MATHI 10 - SAOPOBÜ LAI (BSI)

Eik Anthüknyi

¹ Hobaje haoei eik Anthüknyi hao jungto ngakei, hoba hauan shian sattila shanga shabü sou shuong thüka sei hoba shatsinyat phang pendou hoba shatbü phang pendou maitikulabü sei haoen la kukei.

² Tou hangangbü Anthüknyieibü nyen kho habü ho ki: shaangbou kho Peter dogo laubou Simon, hoba haona Andria, Zebedi shou Jakob, hoba haona Johan;

³ Filip hoba Bartholoma; Thoma hoba khüm hebou Mathi; Alfia shou Jakob, hoba Thadia;

⁴ Kananbü Simon, hoba Judas Iskhariot, aoei hao khümbo kukei.

Anthüknyieibü Songlen

⁵ Khübü Anthüknyi Jisuei hautikei, hoba haoen la sakkuko laukei, “Küksithang lam aitokei tohau, hoba Samariabü sangnyu aitokei tüt;

⁶ lausikei Israel phang maubü sanshuong jungto hauashi.

⁷ Hobaje kan haujinei, ‘Mühghaü Sangle nyangko lousüha’ dogo phinthonashi.

⁸ Shatbü maitiashi, haibü shuong langngaitiashi, imbü saüenkuashi, shabü sou shuong shian sattiashi; kanei amlang hapbei, amlang kuashi.

⁹ “Kaneibü shijimoka hon ayingsi chandinam, ayingsi poisa tekün;

¹⁰ kaneibü wakou shanga nyingkou ayingsi mangsho nyi, ayingsi nguok, ayingsi ju tekün; aieilausi kümbouei shausiyung hapla mubü.

¹¹ Hobaje ai sangnyu ayingsi sangto ong kan atlaje, kan sühtimang sühbü kilaoje pheashi; hoba kan asatshongko khünei thüngashi.

¹² Hobaje kan khüto atjinei ‘Salem’ dogo laushi;

¹³ hoba chema kibü shuongei kan sungleta longa kaneibü hakso haoen thükto loutiashi; lausikei haoenei asunglet longa, kaneibü hakso kan jungto sepeitiashi.

¹⁴ Hobaje aoyouei ong kan asungletlaje, ayingsi kaneibü ngüh aditlaje, kanei kho chem ayingsi sangnyu ka longjinei kaneibü you ka thamngu kangan apashi.

¹⁵ Ngühmaia ngei kan to lenda, matjembü chaloua kho sangnyu toje Sodom si Gomora thu to natenbou yinglabü.”

Loulabü Shieikoe

¹⁶ “Chühashi, ngei kan sho shuong yoto sanshuong tegü hautida. Hibü kan pinyu tegü songsihon kishi hoba dukutuk tegü maanglan yingshi.

¹⁷ Lausikei mütshuong shanga maangsangashi; aishanga haoenei kan matjemshang to khümbomeiko kulabü, hoba haoeneibü sinagoga haoenei kan to ngümlabü;

¹⁸ hoba kan kü laüa governor hoba Choba shuong thedanga haoen hoba phangshuong to aukabü künla shanga leian haulabü.

¹⁹ Lausikei ladang haoenei kan khümbomeiko kulaje, kanei lai laula ayingsi ai laula maang temau; aishanga kanei ai laula kho jihsiphaiatham kan la kulabü.

²⁰ Aishanga laubou kho kan ji, lausikei kaneibü Bou Soushouei kan danko lauda.

²¹ “Hobaje jaisinaei jaisina, hoba bouei haoshou, haitila khümbo kulabü; hoba shousi shuongei nyusibou khulimbo meimeilabü, hoba haoen haitilabü.

²² Hobaje kü nyen laüa müt pendouei kan mangsenlabü; lausikei aoei thon sühko natenlaje hao ong khümenlabü.

²³ Lausikei ladang haoenei kan sangnyu chenei shieikoelaje, nyiboubü to satashi, aishanga ngühmaia ngei kan to lenda, Müteibü Shou aloushongko, kanei Israel sangshuong apekhümbo kilabü.

²⁴ “Lenbou to eik thükkabou ji, ayingsi bunyu to sambü thükkabou ji.

²⁵ Eikei jembü lenbou tegü kia longa, hao shanga khoei soua, hoba sambüei jembü bunyu tegü kia longa hao shanga khoei soua. Mütshuongei jembü bou to Belzebub dogo lausije, hao chema kibü shuong to latetche yaangbou anyikula!

Aoto Hatjan

²⁶ “Hibü haoen to tehüt. Aishanga tang akhithlabü lele aikei küplepan aki, hoba angeenlabü lele aikei huan aki.

²⁷ Nakthüha ngei kan to lenda, kho kanei changea laushi; hoba kaneibü noukhüna ai hangsho lauda, kho chemdaka ngeklabü.

²⁸ Hobaje aoyouei mang haitida, lausikei soushou haitila athük, haoen to tehüt. Aeiko Mühghaü, aoei soushou si mang ham molowana mautila thükkei, hao to ong hatashi.

²⁹ Aunyingshishou nyi poisa che lu ayaakda lo? Khei yingasikei khübü che ongkei kaneibü Bouei angeko kaoa üatda.

³⁰ Kaneibü khua khulou mangkei pendou weenakei.

³¹ Hibü tehüt; aunyingshishou juong tokei kan khaibou!

Khrista Theletbü hoba Inletbü

³² “Hibü aoyouei ong müt thedanga ngo theletlaje, khuthüka kibü Kübou thedanga ngeikei hao theletlabü.

³³ Lausikei aoyouei müt thedanga ngo atheletlaje, khuthüka kibü Kübou thedanga ngeikei hao atheletlabü.

Sangmai ji, Lausikei In

³⁴ “Kaodaka sangmai longtila ngo loukei dogo tedam; sangmai aying lausikei in longtila ngo loukei.

³⁵ Aishanga müt cheei jembü bou khulimbo, hoba nouyangshouei jembü nyu khulimbo, hoba shoueibü yakei laoeibü nyu khulimbo meimeitila ngo loukei;

³⁶ hoba müt cheeibü dangbou shuong kho haoeibü jembü chem- pen shuong kilabü.

³⁷ “Aoei jembü bou ayingsi nyu kü to aei sanoulaje hao kü shanga mubü aying; hoba aoei jayangshou ayingsi nouyangshou kü to aei sanoulaje hao kü shanga mubü aying.

³⁸ Hobaje aoei jembü peisei pean küphai asemda, hao kü shanga mubü aying.

³⁹ Aoei jembü langkei hapda kho maulabü, hoba aoei kü shanga jembü langkei mauda kho hapmeilabü.

Pailetbü

⁴⁰ “Aoei kan sungletda haoei ngo sungletda, hoba aoei ngo sungletda haoei ngo hautibou sungletda.

⁴¹ Aoei thuseibü che thuseibü nyena sungletda thuseibü pailetbü haplabü, hoba aoei saopobü müt che saopobü müt nyena sungletda saopobü müt pailetbü haplabü.

⁴² Ngühmaia ngei kan to lenda, aoei habü hanbü shuong yoa che la ongkei eik nyena deisang thung che inlaje, hao pailletbüei akonglabü.”