MATHI 19 - SAOPOBÜ LAI (BSI)

Bangbü Shangabü Jisuei Lenbü

¹ Ladang Jisuei khübü ngühlau thonkei, haoei Galil apyojung Jordan thidanga kibü Jihuda kaophei to loukei.

² Mütshang yaang haophai sembei, hoba haoei haoen khünei maitikei.

³ Farisi shuong hao jungto louan hao huonko phekei, “Bousuei den che shanga jembü yak sattijan sai?”

⁴ Haoei jongaikei, “Püngla khangla Kümbouei khunak shousi bousu si yaksa kümbei,

⁵ hoba haoei laukei, ‘Ho shangabüa bousuei haobou si haonyu apyolabü hoba haoyak to phenyoan kilabü, hoba ham chela yeilabü’ dogo kanei awe lo?

⁶ Hibü penyi aying lausikei che. Hibü Mühghaüei ai chela shenyotia kho mütei abangtijan.”

⁷ Haoenei hao to laukei, “Khülongaje satlabü le kuan sattiashi dogo aila Mosaei sakkukei?”

⁸ Haoei haoen to laukei, “Kan maangpon kaangbü khoei Mosaei kan la jembü yak bangtila sakkukei; lausikei püngla khanglaje khei akitei.

⁹ Ngei kan to lenda, asangalanbü to liman, aoyouei jembüyak sattian lubü yaksa lelaje, haoei asangalanbü shonda.”

¹⁰ Hao eikshuongei hao to laukei, “Bousu jembü yak to kheinyu phenyoan ki yingalonga, chem akanbü ong khaibou.”

¹¹ Haoei haoen to laukei, “Mudonga aoyou la Mühghaüei kuan ki khübü to liman laubü ho pendouei thamje asungletenda;

¹² aishanga atje nyusema sungphatan bukbü müt kia, atje mütei sungphatbü kia, hoba atje Khuthük Sangle laüa jembü lolo sungphatbü la yeibü kia. Aoei thüklaje haoei lenbü ho sungletashi.”

Jisuei Nashou Hanbü shuong Haükubü

¹³ Kheijinei hao ikei shangan welautila shanga nashou hanbü shuong hao jungto leibakei; lausikei haoen leibabü shuong to eikshuongei kaang hakkei.

¹⁴ Lausikei Jisuei laukei, “Nashou hanbü shuong pho- yoashi. Haoen kü jungto loubü tethanget, aishanga Khuthük Sangle habü tegübü shangabü ki.”

¹⁵ Haoei haoen to ikei shangkei hoba hao bangkei.

Keibü Heshoubou

¹⁶ Müt che loukei hoba hao to laukei, “Lenbou, ponpen langkei hapla shanga ngei ai maibü kümla?”

¹⁷ Haoei hao to laukei, “Ai maibü ki kho shangabü aila nyi kü to pheda? Maibüje che ong ki. No langkei to atmang sühalonga ngühkhüm shuong jungeiashi.”

¹⁸ Haoei hao to laukei, “Laobou?” Jisuei laukei, “Nyi ühaitijan, Nyi asangalanbü ashonjan, Nyi akokjan, Nyi amlangbü aukabü akujan,

¹⁹ Kabou si kanyu soumo hatashi; hoba Nyi kalepbou to jembü tegü sanoujan.”

²⁰ Heshoubouei hao to laukei, “Khübü pendou ngei jungeiakei; ngo toukei aiei aonkei?”

²¹ Jisuei hao to laukei, “No penbüsoubü yeimang sühsije, hauashi, nyi kibü yakashi, hoba shalebü la kuashi hoba khuthüka kaibü nyaksinam kilabü; hoba kaiya, hoba küphai semashi.”

²² Lausikei ladang heshoubouei kho laubü ditkei, hao ngangko ngaikei; aishanga haoei nyaksinam juong kikei.

²³ Jisuei hao eikshuong to laukei, “Ngühmaia ngei kan to lenda, keibü shuong shanga Khuthük Sangle to atla seklabü.

²⁴ Nyiboukei ngei kan to lenda, keibü mütei Khuthük Sangle to atlabü toje nidku khün danko ut shetlangbü sobou.”

²⁵ Eikshuongei kho ditjinei haoen aeibou maangpangkei hoba laukei, “Khülonga ao ong khümenla?”

²⁶ Jisuei haoen to chühkei hoba laukei, “Ho müt shanga athükaminlabü, lausikei Mühghaüei pendou thükkei.”

²⁷ Kheijinei Peterei laukei, “Kün shangabü lai? Künei pendou apyoan kaphai sembei. Khülonga künei ai hapla?”

²⁸ Jisuei haoen to laukei, “Ngühmaia ngei kan to lenda, Haanbü sanglea ladang Müteibü Shou jembü soneikangbü setshanga setlaje, kheijinei kan küphai sembü shuongei Israel phang anthüknyi mat jembo, setshang anthüknyia setlabü.

²⁹ Tokei, aoyouei chem yingasikei, jaisina yingasikei, nousina yingasikei, bou yingasikei, nyu yingasikei, shousi yingasikei, sekphai yingasikei kü nyen laüa apyoa, haoei saongao onko haplabü, hoba ponpen langkei phet phanlabü.

³⁰ Lausikei shaangbü dan juong phailabü, hoba phaibü dan juong shaanglabü.”