MARK 8 - SAOPOBÜ LAI (BSI)

Jisuei Hajar Lei Oknyinbü

¹ Khünyetkei mütshang yaang shaula yungla akitei, haoei eikshuong ngakei hoba haoen to laukei,

² “Ngei shuong shanga aeibou maangto shatkuda, aieilausi haoen kü yoa tatei chalou sembounyet thüngda hoba shaula ai aki.

³ Ngei haoen aoknyinko lintia longa haoen lamloma nyenglabü, hoba haoen atje kaoen saabü ka louakei.”

⁴ Hao eikshuongei hao to jongaikei, “Ho tegübü sangliphang hanei aoei ai wentekei mütshang hatetche phottila?”

⁵ Haoei haoen to phekei, “Kanei wentek ladüng ki?” Haoenei laukei, “Pem nyet.”

⁶ Haoei noknyüh kaoa setla ngühkhüm kukei; hoba ladang haoei wentek nyet kho sungkei hoba Mühghaü la nyensang kukei, haoei hao eikshuong la haoen thedanga tenkula ngühkhüm kukei, hoba haoenei noknyüh thedanga shimtian phokukei.

⁷ Haoenei ngaukei shijo kiteikei. Ladang haoei khübü thüka haükukei, haoei hao eikshuong la khokei shomla shanga ngühkhüm kukei.

⁸ Haoenei photko shaukei; hoba haoenei jouletbü netshou kam nyet yoshaikei.

⁹ Haoen hajar lei thüng kiteikei; hoba haoei haoen ngaitikei.

¹⁰ Kheijinei hao hao eikshuong yoa long to atkei hoba Dalmanutha kaonyek to loukei.

Farisibü shuongei Sei Che Hibü

¹¹ Farisi shuong loukei hoba hao to wetyokei. Haoenei hao takteila shanga hao ka khuthük ka amaaphilabü che hikei.

¹² Haoei maangphanga hak hinngailangkei hoba laukei, “Ho metenei aila amaaphilabü hida? Ngühmaia ngei kan to lenda, ho meten la amaaphilabü akulabü.”

¹³ Kho phaia haoei haoen apyokei hoba long che to atjung nyiboukei yungko thidang to khatkei.

Farisibü hoba Herod Tokai

¹⁴ Haoenei wentek künla maakei, hoba longa haoenei wentek che to liman ai akitei.

¹⁵ Haoei haoen la ngühkhüm kuko laukei, “Farisibü si Herod tokai to kan maangsangashi.”

¹⁶ Haoen cheei che to joyoko laukei, “Haoei kho senei wentek akibü shanga lauda.”

¹⁷ Jisuei kho ngekei hoba haoen to laukei, “Kan aila tükdebü wentek akibü shanga joyoda? Kanei tou sühkokei ashenda hoba aditenda lo? Kaneibü maang kaangngaia lo?

¹⁸ Kan la nyek yeman kanei ühüpda lo? Kan la nou yemakei hoba kanei aditda lo? Hobaje kanei adamenda si?

¹⁹ Ladang ngei hajar ngao shanga wentek ngao shaknyinkei, kanei netshouei kam ladüng shenko heshaikei?” Haoenei hao to laukei, “Anthüknyi.”

²⁰ “Ladang ngei hajar lei shanga wentek nyet shaknyinkei, kanei netshouei kamyang ladüng heshaikei?” Haoenei laukei, “Nyet”;

²¹ hoba haoei haoen to laukei, “Kanei tou sühko ashuokda lo?”

Jisuei Bethsaidaa Nyekthubü Maitibü

²² Haoen Bethsaida to loukei. Haoenei hao jungto nyekthubü che leibakei hoba hao to meitiashi dogo hao to sukeijakei.

²³ Haoei nyekthubü kho sang danko jenlangkei, hoba haoei haoeibü nyek to eok thuokan jinkuan haoei haoeibü ikei hao to jungkei hoba hao to phekei, “Nyi aiche hapdalao?”

²⁴ Haoei chühangtikei hoba laukei, “Ngei mütshuong hapda; ngei haoen bulong tegü hapda, lausikei ngei haoen paiko hapda.”

²⁵ Kheijinei haoei haoeibü ikei nyekto nyiboula jungkei hoba haoei shangashatko hapbei. Hao maikei hoba haoei heebü kakei ajanjan pendou chong- chingko hapbei.

²⁶ Jisuei hao chemto hautiko laukei, “Sangnyu to tüt.”

Peterei Jisu Shangabü Khuokbü

²⁷ Jisu hoba hao eikshuong Kaisaria Filipi sangnyu shuong to haukei, hoba lama haoei hao eikshuong to phekei, “Mütshuongei ngo ao dogo lauda?”

²⁸ Haoenei hao to laukei, “Johan Baptikubou”; atei “Elija”, hoba atei “Thuseibü yoa che, dogo lauda.”

²⁹ Haoei haoen to phekei, “Lausikei kanei ngo ao dogo damda?” Peterei hao to jongaikei, “No Messia.”

³⁰ Hao shangabü aola alenla shanga Jisuei haoen la ngühkhüm kukei.

Jisuei Haoeibü Khonku hoba Hailabü Shanga Laubü

³¹ Müteibü Shou aeibou khonkujan, hoba jaishou shuong si, ungshedbou shuong si, Ngühkhüm lenbou shuongei hao inletlabü, hoba hao haitilabü, hoba semnyet kian phaia hao langngailabü dogo haoei haoen la lenkei.

³² Hobaje haoei ho shangabü pühthea laukei. Peterei hao leilangkei hoba hao to hakkei.

³³ Lausikei Jisu sepeikei, hoba hao eiskshuong to chühngaiko Peter to kaang hakkei. Haoei laukei, “Kü jungka kukashi, Satan, aishanga nyi Mühghaü aedangka ayingko müt aedangka damda.”

³⁴ Haoei eikshuong yoa noknyüh ngakei hoba haoen to laukei, “Atei kü phai loumang sühsije haoei jembü lolo thepetashi, haoeibü peisei peashi hoba kü phai semashi.

³⁵ Aishanga aoei jembü langkei senetmang sühlaje kho maulabü, lausikei müt aoei kü shanga hoba Ngühlang Maibü laüa jembü langkei maulaje kho hapmeilabü.

³⁶ Aishanga müt cheei kaodak khümbo pailetan phaia jembü langkei maua longa haoei ai ku pailetla?

³⁷ Hobaje mütei jembü langkei jeila ai kula?

³⁸ Aishanga ho asangalan hoba shabü metena, aoei ngo hoba kü ngüh shangabü the alenenlaje, Müteibü Shoueikei jembü Bunyuboueibü soneikangbüa saopobü khuthük hangangbü yoa loujinei hao shangabü the alenenlabü.”