MATHI 17 - SAOPOBÜ LAI (BSI)

Sonjeibü

¹ Chalou laknyet kian phaia Jisuei Peter, hoba Jakob, hoba haona Johan shongh suokbü che to leijung angkei.

² Hobaje hao haoen thedanga son jeian apbei; hoba haoeibü thenyek chanyu tegü haukei, hoba haoeibü neisimei ngesakbü tegü thupaian yeikei.

³ Hobaje hao to joyoko Mosa hoba Elija haoen junga louphambei.

⁴ Kheijinei Peterei Jisu to laukei, “Bunyubou, sen han maian kioua! Nyi maang- angsije ngei hanei dip sem lekho: ka shanga che, hoba Masa shanga che hoba Elija shanga che.”

⁵ Haoei lautoua lailaibü sangmei cheei haoen yuklepbei, hoba sangmei ka ngüh cheei laukei, “Ho ngei sanoubü Jayangshou, ao to ngei maangshikda; kanei hao to ditashi.”

⁶ Ladang eikshuongei kho ditkei, haoenei the khüman khüpetkei hoba aeibou hatkei.

⁷ Jisu louan haoen to meitiko laukei, “Pienashi; tehüt!”

⁸ Haoenei chühangtikei hoba Jisu to liman lubü aokei akitei.

⁹ Haoen shongh ka louyenjinei Jisuei haoen to sakkuko laukei, “Müteibü Shou haibü ka alangngai shongko kanei hapbü ho aotokei telen.”

¹⁰ Eikshuongei hao to phekei, “Aila Ngühkhüm lenbou shuongei Elija shaang loujan dogo lauda?”

¹¹ Haoei jongaikei, “Elija maimaitham loulabü hoba ajanjan pendou lamlean phokulabü.

¹² Lausikei ngei kan to lenda, Elija louan apa, hoba haoenei hao ashen, lausikei haoenei hao to haoen maangangbü tegü kümbei. Kho tegütham Müteibü Shou haoen ikmanga khonkulabü.”

¹³ Kheijinei eikshuongei haoei haoen to Johan Baptibou shangabü laukei dogo ditenkei.

Jisuei Shabü Souei Lapbü Nashou Che Maitibü

¹⁴ Ladang haoen shuong yoa sühlangkei, müt che hao jungto louan khüpetkei

¹⁵ hoba laukei, “Yaangbou, kü shou to onoukei, aieilausi hao to auleshat bauakei hoba khonkuda; hao hanghangko wanmang to hoba deimang to tomatlangda.

¹⁶ Ngei hao ka eikshuong jungto leibakei lausikei haoenei hao amaitien.”

¹⁷ Jisuei jongaikei, “Kan maialembü hoba ayingbü meten! Ngo lalokche kan yoa kila? Ngei kan to lalokche natenla? Hao hato kü jungto leiba.”

¹⁸ Jisuei shabü sou to kaang hakkei, hoba shabü sou hao ka longkei hoba nashou kho kheijineithama maian apbei.

¹⁹ Eikshuong Jisu jungto sanshoua loukei hoba laukei, “Künei kho aiei shian asattien?”

²⁰ Haoei haoen to laukei, “Aieilausi kaneibü mailem yongko hanbü ka; aishanga ngühmaia ngei kan to lenda, kan to mailem yongkoshiklang tetche ongkei kisije, kanei shongh khüto, ‘Haka khüto kukashi,’ dogo laulabü, hoba kho kuklabü; kan shanga athükaminlabü ai akilabü.

²¹ (Haibüje lubüei aying, lausikei welau si nyengbüei ong sattida.)”

Jisuei Hao Hailabü Shangabü Nyibou Laubü

²² Haoen Galila kijinei, Jisuei haoen to laukei, “Müteibü Shou mütshuongeibü ikmanga khümbo kuan aplabü.

²³ Haoenei hao haitilabü, hoba sembounyet hao langngailabü.” Hobaje haoen aeibou maang ngangkei.

Lembüchema Khümnam Atbü

²⁴ Ladang haoen Kapernaum to loukei, lembüchem khümnam hebü shuong Peter jungto louan laukei, “Kaneibü lenbouei lembüchem khümnam atda lao?”

²⁵ Haoei laukei, “Atda.” Ladang hao chem to lotkei Jisuei shaang laukei, “Simon, nyi ai damda? Kaodak Choba shuongei khümnam ka ao leda? Haoen shousi ka si küksithang ka?”

²⁶ Haoei jongaikei, “Küksithang ka.” Jisuei hao to laukei, “Khülongaje shousi kho solo.

²⁷ Lausikei senei hebütakbü shuong aphaiyettilabü, hibü yungnyu to hauashi, yaüjin attiashi hoba shaang minbü ngau kho sungenashi; hoba khoeibü sembung kekan chühashi hoba nyi sempak che haplabü. Kho jungan hauan seti shanga atashi.”