MATHI 18 - SAOPOBÜ LAI (BSI)

Ao Yaangbou?

¹ Kho jihsiphaia eikshuong Jisu jungto louan laukei, “Khülongaje Khuthük sanglea ao yaangbou?”

² Haoei hao jungto nashou hanbü che ngabaan haoen thedanga phoyokei,

³ hoba laukei, “Ngühmaia ngei kan to lenda, kanei sepeian nashou hanbü shuong tegü ayei longaje, kan Khuthük Sangle to üetenlabü.

⁴ Hibü ho nashou hanbü tegü aoei jembü lulo eaaoa yeilaje, hao Khuthük sanglea yaangbou.

⁵ Kü nyena aoei ho tegübü nashou hanbü che sungletlaje haoei ngo sungletda.

Shabüa Takteibü

⁶ “Lausikei kü to mailembü habü hanbü shuong yoa che ongkei aoei phaiyettilaje, hao shangaje ngünbü laang che ngüma yakan simaang haübüa shemetnyu haibü khaibou.

⁷ Mütshuong mailema phaiyettibü longtilabü kibü shanga kaodak to ügütü! Khübü haüthüklabü hang, lausikei ao danko khübü haüthüklaje kho müt shanga ügütü!

⁸ “Ka ik ayingsi ka youei no phaiyettia longa, kho ka ka wetan apashi. Ik nyi ayingsi you nyi yeman thon akibü wan to lapan attikhoulabü toje yousi ik sian ayingsi so kean langkeishang to atbü ka shanga maibou.

⁹ Hobaje ka nyekei no phaiyettia longa kho ka ka phekan apashi. Nyeklang nyi yeman molowan to lapan attikhoulabü toje, nyek che yeman langkeishang to atbü ka shanga maibou.

Maubü San Ngühphatbü

¹⁰ “Habü hanbü shuong yoka tetche ongkei aweasüngko ajungeila maangsangashi, aishanga ngei kan to lenda, khuthüka haoeneibü khuthük hangangbü shuongei ponpendou khuthüka kibü Kübou the hapda.

¹¹ (Aishanga Müteibü Shou mauan kibü khümenla loukei.)

¹² “Kanei ai damda? Müt cheei san saongao kisije hoba khübü yoka che ayinglamto sadalonga, haoei san anjinngaoto gü kho shongha apyoan ayinglamto haubü maubü che kho lamla ohaulep lo?

¹³ Hobaje haoei kho hapsije, ngühmaia ngei kan to lenda, ayinglam to asatbü san anjinngaoto gü toje ho shanga bouje haoei aei olinda.

¹⁴ Kho tegü habü hanbü shuong yo ka che ongkei mautila khuthüka kibü kaneibü Bouei maangüangda.

Shabü Shonbü Jaisina Che

¹⁵ “Kaibü jaisinaei ka khulimbo shabü shonalonga, hauashi hoba hao to sanshoua hakashi. Haoei ka to ditkua longaje nyi kaibü jaisina paileda.

¹⁶ Haoei aditku longa, ngühsidei pendou aukabü sembung nyi ayingsi semei jemlabü yingsije, ka yoa lubü müt che ayingsi nyi leiyoan hauashi.

¹⁷ Haoei haoen to aditku longa lashong to lenshi; hoba haoei lashong tokei aditku longaje hao kho küksithang ayingsi khüm hebü che tegü jungeishi.

Thangetbü hoba Sakkubü

¹⁸ “Ngühmaia ngei kan to lenda, kanei ai ong kaodaka khühlaje kho khuthüka khühlabü hoba kanei ai ong kaodaka sakkulaje kho khuthüka sakkulabü.

¹⁹ “Tokei ngei kan to lenda, kanei subüjabü denche shangabü kaodaka kan müt nyi maangpon chela lesije, kho khuthüka kibü Kübouei kan shanga kümbulabü;

²⁰ Aishanga lan nyi ayingsi sem kü nyena kamakei khünei ngo haoen yoa kia.”

Ap Akubü Sambü Ngühphatbü

²¹ Kheijinei Peter louan hao to phekei, “Bunyubou, kü jaisinaei kü khulimbo shabü shonalonga, ngei hao la ladüngnei ap kula? Nyetnei sühko sai?”

²² Jisuei hao to laukei, “Nyetnei sühko dogo ngei ka to telenkho, lausikei, Anjinleinei nyet sühko.”

²³ “Hibü, Khuthük Sangle kho Choba cheei jembü sambü shuong yoa nam weyobü phatkei.

²⁴ Ladang haoei weyola khangkei namsen hajar an thebou che hao jungto leibakei.

²⁵ Lausikei kula akisije, hao hoba haoyak, hoba shousi shuong, hoba haoei kibü pendou yakla hoba sanghshemla haoeibü Chobaei sakkukei.

²⁶ “Hibü sambüei hao thedanga khüpetkei hoba lembo laukei, ‘Kü to haisühkai, hoba ngei ka la khümbo shemlabü.’

²⁷ Khonei sambüeibü Chobaei hao to sanoukei hoba hao litikei hoba hao la sangh kho apbukei.

²⁸ Lausikei kho sambü kho khuong to angan, hao la sempak saongao thebü jenabou sambü che haüyokei. Haoei hao lapbei hoba sangloua nyatan laukei, ‘Nyi thebü kho labükai.’

²⁹ Hibü hao jenabou sambüei khüpetan hao to sukojako laukei, ‘Kü to haisühkai, hoba ngei ka la shemlabü.’

³⁰ Lausikei haoei adit, hoba haoei shemla thebü pendou adekhüm shongko hao thüngdang to lapan jinkei.

³¹ Ladang hao jenabou sambü shuongei kho kümbü hapbei, haoen aeibou maangto shatkei, hoba haoeneibü Choba jungto louan haüthükbü pendou wanan lenkei.

³² Kheijinei haoeibü Chobaei hao ngabaan hao to laukei, ‘No sambü amaibü, nyi subüjabü ka ngei ka la sangh pendou apbukei.

³³ Yingalonga, ngei ka to lai onoukei, nyikei kheishou ka jenabou sambü to onoujan aying lo?

³⁴ Kheijinei haoeibü Choba aeibou khauangkei hoba haoeibü sangh khümbo adekhüm shongko, khonkutibou ikmangto hao khümbomeiko kuan apbei.’

³⁵ Hibü kan mütpem wekoei jembü jaisina la maangpon ka ap akulonga, khuthüka kibü Küboueikei kho tegü kan to jungeilabü.”