MARK 6 - SAOPOBÜ LAI (BSI)

Jisu Nazareta Asungletbü

¹ Hobaje haoei kho kaoen apyokei hoba sangnyu to loukei, hoba hao eikshuongei hao phai sembei.

² Nounyet haoei sinagoga lenkei. Haoei laubü ditan müt juong maangpangkei hoba laukei, “Müt hoei laka khübü ngüh shuong hapbei? Hao la habü sei hatetbang kümlabü lele ailaibü songsihon kukei?

³ “Ho Jakob si, Joses si, Jihuda si, Simoneibü jai, Mari shou mistri kho aying lo? Hobaje haona yaksa shuong hanei sen yoa aki lo?” Haoenei hao atheleten.

⁴ Jisuei haoen to laukei, “Jembü kaodak, jembü chempen shuong hoba jembü chem to limanje thuseibü che asangko aki.”

⁵ Haoei khünei shatbü shijo to ikei meitiko maitibü to liman, sei ai aküm.

⁶ Haoen to mailem akibü to chühan hao maangpangkei. Hobaje haoei sang shoongko lenko haukei.

Jisuei Eik AnthüknyiHautibü

⁷ Haoei Anthüknyi kho hao jungto ngakei hoba haoen nyibang hautikei. Haoei haoen la asaopobü soushou thüka hau kukei,

⁸ hoba haoei haoen la sakkuko laukei, “Kanei kaneibü wakou shanga ju che to liman wentek ayingsi, neikong ayingsi shijimoka nam yingasikei ai tekün.

⁹ Nguok lonashi lausikei khüto liman mangyuk aeila tekün.”

¹⁰ Haoei haoen to laukei, “Lanei ong kanei chem to atlaje, khüka kan akukshongko khünei thüngashi;

¹¹ hoba lanei ong kan aleiyetlaje, ayingsi kan ngüh aditkulaje, khüka kukashi hoba haoen khulimbo aukabü lela shanga kaneibü you ka thamngu kangan apashi.”

¹² Haoen haukei hoba mütshuongei maangpon se- peijan dogo songlenkei,

¹³ hoba haoenei shabü sou juongnyu shian sattikukei hoba shatbü müt juong la onang naangkuko maitikukei.

Baptikubou Johan Haibü

¹⁴ Herodei ho shangabü ditkei, aishanga Jisueibü nyen hangenan kiteikei. Müt atei laukei, “Baptikubou Johan langngaiakei khoei ong habü sei hao to kümda.”

¹⁵ Atei laukei, “Ho Elija yingkei”; hoba ateije, “Hao kho shangiedbü thuseibü shuong yokabü tegü thuseibü che yingkei” dogo laukei.

¹⁶ Lausikei ladang Herodei ditkei haoei laukei, “Johan, aoeibü khu ngei thetkei hao langngaiakei.”

¹⁷ Aishanga Herodei müt hautikei hoba Johan lapbei hoba haona Filip yak Herodia laüa hao thüngdanga khinan phokei; aishanga Herodei sao lekei,

¹⁸ hoba Johanei hao to, “Kanaeibü yak nyi ngalabü hoje tükde aying” dogo laukei.

¹⁹ Herodiaei Johan mangsenkei hoba hao haitimang sühkei; lausikei saoei athüken,

²⁰ aieilausi Herodei hao to hatkei; aishanga Johan kho ngühmai hoba saopobü müt dogo haoei ngekei, hoba haoei hao püetan phokei. Haoei annebenko Johaneibü ngüh ditkei hoba hao phenyembei; khei yingasikei haoei olinangko ong hao ngüh ditkei.

²¹ Ladang Herodei hao bukbü chaloua haoeibü yaangenbü shuong si haoeibü lakjaibü sepai yaangenbü shuong hoba Galil kabü khulei langlei shuong la lem yaang oknyinkei, kheijinei Herodia shanga chalou maibü che longan apbei.

²² Ladang Herodiaeibü shou lotan tombei, saoei Herod hoba hao shaubüyungbü shuong olintikei. Chobaei yaksa to laukei, “Nyi ai ong mangsühda kü ka hiashi; ngei kho kala kulabü.”

²³ Haoei sao to thelet lanletko laukei, “Nyi kü ka ai ong hilaje, kho ngei kü sangle jamtekei kulabü.”

²⁴ Sao hauan haonyu to laukei, “Ngei ai hila?” Saoei laukei, “Johan Baptikuboueibü khu.”

²⁵ Saoei panteiko tongde Choba jungto louan laukei, “Johan Baptikuboueibü khu phau chenei nyi kü la toutham kutimang sühda.”

²⁶ Choba aeibou maangto shatkei, lausikei haoei thelet lanletbü hangjong hoba shaushanga setan kibü shangabü dambo, haoei sao to ü dogo alauen.

²⁷ Kheijineitham Chobaei hao lombou sepai che Johaneibü khu thetpala shanga ngühkhüm kuan hautikei. Hao haukei hoba thüngdang ka hao khu thetkei.

²⁸ Johaneibü khu phau chenei sungbakei hoba yaksa kho la kukei. Yaksa khoei kho saoeibü nyu la kukei.

²⁹ Ladang hao eikshuongei kho ditkei, haoen loukei hoba haoeibü mang hekei hoba hee chenei khünkei.

Jisuei Hajar Ngao Oknyinbü

³⁰ Youkoikjai shuong liko Jisu jungto loukei, hoba haoenei kümbü hoba lenbü pendou hao la lenkei.

³¹ Haoei haoen to laukei, “Kan sangliphang to kaiya hoba longche haksoashi”; aishanga juongnyu hau longei dogo kikei, hoba haoenei shaula yunglabü jih ongkei ühüp.

³² Haoen long chenei sangliphang to bangjung satkukei.

³³ Müt juongnyuei haoen hauko hapbei hoba juongnyuei haoen shenkei. Haoen juong sangnyu pendou ka youei khüto langyokei hoba haoen leioukei.

³⁴ Ladang hao longkei, haoei mütshang yaang hapbei, hoba haoei haoen shanga aeibou sanouko dambukei, aieilausi haoen sanlombou akibü sanshuong tegü kikei; hoba haoei haoen la ngüh juongnyu lenkei.

³⁵ Chasemlamto hao eikshuongei louan hao to laukei, “Kaoen ho sangliphang, hoba tou chanyu nepda.

³⁶ Haoen kaijembo kibü sangnyu si sangshuong to hauan haoen shanga shausiyung denche najekla shanga haoen lintiashi.”

³⁷ Jisuei haoen to jongaikei, “Kanei bouje haoen la denche okashi.” Haoenei hao to laukei, “Kün hauan sempak saoan den wentek jekan mütshuong la shaula kula sai?”

³⁸ Haoei haoen to laukei, “Kanei wentek lajuche ki? Hauan chühashi.” Ladang haoenei lamenkei haoenei laukei, “Wentek ngao hoba ngau nyi.”

³⁹ Haoei haoen pendou sang thüka san küman setentila hao eikshuong la ngühkhüm kukei.

⁴⁰ Haoen saongao bang si anjinsem bang lin küman setkei.

⁴¹ Hobaje haoei wentek ngao si ngau nyi kho jungan, khuthük ae chühko haükukei; kho phaia haoei wentek kho shaknyinkei, hoba noknyüh junga phokula shanga haoei hao eikshuong la kukei. Tokei haoei ngau penyi kho haoen pendou la jankukei.

⁴² Haoen pendouei photko shaukei;

⁴³ hoba haoenei netshou kam anthüknyi shenko hoba ngau shijo dogo heshaikei.

⁴⁴ Hobaje wentek shaubü shuong kho bousu hajar ngao kiteikei.

Jisu Deitaka Paibü

⁴⁵ Kheijineitham haoei noknyüh lintikei, hao eikshuong long to attian Bethsaida yungko thiae hao thedang to hauteila thungeijangeiko hautikei.

⁴⁶ Haoei haoen la bangmai kuan phaia hao shongh to welaula angkei.

⁴⁷ Ladang chasem sühkei long kho deijia kiteikei hoba hao mütpem kaomaia kikei.

⁴⁸ Hobaje yei khüpeian soubü ka haoei haoen longleila aeibou khonsakko hapbei. Hibü hao ngeyang sem jih ka lak jih kanglanga haoen jungto deitaka paiko loukei, hoba haoei haoen leilangla tegü hauko kikei.

⁴⁹ Ladang haoenei hao deitaka paiko hapbei, haoenei kho sou dogo dambei hoba ngekkei,

⁵⁰ aishanga haoen pendouei hao hapbei hoba mokde apyokei. Kheijinei haoei haoen to joyokei hoba laukei, “Tehüt! Ngo yingkei. Maang kaangashi.”

⁵¹ Hao haoen jungto long to lotkei hoba yei jemlangkei. Haoen aicheküman maangpangkei.

⁵² Aishanga haoenei wentek shangabü aditen; haoen maangpon kaangan kiteikei.

Jisuei Genesareta Shatbü Che Maitibü

⁵³ Haoenei dei khatko hauan Genesaret sühkei hoba haoeneibü long phenkei.

⁵⁴ Haoei long apyosi lengko mütshuongei hao shenkei.

⁵⁵ Hobaje kho kaonyek pendou ka langyoko, hao lan ki haoenei ditan khüto shatbü shena lengan loukei.

⁵⁶ Hobaje sangshou, ayingsi sangnyu, ayingsi kaonyek ka haoenei shatbü shuong namseishanga phoan, haoeibü neiyik to ongkei meititikai dogo hao to sukeijakei. Hobaje lajucheei hao to meitikei pendou maikei.