MATHI 12 - SAOPOBÜ LAI (BSI)

Nounyet shangabü Pheyobü

¹ Kho jihsiphaia Jisu Nounyet youshou laak danko haukei. Hobaje hao eikshuong mühei haikei, hoba haoenei youman yetan nyaila khangkei.

² Ladang Farisibüei kho hapbei, haoenei hao to laukei, “Chühashi! Ka eikshuongei Nounyet Ngühkhüm lulimda.”

³ Haoei haoen to laukei, “Dawid hoba haoyou jambü shuong mühei haijinei haoei ai kümbei kanei awe lo?

⁴ Hao Mühghaü chem to atkei hoba Mühghaü thedanga phobü Wentek, laobou ungshedbou to liman lubüei shaujan aying, kho haoei sungkei hoba shaukei hoba haoyou jambü shuong la kukei.

⁵ Ayingsi Nounyet lembüchema kibü ungshedbü shuongei Nounyet lai shatida hoba haoen to shedbü aki, kho kanei Ngühkhüma wean achüh lo?

⁶ Ngei kan to lenda, khei lembüchem to yaangbou che han kia.

⁷ Kanei ‘Ngei lembü ayingko üeisanou mangsühda’ dogo laubü ngühtet ngea tegüje, kanei ashedbü müt la shedbü tekukhoulabü.

⁸ Aishanga Müteibü Shou kho Nounyeteibü Bunyubou ki.”

Iksibü Müt Che

⁹ Haoei kho apyokei hoba sinagog to haukei.

¹⁰ Hobaje ik phei haibü müt che khünei kiteikei, hoba haoenei hao attila shanga Jisu to pheko laukei, “Nounyet maitijan sai?”

¹¹ Jisuei haoen to laukei, “Tetlabüei kan müt cheeibü san Nounyet püngkhün to atetakei. Khülongaje haoei kho hatan asenenlep lo?

¹² Yinga longa san che to müt lai khaibou! Hibü Nounyet maibü kümjan.”

¹³ Kheijinei haoei müt khüto laukei, “Ka ik shingashi.” Haoei shingkei hoba kho maikei hoba ji aedang tegü yeikei.

¹⁴ Lausikei Farisi shuong khong to angkei, hoba haoenei hao lai mautila hao khulimbo huon takkei.

Mühghaüeibü Pienbü Sambü

¹⁵ Hobaje Jisuei kho ngekei hoba khüka kukkei. Müt juongei hao phai sembei hoba haoen pendou maitikukei.

¹⁶ Hao shangabü angetila shanga haoei haoen kaangkosekko shingekkei.

¹⁷ Kho Isaia thuseibüei laubü ngüh loushedla yingan kiteikei,

¹⁸ “Ngei pienbü kü khangenbou, ngei sanoubü Che, ao to ngo maanghaida. Ngei hao thüka kü soushou phokulabü, hoba küksithang to haoei matjembü lenlabü.

¹⁹ Haoei aoyolabü ayingsi angeklabü; ayingsi khongnyua aoeikei hao ngüh aditlabü.

²⁰ Haoei matjembü kho thükenbü to asungba shongko, haoei naknyinan kibü thakdu che ongkei angoktilabü.

²¹ Hobaje hao nyena Küksithang shuongei maanglemlabü.”

Jisu hoba Beelzebul

²² Kheijinei hao jungto shabü souei lapbü, nyekthubü ngoubü müt che leibakei; hoba haoei maitikusije, ngoubou khoei ngüh laukei hoba nyekei hapbei.

²³ Hobaje noknyüh pendou mokde apyokei hoba laukei, “Ho müt Dawid shou yinglep si?”

²⁴ Lausikei ladang Farisibü shuongei kho ditkei, haoenei laukei, “Ho mütei lubü ayingko shabü sou shuong Choba Beelzebul jungeiko shabü sou shuong shian sattida.”

²⁵ Hobaje haoeneibü dambü ngean Jisuei haoen to laukei, “Jembü khulimbo janyinbü sangle pendou lusakan apda, hoba laobou sangnyu ayingsi chemdang jembü khulimbo janyinlaje loan akilabü.

²⁶ Satanei Satan shian sattia longa, haoei jembü khulimbo janyinda; khülongaje kho sangle lai lola?

²⁷ Hobaje ngei shabü sou shuong shian sattila Beelzebul jungeia longa, kan mütshuongei ao jungeiko khübü shian sattida? Hibü haoen kaneibü matjembou yinglabü.

²⁸ Lausikei ngei Mühghaü Soushouei shabü sou shuong shian sattisije, maimaitham Mühghaü Sangle kan jungto louakei.

²⁹ Ayingsi müt cheei shaangla hau kibou müt khühan apho longa, haoei lai küman hau kibou chem khüto atan haoeibü peisilei sola? Kheijinei ong haoei haoen ka koklang solanglabü.

³⁰ Müt che kho kü yoa akilonga hao kü khu limbo ki, hoba müt cheei ngeibü sanshuong yoshaila athui longa haoei khübü lintida.

³¹ Kho aoa ngei kan to lenda, shabü hoba nyikubü pendou mütshuong la amai apbulabü; lausikei Soushou khulimbo nyikubü üpbulabü.

³² Hobaje aoei Müteibü Shou khulimbo ngüh laulaje, kho hao la apbulabü; lausikei aoyouei Soushou Saopobü khulimbo laulaje, ho kaodaka yingasikei, loulabü kaodaka yingasikei kho hao la üpbulabü.

Bunyu hoba khoeibü Hek

³³ “Bunyu maia longa khoeibü hek kho maibü yinglabü; hoba bunyu amaibü yinga longaje khoeibü hek kho amaibü yinglabü. Aishanga bunyu che kho jembü hekei shenda.

³⁴ Kan pinyu shousi shuong, kan amainyu lai maibü lauenla? Aishanga aiei maangpon shenko ki kho sembungei lauda.

³⁵ Müt maibüei jembüei kibü maibü ka peisilei maibü sungenda.

³⁶ Hobaje ngei kan to lenda, mütei ai jim akibü ngüh ong anglaje, haoei kho ngüh shangabü matjemnyet jongailabü.

³⁷ Aishanga ka ngühei no tanglabü, hoba ka ngühei no shedlabü.”

Seikümseilei Hibü

³⁸ Kheijinei Ngühkhüm lenbou hoba Farisi shuong atei hao to laukei, “Lenbou, künei ka ka amaaphelabü che hapmang sühda.”

³⁹ Lausikei haoei haoen to jongaikei, “Amaibü hoba maang alemenbü metenei amaaphelabü lamda, hoba Jona thuseibou to liman ho meten la amaaphilabü aikei akulabü.

⁴⁰ Aishanga Jona chalou sem hoba langyang sem ngau yaangbü shimunga kibü tegü, Müteibü Shoukei chalou sem hoba langyang sem kaomanga kilabü.

⁴¹ Ninevibü ho meten yoa matjemshanga lolabü, hoba ho meten yuktilabü, aieilausi songlensi haoen maangpon sepeikei; lausikei Jona to yaangbou che hanei kia.

⁴² Yungthang Chobasaoei ho meten shuong yoa matjemshanga lolabü, hoba ho meten attilabü, aieilausi saoei thonbü kaodak ka Solomon songsihon to ditla loukei; lausikei Solomon to yaangbou che hanei kia.

Shabü Sou Longeibü

⁴³ “Ladang müt che ka shabü sou che longan apda, haksoshang lambo ulangbü danko satda hoba kho ühüpda.

⁴⁴ Kheijinei khoei lauda, ‘Kü chem lao ka ngo longkei, khüto ngo sepeijung ngailabü.’

⁴⁵ Kheijinei hao ngaida hoba hao to amaibü lubü soushou nyet leian atda, hoba haoen khonei kida; hoba kho müt thonbü thu kho shaangbou thu to amaibou yeida. Hibü ho amaibü meten shangakei khei kilabü.”

Jisueibü Nyu hoba Nasishuong

⁴⁶ Hao tokei noknyüh to joyoko kitoua, haonyu si haonasi shuong hao to joyomang sühko tanga loan kikei.

⁴⁷ Hao to, “Kanyu si kanasi shuong tanga loakei, hoba haoenei ka to joyomang sühda” dogo laukei.

⁴⁸ Lausikei hao to lenbou müt to haoei jongaikei, “Künyu ao, hoba künasi shuong aoyou?”

⁴⁹ Hobaje Jisuei hao eikshuong aeto haoeibü ik shean litiko laukei, “Künyu si künasi shuong hanei kia.

⁵⁰ Aishanga aoyouei khuthüka kibou Kübouei maangangbü kümda, hao kho küna bousubou, küna yaksanyu hoba künyu ki.”