MARK 9 - SAOPOBÜ LAI (BSI)

¹ Haoei haoen to laukei, “Ngühmaia ngei kan to lenda, hanei loan kibü yoa atei Mühghaü Sangle seia loubü ühüpshongko haibü jepan achühlabü.”

Son Jeibü

² Chalou lak danan phaia Jisuei Peter, Jakob hoba Johan leikei hoba shongh suokbü che to haoen ong leian angkei. Hao haoen thedanga son jeileikei

³ hoba haoeibü neisimei kaodaka neisakbü aoeikei thupaian ayeitienlabü lele, aeibou thupaibü hoba lailaitham yeikei.

⁴ Haoen jungto Elija si Mosa longkei, hoba haosi Jisu to joyoko kikei.

⁵ Peterei Jisu to laukei, “Lenbou sen hanei kila lai maikei? Senei hanei dip sem, ka shanga che, Mosa shanga che hoba Elija shanga che dogo lekho.”

⁶ Ai laulaje haoei ange, aishanga haoen aicheküman hatyokei.

⁷ Hobaje sangmei che lotkei hoba haoen küplepbei, hoba sangmei ka ngüh che longkei, “Ho ngei sanoubü hoba jayangshou ki; hao to ditashi.”

⁸ Kheijinei haoenei kaijembo chühkei hoba haoen yoa Jisu to liman aokei ühüp.

⁹ Haoen shongh ka louyenjinei, Müteibü Shou haibü ka alangngei shongko, haoenei ai hapbei kho aolakei telen dogo haoei haoen to ngühkhüm kuko lenkei.

¹⁰ Hobaje lenbü haoenei amaako, haian langngaibü kho ai ngühtet yingkei dogo pheyokei.

¹¹ Haoenei hao to phekei, “Aila Ngühkhüm lenbou shuongei Elija shaang loulabü dogo lauda?”

¹² Haoei haoen to laukei, “Maimaitham Elija shaang louda hoba ajanjan pendou yentian phoda; hoba aila, hao aeibou khonkulabü hoba aweasüngko jungeilabü, dogo Müteibü Shou shangabü Laishibaei lenda?

¹³ Lausikei ngei kan to lenda khei Elija loua, hoba Laishibaei lenan kibü tegütham, haoenei hao to haoenei jungeimaang sühbü tegü jungeikei.”

Jisuei Shabü Sou kibü Nashou Che Maitibü

¹⁴ Ladang haoen eikshuong jungto loukei, haoenei mütshang yaangei haoen kaijeman hoba Ngühkhüm lenbou shuongei haoen to wetyo lauyoko hapbei.

¹⁵ Ladang haoenei hao hapbei noknyüh pendouei hao jungto langjung hauan hao la salem kukei.

¹⁶ Haoei haoen to phekei, “Kanei haoen to aishanga wetyoda?”

¹⁷ Noknyüh yoka müt cheei jongaikei, “Lenbou, ngei küshou ka jungto leibakei; hao to ngoutibü sou kia.

¹⁸ Hoei lanei ong hao laplaje, hao thopbolakko yeitida. Haoei sembung ka uokjok ongtida, haoeibü hauh uyoda hoba shingetnyu aptida. Ngei kaibü eikshuong to kho shian sattikula phekei, lausikei haoenei athük.”

¹⁹ Jisuei haoen to jongaikei, “Kan maialembü meten! Ngo kan yoa lalokche kila? Ngei kan to lalokche natenla? Hao kü jungto leiba.”

²⁰ Haoenei hao Jisu jungto leibakei. Ladang souei hao hapbei, haoei khoyam nashoubou kho aicheküman pheteitikei, hoba hao sembung ka uokjok ongko kaoa tuongkei hoba lekeikei.

²¹ Jisuei haobou to phekei, “Hao to ho haüthükbü phaia lalokche?” Haoei laukei, “Nashoudangathama,

²² hoba hoei hao wanmang to si deimang to tomjung attiko haitila haujema. Lausikei nyi thükalonga kün to onouko dencheje kümbushi hoba kün to thuikai.”

²³ Jisuei hao to laukei, “Nyi thükalonga, dogo se! Aoei mailemda, hao shanga pendou thüklabü.”

²⁴ Kheijinei shoueibü bouei ngekkei, “Ngei mailemda. Kü mailem soubü ayinglonga kü to thuikai.”

²⁵ Ladang Jisuei mütshang hao jungto langyoko louko hapbei, haoei shabü sou to ngühkhüm kuko laukei, “No ngoubü hoba obangbü sou, ngei no hao ka longan apla ngühkhüm kuda hoba ladangkei hao to nyibou la tütngai.”

²⁶ Kheijinei haoei ngekkei, hao kaang pheteitikei hoba longan apbei. Hao haibü mang tegü yeikei, hibü haoen juongbouei hao maimaitham haia dogo laukei.

²⁷ Lausikei Jisuei hao ik a hatan phonenkei; hoba hao loenkei.

²⁸ Ladang hao chem to loukei, hao eikshuongei hao to sanshoua phekei, “Aila künei kho shian asattien?”

²⁹ Haoei haoen to laukei, “Haibüje welau to limanje aieikei shian asattien.”

Jisuei Hao Hailabü shanga Nyiboula Lenbü

³⁰ Haoei kho kaoen apyokei hoba Galil danjung haukei. Haoei aolakei ngetimang asüh,

³¹ aishanga haoei hao eikshuong to lenko kikei. Haoei haoen to laukei, “Müteibü Shou khunakshousi ikmangto khümbo kua. Haoenei hao haitilabü, hoba ladang hao haitilaje hao chalou sem phaia langngailabü.”

³² Haoenei lenbü kho aditen hoba hao to phelakei jemtenkei.

Ao Yaangkei?

³³ Haoen Kapernaum to loukei. Hao chema kijinei haoei haoen to phekei, “Kan lama ai wetyoko kikei?”

³⁴ Haoen ngüh üangko apbei, aieilausi haoen yoa ao yaangbou dogo lama haoen lau- yokei.

³⁵ Hao setkei hoba Anthüknyi kho ngakei hoba haoen to laukei, “Müt atei shaangmang sühalonga hao pendou to phaibou hoba pendou khangenbou yeijan.”

³⁶ Haoei nashou che leibakei hoba haoen thedanga lotian phokei. Hobaje haoei haoeibü phaka himbei hoba haoen to laukei,

³⁷ “Kü nyena aoei haibü nashou che sungletlaje, haoei ngo sungletda; hoba aoei ngo sungletda haoei ngo sungletda ayingko ngo hautibou sungletda.”

Aoyou Sen Khulimbo Aying Haoen Sen Shanga

³⁸ Johanei laukei, “Lenbou, müt cheei ka nyena shabü sou shian sattiko künei hapbei hoba künei hao to thakla shanga lenkei, aieilausi hao sen yokabü aying.”

³⁹ Jisuei laukei, “Haoen teshilet, aishanga aoei kü nyena seikümseilei kümda haoei kü shangabü amaibü aikei laula athük.

⁴⁰ Aishanga aoyou sen khulimbo aying haoen sen shanga.

⁴¹ Ngühmaia ngei kan to lenda, aoyouei ong kan la kan Khristaeibü yingbü laüa kü nyena deili thung che inlaje, maimaitham jongsakei akonglabü.”

Shabüa Takteibü

⁴² “Kü to mailembü habü hanbü yoka che ongkei aoei phai- yettilaje, hao shangaje ngünbü laangkhüh yaangbü che ngüma yakan si mangto tomatlangbü maibou yingkhoulabü.

⁴³ Ka ikei no phaiyetia longa, kho wetan apashi. Ik penyi yeman anyetbü molowan to atkhoulabü khantoje thoan langkeishang to atbü ka shanga maibou,

⁴⁴ (laonei haoen to yangbemei ponpen hitda hoba wan ponpen longyoan khüpda.)

⁴⁵ Ka youei no phaiyettia longa, kho wetan apashi. You penyi yeman molowan to lapan jinbü toje sokean langkeishang to atbü ka shanga maibou,

⁴⁶ (laonei haoen to yangbemei hitda hoba wan ponpen longyoan khüpda.)

⁴⁷ Ka nyekei no phaiyettia longa, kho phekan apashi. Nyek penyi yeman molowan to lapan jinbü toje,

⁴⁸ (laonei haoen to yangbemei ponpen hitda hoba wan ponpen longyoan khüpda), nyeklang che ong yeman Mühg- haü Sangle to atbü ka shanga maibou.

⁴⁹ Aishanga mütpem weko wanei teitilabü.

⁵⁰ Jem maiakei; lausikei jem ka teibü mauan apalonga, kanei aiei kho teishiktila? Kan to jem kitishi hoba kan si kan paplepashi.”