MATHI 20 - SAOPOBÜ LAI (BSI)

Semlühlaaka Khüpbü shuong

¹ “Khuthük Sangle sekbubou che haoeibü semlühlaaka khüptila shanga ngeyang ete eik lamla haubü phatkei.

² Haoei mulambü shuong to chaloua sempak che bang kula theyoan, haoei semlühlaak to haoen koutikei.

³ Hao ngeyang angh gü thünga haukei hoba lubü at ai kümlaleila akiko namyakshanga loan hapbei;

⁴ hoba haoei haoen to laukei, ‘Kankei semlühlaak to kouashi, hoba ngei kan la ai mulaje kho kulabü.’

⁵ Hobaje haoen koukei. Tokei hao chajihboua hoba chasemlamto sem thünga dogo haukei hoba jeteitham kümbei.

⁶ Angh ngao thünga hao haukei, hoba lubü shuong loan hapbei. Haoei haoen to laukei, ‘Kan hanei aila chaseko ai kümbo loda?’

⁷ Haoenei hao to laukei, ‘Aishanga kün aoeikei eik alam.’ Haoei haoen to laukei, ‘Kankei semlühlaak to kouashi.’

⁸ “Ladang chasem sühkei sekbunyuei haoeibü ikjaibou to laukei, ‘Kümbüleibü shuong ngaashi, hoba haoen phaibou ka khangan shaangboubü sühko la, jembü mu kuashi.’

⁹ Chasemlamto angh ngao jih thünga koutibü shuong loukei hoba haoen mütpem wekoei sempak che bang sungletkei.

¹⁰ Ladang shaang koutibü shuong loukei, haoenei aei haplabü dogo dambei; lausikei haoeneikei sempak che bang ong hapbei.

¹¹ Ladang haoenei kho hapbei haoenei sekbubou khulimbo nyamnyambo,

¹² laukei, ‘Habü phai loubü shuongei angh che ong kümbeileikei, hoba kün aoyouei chaseko hüko chanyuei juokbü natko khüpbei, nyi haoen kün to jeteitham yeitikei!’

¹³ “Haoei haoen yo kabü che to jongaikei, ‘Jena, ngei ka to aikei thechühbü akümda. Nyi kü to sempak che shanga atheyo lo?

¹⁴ Ka shangabü ai yingkeije kho sungashi hoba ngaiashi. Ho phaibou la ka to jetei kulabü kho kü maang yingkei.

¹⁵ Ngeibüei ngei kü maangleko kümjan aying lo? Ngo maangshikbü shanga nyi nyekto shatda sai?’

¹⁶ Hibü phaibü shuong shaanglabü hoba shaangbü shuong phailabü.”

Jisuei Hao Hailabü shangabü Semboula Lenbü

¹⁷ Jisu Jerusalem to angjinei, eikshuong anthüknyi kho ong hao yoa leikei, hoba lama haoei haoen to laukei,

¹⁸ “Ditashi, sen Jerusalem to angda, hoba Müteibü Shou ungshedbou shuong hoba Ngühkhüm lenbou shuong ik to khümbo kuan aplabü. Haoenei hao haitila shedbü kulabü,

¹⁹ hoba nyikulabü, semlabü hoba peiseia thünglabü shanga küksithang ikmang to khümbo kuan aplabü, hoba hao sembounyet langngailabü.”

Nyu cheei Subüjabü

²⁰ Kheijinei Zebedi shou nyieibü nyu jembü shounyi yoa hao jungto louan, hao lembo, hao to denche sukeijakei.

²¹ Haoei sao to laukei, “Nyi ai mangsühda?” Saoei hao to laukei, “Habü kü shounyi, ka Sanglea kaibü mae aenei che hoba nanaenei che settila sakkuashi.”

²² Jisuei haoen to laukei, “Kanei ai phedaje kho kanei angekei. Ngei tou yungla kibü thung kho kanei yungenlep lo?” Haoenei hao to laukei, “Künei thükakei.”

²³ Haoei haoen to laukei, “Maimaitham kü thung ka yunglabü, lausikei kü mae aenei hoba nanaenei settila khoje ngei kulabü ji; lausikei Kübouei kho aoyou shanga lamlekei khübü shangabü ki.”

²⁴ Ladang an khoei ditkei, haoenei jaisinanyi khüto mang- pokkei.

²⁵ Lausikei Jisuei haoen ngakei hoba laukei, “Küksithang songdakbü shuongei haoen thüka bunyu yeida, hoba haoeneibü yaangbü shuongei haoen thüka hau jungeida, kho kanei ngekei.

²⁶ Kan yoaje khei ayinglabü, lausikei kan yoa aoei yaangmang sühda, hao kan khangenbou yingjan,

²⁷ hoba kan yoa ao shaangmang sühda, hao kaneibü aao yingjan.

²⁸ Kho tegütham Müteibü Shou khangentila ji, lausikei khangenla, hoba juongnyu angla jembü langkei kula loukei.”

Jisuei Nyekthubü Müt Nyi Maitibü

²⁹ Haoenei Jerikho apyojinei mütshang yaang haophai sembei.

³⁰ Lamkoa setan kibü nyekthubü müt nyiei Jisu danko ditan ngekko laukei, “Dawid Shou Yaangbou, küsi to onoukai!”

³¹ “Alemenko kiashi” dogo noknyühei haosi to hakkei, lausikei haosiei aei kaangbou ngekkei, “Dawid Shou Yaangbou, küsi to onoukai!”

³² Hibü Jisuei sangsembo loan, haosi ngako laukei, “Ngei kasi shanga ai kümtimang sühda?”

³³ Haosiei hao to laukei, “Yaangbou, küsieibü nyek iptikumang sühda.”

³⁴ Jisuei sanouko dambei hoba haosieibü nyek to meitikei. Kheijinei haosiei hapbei hoba haophai sembei.