda.

⁵ Haoeneibü kümsilei pendou mütei chühtila haoenei kümda. Aishanga haoenei saopobü shijimok yaangtida hoba neiyikshen loutida;

⁶ haoenei lemshou lemyaanga kaoen maibou hoba sinagoga thükkabou setshang,

⁷ namyakshanga salem mangsühda, hoba mütshuongei, Lenbou, dogo ngatimang sühda.

⁸ Lausikei kan to Lenbou dogo angatijan, aishanga kanei Lenbou che ki, hoba kan pendou jaisina.

⁹ Kaodaka aotokei kaneibü bou dogo tenga, aishanga kanei khuthüka Bou che ki.

¹⁰ Hobaje leiyeibou dogo tengati, aieilausi kanei Leiyeibou che, Khrista ki.

¹¹ Kan yoa pendou to yaangbou kho kan khangenbou yinglabü.

¹² Aoei jembü lolo yaanglaje hao hanlabü, hoba aoei jembü lolo hanlaje hao yaanglabü.

Jisuei Haoen Hibüyoubü Yuktibü

¹³ “Kan Ngühkhüm lenbou hoba Farisi, hibüyoubü shuong, ügütü! Kanei müt thedanga khuthük Sangle kou khinan apda; kan jembükei üetda, hoba atla haujembü shuongkei üettida.

¹⁴ (“Kan Ngühkhüm lenbou hoba Farisi hibüyoubü shuong, ügütü! Haptila shanga loubang welauko kiankei, kanei latnyu shuong chem suida; kho aoa kanei kayang yaangbou hapmeilabü.)

¹⁵ Kan Ngühkhüm lenbou, hoba Farisi hibüyoubü shuong, ügütü! Kanei müt che sepeitila shanga yungnyu si kaodak kaijembo paida; hoba hao khei yeijinei kanei hao kan to phejan nyiei aei kan tegü molowan shousi la yeitida.

¹⁶ “Kan nyekthubü lamleibü shuong, ‘Müt cheei lembü chem phongko thelet lanleda longa, kho ai aying; lausikei ao mütei lembü chem kabü hon nyen phongko thelet lanletlaje haoje asatenkei’, dogo lenbü shuong ügütü!

¹⁷ Kan ngoubü hoba nyekthubü dan! Laobou yaangkei, hon si, hon saüenbü la yeitibü lembü chem?

¹⁸ Tokei, ‘Müt cheei lemshon phongko thelet lanleda longa, kho ai aying; lausikei ao mütei kho thüka kibü jongsak nyen phongko thelet lanletlaje haoje asatenkei.’

¹⁹ Kan nyekthubü dan! Laobou yaangkei, jongsak si, jongsak saüenbü la yeitibou lemshon?

²⁰ Aoei lemshon phongko thelet lanletda, lemshon hoba kho thüka kibü pendou phongko thelet lanletda;

²¹ hoba aoei lembü chem phongko thelet lanletda, lembü chem hoba khonei kibou nyen phongko thelet lanletda;

²² hoba aoei khuthük phongko thelet lanletda, Mühghaü setshang hoba khonei setbou nyen phongko thelet lanletda.

²³ “Kan Ngühkhüm lenbou hoba Farisi, hibüyoubü shuong ügütü! Kanei shongen, hong- pangshou hoba shikmei maitibou an phejan kuda, hoba kanei Ngühkhüm kabü kongnyu shuong, khei; ngühmai, üeisanou, hoba mailem wailetda. Kanei habü küman kijan, hoba lubü khokei wailetan aphokujan.

²⁴ “Nyekthubü lamleibü dan, kanei shomesho ngaitian apda, lausikei utje suida!

²⁵ “Kan Ngühkhüm lenbou hoba Farisi, hibüyoubü shuong ügütü! Kanei thung si phau dangje samda, lausikei maangje ailamaiphop si athepetbü maangdühei shenettiakei.

²⁶ Nyekthubü Farisi, shaangla thung maang hiashi, khoei dangkei hinseilabü.

²⁷ “Kan Ngühkhüm lembou hoba Farisi hibüyoubü shuong, ügütü! Kan hee thupaibü phatakei, laobou dang chühla he maikei, lausikei maangje haibü shuongeibü losilak hoba asaopobüei shenan ki.

²⁸ Hibü kan kei müt thedanga saopobü tegü, lausikei maangje hibüyoubü hoba ngühkhüm lulimbüei shenan ki.

Jisuei Haoeneibü Kayang Tetenkubü

²⁹ “Kan Ngühkhüm lenbou hoba Farisi hibüyoubü shuong, ügütü! Kanei thuseibü shuongeibü hee kümda hoba saopobü shuongeibü hee chühjanko yaüda;

³⁰ hoba kanei lauda, ‘Kün pisibou metena kün kibü yingma, thuseibü shuong haitibüa haoen yoa kün teyokhoulabü.’

³¹ Hibü kanei jembü lolo kan thuseibü shuong haitibü shisishousi dogo aukabü kuda.

³² Khülongaje kan pisibouei püngkubü shemtiashi.

³³ Kan pinyu shousi shuong, kanei ailai molowan matjem ka satenla?

³⁴ Khoei ngei kan la thuseibü shuong, songngedonge shuong hoba Ngühkhüm lenbou shuong hautikuda. Haoen yoka kanei at haitilabü hoba peiseia thüngettilabü; haoen at kanei kaneibü sinagoga semeilabü, hoba sangnyu ka sangnyua sühko shieilabü;

³⁵ hoba kho laüa kaodaka saopobü sii phinbü pendou, khei ngühmaanglanbü Abel sii la jaüan kanei saoposhang si lemshon kanglanga haitibü Barakhia shou Zekharia siia sühko kan thük to shatlabü.

³⁶ Ngühmaia ngei kan to lenda, khübü pendou shangabü kayang ho meten thük to loulabü.”

Jisuei Jerusalem to Sanoubü

³⁷ “Jerusalem, Jerusalem, kan thuseibü haitibü hoba kan jungto hautibü dan laangei sonettibü shuong, aunyuei jembü shoushou shuong saoeibü kaakphanga yopbü tegü, ngei ladüngnei ka shousi shuong kü jungto leishaila haujembei, lausikei kanei amangsüh!

³⁸ Chühashi, kaneibü chem kan la kongkong apyokuda.

³⁹ Aishanga ngei kan to lenda, ‘Bunyubou nyena ao louda hao haülabü yingshi’, dogo alau shongko, tou ka jaüan kanei ngo ühüplaü.”