MARK 7 - SAOPOBÜ LAI (BSI)

Pisibousi Shuongeibü Lenbü

¹ Jerusalem ka loubü Farisi shuong si Ngühkhüm lenbou shuong at hao yoto loukei.

² Haoenei hao eikshuong atei ik asakko khei songle haangei asüenko shauko hapbei.

³ (Farisibü shuong si Jihudabü shuong pendouei, jaishou shuong song jungeiko, ik maisho, khei ikngüma sühko asakkoje ashau;

⁴ hoba ladang haoen namseishang ka longeilaje haoenei mang ayukoje ashau ayung. Hobaje thung, chak, hoba chinam thungsiphau hoba shen sakbü hoba lenbü song juongnyu sungletan jungeibü kiteikei.)

⁵ Hibü Farisi shuong si Ngühkhüm lenbou shuongei hao to phekei, “Aila ka eikshuongei baushi shuong songa kibü tegü ajungeiko, ik asakko shauda?”

⁶ Haoei haoen to laukei, “Kan hibüyoubü shuong shangabü Isaia thuseibüei maishoko tetenkei; Laishibaei lenbü tegü, ‘Habü mütshuongei haoeneibü sembungei kü to soumo hatda, lausikei haoeneibü maangpon kü ka lounyu heakei.

⁷ Amlanga haoenei kü to lemda; aieilausi haoeneibü lenbü songlen kho müteibü song ki!’

⁸ “Kanei Mühghaü ngühkhüm wailetda, müteibü song maisho hatlepda.”

⁹ Haoei tokei haoen to laukei, “Kanei Mühghaü ngühkhüm inletnyu phoan pisong bousong jungeila kan latetche maikei!

¹⁰ Aishanga Mosaei laukei, ‘Kanyu si kabou to soumo hatashi’, hoba, ‘Aoei haobou si haonyu nyen shada hao haitijan.’

¹¹ Lausikei kanei lauda, müt cheei haonyu si haobou to, ‘Kasi haangtangla ngei ai nyaksinam ong jungeilaje kho pendou Mühghaü la jongsak la saüenko kuan apa (Korban)’ dogo laua longa,

¹² hao la touje haonyu si haobou shanga kümlaleila asakkuda.

¹³ Kho tegü kanei kubü baushi shuongeibü tetenbü ngühei Mühghaü ngüh amlangbü la yeitida. Hobaje kho tegübü kümsilei juongnyu kanei kümda.”

Müt Asaopobü Yeitibü Peisilei

¹⁴ Haoei noknyüh hao jungto nyibou la ngakei, hoba haoen to laukei, “Kan pendouei kü to ditashi hoba ditenashi.

¹⁵ Tangaeka atan müt shatienlabü ai aki; lausikei müt ka ai longda khoei ong müt shatida.”

¹⁶ (Aoto ditla nou yembei haoei ditashi.)

¹⁷ Ladang haoei noknyüh apyoan chemto atkei hao eikshuongei hao ka ngühphatbü shangabü kho phekei.

¹⁸ Haoei haoen to laukei, “Kaneikei hainyu aditenda lo? Tangaeka müt to ai ong atda, khoei hao shatila athük dogo laubü kho kanei aditenda si?

¹⁹ Aieilausi kho maangpon to ütda, lausikei shiang to atda hoba apshang to danda.” (Khoei haoei shausiyung pendou saopobü dogo lenenda.)

²⁰ Haoei laukei, “Müt ka ai longda khoei müt shatida;

²¹ aishanga maang aeka, müteibü maangpon ka dambü amaibü pendou longda: asangalanbü, kokmaang senmaang, müt haitilabü,

²² suonlambü, aeilam aeiphop, amaibü, khüpsilang, pejapelabü, nyekto shatbü, Mühghaü nyikubü, lilisese hoba ngoualouabü,

²³ khübü pendou maang aeka longda hoba khoei müt che shatida.”

Yaksa Cheeibü Mailem

²⁴ Hao khüka meimeijung satkei, hoba Tair kaonyek to haukei. Hao chem che to atkei hoba haoei aolakei ngetimang asüh. Lausi dogokei hao ahuen.

²⁵ Kheijineitham yaksa che, aoshou nouyangshou to shabü sou kikei, saoei hao shangabü ditkei hoba louan hao junga khüpetkei.

²⁶ Yaksa kho Grik sao, hoba Siria kabü Foenika phang kiteikei, hoba saoei hao to saoeibü shou ka shabü sou shian sattikushi dogo phekei.

²⁷ Haoei sao to laukei, “Shousi shuong shaang senyühshemtiashi, aishanga shousieibü shausiyung sungbaan kei thedanga apbula janbü aying.”

²⁸ Saoei hao to jongaikei, “Haü, yaangbou, lausikei setshang phanga kibü keieikei nashousiei attibü nyaknetshouje shauda.”

²⁹ Haoei sao to laukei, “Khei jongaibü shanga ngaiashi: shabü sou kho kashou nouyangshou ka longan apa.”

³⁰ Sao chem to ngaikei hoba saoei na kho shena lengan hapbei, hoba shabü sou sao ka satan apan kiteikei.

Jisuei Obangbü si Likhipbü Maitibü

³¹ Hao Tair kaophei ka longeikei hoba hao Sidon kaonyek ka Dekapoli kaophei jenyu to shetko Galil yungnyu sühko loukei.

³² Haoenei hao jungto obangbü si likhipbü müt che leibakei hoba haoenei haoeibü ikei hao to maitila sukeijakei.

³³ Jisuei noknyüh ka hao mütpem leilangkei, hoba müt khoeibü noukhün to haoeibü ikjishou attikei. Haoei eok thuokkei hoba müt khoeibü lishanga meitikei,

³⁴ hoba khuthükae chühko haoei hak hinan apan hao to laukei, “Efata”, laobou tetlabü, “Ipashi”.

³⁵ Kheijineitham müt khoeibü nou ipbei hoba haoeibü lishang khühbü ka sengkei hoba haoei shangashatko laula khangkei.

³⁶ Haoenei aola alenla Jisuei ngühkhüm kukei, lausikei haoei latetche ngühkhüm kaangko kudaje khütetche haoenei ngüh kho aei aei phakkei.

³⁷ Haoen aicheküman maang- pangkei hoba laukei, “Haoei pendou maisho küma; haoei obangbü la dittida hoba likhipbü la joyotida.”