MATHI 2 - SAOPOBÜ LAI (BSI)

Chaang Aeka Pean Chühbü shuong

¹ Ladang Herod Choba jiha Bethlehema Jisu bukkei, Jerusalem to chaang aeka songngedongebü shuong louan

² phekei, “Jihudabüeibü haanbü bukbü Choba kho lanei ki? Aishanga künei haoeibü khanshoulitshou longan hapbei hoba kün hao to lemla louda.”

³ Ladang Herod Chobaei kho ditkei, hao hoba hao yoa kibü Jerusalem kabü mütshuong pendou phenyembei.

⁴ Haoei ungshed jaishou shuong, Ngühkhüm lenbou shuong hoba mütshuong pendou huishaian Messia kho lanei buklabü kije kho haoen ka phekei.

⁵ Haoenei hao to laukei, “Jihuda kabü Bethlehema, aieilausi thuseibü danko ho doakei:

⁶ ‘No Jihuda kaoa Bethlehem, no Jihuda kabü songdakbü yoa ai hangeilameikei hanbouthamje aying, aishanga ka mütli Israel songdakla ka ka leiyeibü che longlabü.’”

⁷ Kheijinei Herodei huphangshoua songngedongebü shuong ngakei hoba khanshoulitshou kho ladang longkei kho shangashatko haoen ka ditletla haujembei.

⁸ Haoei haoen Bethlehem to hai lauko hautikei, “Hauashi, hoba nashou shangabü kho maangsangko pheashi, hoba ladang kanei hao haplaje ngeikei louan hao to lemlabü lele kütokei lenshi.”

⁹ Chobaei lenbü kho ditan haoen bangkei, hoba khanshoulitshou laobou haoenei longjineithama hapbei, kho haoen nashou kibü kaoen sühlangan athak shongko haoen thedanga haukei.

¹⁰ Ladang haoenei khanshoulitshou kho hapbei haoen olinbüei shenkei;

¹¹ hoba haoen chem to atkei hoba nashou kho haonyu Mari yoa hapbei. Haoen kaoa khüpetkei hoba hao to lembei, hoba haoeneibü neimok sengan haoenei hao la hon, ponlem hibü hoba jen jongsak la kukei.

¹² Haoen Herod jungto angaila shanga mangha lenkei hoba haoeneibü kaonyek to lubü lam aeka ngaitikei.

Ijep to Satetlangbü

¹³ Ladang haoen ungkei Bunyubou hangangbüei Josef la mangha longan lenkei, “Pienashi, shou hoba haonyu leiashi, hoba Ijep to satashi, hoba ngei ka la alenngai shongko khünei kiashi, aishanga Herodei nashou kho haitila lameida.”

¹⁴ Hao pikei, hoba shou si nyu ham leian metu- phanga Ijep to satkei,

¹⁵ hoba Herod ühai shongko khünei kikei, kho thuseibü danko ai laukei kho loushedlabü lele, “Ijep ka ngei kü shou ngaankei.”

Nashou Hanbü shuong Haitibü

¹⁶ Ladang Herodei songngedongebü shuongei hao huonettia dogo ngekei, hao aeibou khau angkei, hoba haoei songngedongebü shuong ka ditletbü jihsiphai ka tetenbü tegü haoei hautian, Bethlehem hoba kho kaijembo kibü kabü po nyi kanglang kabü nashou pendou haitikei.

¹⁷ Kheijinei Jeremia thuseibü danko ai lenkei kho loushedkei,

¹⁸ “Ramaa manghaapbü hoba haapyoweyobü yaang ditkei; Rachelei jembü shousi shanga haapbo, hoba maang athonenko kikei; aieilausi haoen akitei.”

Ijep Ka Longeibü

¹⁹ Herod haijinei Ijepa Josef la Bunyubou hangangbü mangha hai lauko longan

²⁰ lenkei, “Pienashi, na hoba haonyu leiashi, hoba Israel kaodak to hauashi, aishanga aoyouei nashou kho haitila lameikei haoen haikhüma.”

²¹ Hao pikei, shou si nyu ham leikei, hoba Israel kaodak to haukei.

²² Ladang haoei Arkheloei Jihuda thüka haobou Herod Choba jeila songdakda dogo ditkei, hao khüto ngaila hatkei, hoba mangha lenan hao Galil kaodak to ngaikei.

²³ Hao haukei hoba Nazaret dogo nyenbü sangnyu chenei kikei, kho ai thuseibü danko hai lenan ki kho loushedtila kiteikei: “Hao to Nazaretbü dogo laulabü.”