MATHI 15 - SAOPOBÜ LAI (BSI)

Pisibou shuong Lenbü

¹ Kheijinei Farisi hoba Ngühkhüm lenbou shuong Jerusalem ka Jisu jungto louan laukei,

² “Aila ka eikshuongei jaishou shuongeibü tetbütabü ngühli lulimda? Aishanga shauji yungjinei haoenei ik asakda.”

³ Jisuei haoen to jongaikei, “Kaneikei aila kaneibü tetbütabü laüa Mühghaü ngühkhüm lulimda?

⁴ Aishanga Mühghaüei lauakei, ‘Kabou si kanyu soumo hatashi,’ hoba, ‘Aoei bou ayingsi nyu amaibü laueilaje hao haiphangphang.’

⁵ Lausikei kanei lauda, ‘Müt cheei haobou ayingsi nyu to: Ngei kasi shanga jungeila tetbü nam pendou Mühghaü la kula saüenan apa’, dogo laua longa,

⁶ haoei touje haobou la soumo akuda. Hibü kaneibü tetbütabü laüa Mühghaü ngüh amlangbü la yeida.

⁷ Hibüyoubü shuong, Isaiaei kan shangabü hainyu tükde tetenkei,

⁸ ‘Habü mütshuongei haoeneibü sembungei kü to soumo hatda, lausikei haoeneibü maangpon kü ka lounyu heakei.

⁹ Haoeneibü lenbü tegü haoenei müt ngüh lensije, haoenei amlangbüa ngo lemda!’ ”

Müt che Shatibü Peisilei

¹⁰ Jisuei noknyüh hao jungto ngaan laukei, “Ditashi hoba ditenashi.

¹¹ Sembung to ai atda khoei müt shatida ji; lausikei ai sembung ka longda khoei hao shatida.”

¹² Eikshuong louan hao to laukei, “Nyi laubü ngüh ditjinei Farisi shuong maangto shatda dogo nyi ngekeilao?”

¹³ Haoei jongaikei, “Ai kesiong ong khuthük kabü Kübouei ake kho pheian aplabü.

¹⁴ Haoen khei apyoashi. Haoen nyekthubü lamleibü dan. Nyekthubü cheei lubü che leia longa ham kuokkhünto atetlabü.”

¹⁵ Peterei hao to jongaikei, “Kün la kho ngüh- phatbü wanenkukai.”

¹⁶ Haoei laukei, “Kaneikei tou sühko aditenda lo?

¹⁷ Ai ong sembung to atdaje kho shiang to atan apshang to danda dogo kanei aditenda lo?

¹⁸ Lausikei ai sembung ka angda kho maangpon ka longda, hoba khoei müt shatida.

¹⁹ Aishanga maangpon ka amaibü dambü, müt haitibü, asangalan, pejapela, kokbü, amlangbü aukabü hoba mü nyikubü longda.

²⁰ Khübüei müt shatida, lausikei ik asakko shaubüei müt ashatida.”

Yaksa cheeibü Mailem

²¹ Jisuei kho kaoen apyokei hoba Tair si Sidon kaopheia sühlangkei.

²² Kho kaonyek ka loubü Kanan sao cheei ngekko laukei, “Dawid shou, Yaangbou, kü to onoukai. Kü shou nouyangshou shabü souei aeibou khonkutiko kia.”

²³ Lausikei haoei sao to ajongai. Hao eikshuong louan hao to, “Saoei sen phainei ngekdang ledabü sao ngaitishi” dogo pheko laukei.

²⁴ Haoei jongaikei, “Israel phang maubü sanshuong jungto ong ngo hautikei.”

²⁵ Lausikei sao louan hao thedanga lembo laukei, “Yaangbou, kü to thuikai.”

²⁶ Haoei jongaikei, “Shousieibü shausiyung sungbaan kei thedanga apjan aying.”

²⁷ Saoei laukei, “Tükde, Yaangbou; lausikei kei shuongeikei jembü bunyu khümsok ka atbü netshouje shauda.”

²⁸ Kheijinei Jisuei yaksanyu to laukei, “Ka mailem latetche yaangkei! Nyi mangsühbü tegü ka to kümlabü.” Hobaje saoeibü nouyangshou kho kho jih ka thama maian apbei.

Jisuei Müt Juongnyu Maitikubü

²⁹ Jisuei kho kaoen apyokei hoba Galil yungnyu ae haukei; hoba hao shongh che to angkei hoba khonei setkei.

³⁰ Hobaje sokebü, nyekthubü, ngoubü, yousi- iksibü, hoba lubü juongnyu yoa shuong yaang hao jungto loukei, hoba haoen haoeibü you junga phoyokukei, hoba haoei haoen maitikukei.

³¹ Ladang haoenei ngoubüei joyoko, yousi-iksibü maian, sokebü paiko, hoba nyekthubüei hapbo hapbei noknyüh maangpangkei. Hobaje haoenei Israel Mühghaü la soneikangbü kukei.

Jisuei Müt Hajar Lei Oknyinbü

³² Jisuei hao eikshuong hao jungto ngaan laukei, “Ngei noknyüh shanga aeibou sanouko dambuda, aishanga haoen touje kü yoa chalou sem yinga hoba shaula ai aki. Ngei haoen müh ngaitimang asühda. Haoen lama nyengan shemla thükkei.”

³³ Eikshuongei hao to laukei, “Sen sangliphang kaoena yingkei. Künei laka mütshang hatetche phottilabü wentek hapla?”

³⁴ Jisuei haoen to laukei, “Kanei wentek ladüng ki?” Haoenei laukei, “Pem nyet, hoba ngau shijo.”

³⁵ Haoei noknyüh kaoa setla sakkukei.

³⁶ Haoei wentek nyet hoba ngau jungkei. Kho phaia haoei Mühghaü la nyensang kuko shaknyinkei hoba khübü kho eikshuong la kukei, hoba eikshuongei noknyüh la kukei.

³⁷ Haoenei photko shaukei; hoba haoenei netshou joubü kam nyet shenko heshaikei.

³⁸ Yaksa shuong si nashousi shuong aweko kho shaubü shuong kho bousu hajar lei kiteikei.

³⁹ Haoei noknyüh lintian long che to atkei hoba Magadan kaophei to haukei.