MARK 5 - SAOPOBÜ LAI (BSI)

Shabü Souei Lapbü Müt Maitibü

¹ Hobaje haoen deiphei aian, Gerasin kaonyek to loukei.

² Hao long ka longsi lengko asao- pobü soushou kibü müt che heedang ka longan hao haüyokei.

³ Hao heelaaka kiko paikei. Aoeikei hao akhühen, yangmenei mangkei akhühen;

⁴ aieilausi annebenko hao thüngdanga phoko yangmenei khühasikei, haoei yangmen tokthetkei hoba nameibü thüngdang jangnyinkei, hoba hao thepetla aotokei hau akitei.

⁵ Change nangnak haoei heelaaka hoba shongha ngekko hoba jembü lolo laangei latko kikei.

⁶ Jisu heebüa hapan hao langjung haukei hoba hao thedanga khüpetkei.

⁷ Hobaje haoei ngüh yaangbüei ngekko laukei, “Thükkabou Mühghaü Shou, Jisu, nyi aila ngo peksekda? Ngo ashiakoela ngei kato Mühghaü nyena sudajada.”

⁸ Aishanga Jisuei hao to, “Asaopobü soushou, müt khüka longashi” dogo lauko kikei.

⁹ Haoei hao to phekei, “No ao nyenkei?” Haoei jongaikei, “Kü nyen juongnyu, aishanga kün juongnyu ki”;

¹⁰ hoba haoei haoen kaonyek ka shian asattila sukeijakei.

¹¹ Hobaje kho shongh youa uk shuong yaangbü lamshauko kiteikei,

¹² hoba souei hao to, “Kün ukshuong to hautikai, kün haoen to atkho” dogo lauko sukeijakei.

¹³ Haoei haoen la sakkukei. Asaopobü soushou shuong longan apbei hoba ukshuong to atkei, hoba ukshuong hajar nyi thüng kho laanglip to nyuyoko koulangan thima shemetkei.

¹⁴ Haoeneibü lombou shuong satyokei hoba sangnyu si kaonyek pendoua phinthonkei. Hobaje ai haüthükkei khüto chühla mütshuong yangbakei.

¹⁵ Haoen Jisu jungto loukei, hoba shabü sou shuong longan apbou müt kho neisimei lean Jisu junga setan hapbei, hoba haoen hatyokei.

¹⁶ Hobaje kho hapbü shuongei shabü souei lapbü müt to haüthükbü hoba uk shangabü lenkei.

¹⁷ Haoenei Jisu to haoen kaonyek apyola sukeijakei.

¹⁸ Hao long to atko kijinei shabü sou kiteibü müt khoei haokei hao yoa yangkho dogo hao to sukeijakei.

¹⁹ Jisuei hao la asakku, lausikei hao to laukei, “Kan chem to chempen shuong jungto ngaiashi, Bunyubouei ka shanga kümsilei latetche kümbei, hoba haoei kato lai onoukei, haoen la lenashi.”

²⁰ Hao haukei hoba Jisuei hao shanga ai kümbei kho Dekapoli (tetlabü, Sangnyu An) a phinthonkei, hoba müt pendou maangpangkei.

Jisueibü Nei to Meitinyu hoba Jairaseibü Nouyangshou

²¹ Ladang Jisu longa nyibou yungko thidang to satkei hao deiko nyangko kikei hoba mütshang yaang hao jungto yoshaikei.

²² Hobaje sinagog bunyu yoa che, Jairas nyenbü müt che loukei hoba ladang haoei hao hapbei, hao hao you junga khüpetkei,

²³ hoba hao to aeibou sukojako laukei, “Kü shou nouyangshou hailabü lele ong kia. Sao maian lang kilabü lele no kaiya hoba sao to ka ikei jungashi.”

²⁴ Jisu hao yoa haukei hoba mütshang yaang hao phai sembei, hoba haoenei hao omlepbei.

²⁵ Yaksa che po anthünyi sii koubüei shatko kikei;

²⁶ saoei daktar juongnyu ka khonsak juong hapbei hoba saoei kibü khümbo apbei. Lausikei saoei ku ühüp, aeiko amaibou la yeikei.

²⁷ Saoei Jisu shangabü ditkei, hoba sao noknyüh yoa hao phaito loukei hoba haoeibü nei to meitikei.

²⁸ Aishanga saoei laukei, “Ngei haoeibü nei to meitia longa ngo maian aplabü.”

²⁹ Kheijinei sii koubü thakkei hoba saoei jembü mangei saoeibü shat sada dogo ngekei.

³⁰ Kheijinei Jisuei hao ka sei satbü ngekei, hoba noknyüh to sepeian chühngaiko laukei, “Aoei kü nei to meitikei?”

³¹ Hao eikshuongei hao to laukei, “Noknyühei no omlepbü nyi hapbo kian, ‘Aoei küto meitikei’ dogo nyi lauda lo?”

³² Kho aoei kümbeije dogo haoei chühngaikei.

³³ Lausikei yaksanyu mokde apyokei hoba lühkei, aishanga saoei sao to ai haüthükkei kho ngekei hoba louan hao thedanga khüpetko hao la ngühmai khümbo lenkei.

³⁴ Haoei sao to laukei, “Nashounyu, kaibü mailemei no maia. Haksoa ngaiashi, hoba kaibü shat ka maian apashi.”

³⁵ Haoei lauko kijinei sinagog bunyu chem ka müt at louan laukei, “Ka shou nouyangshou haia. Lenbou touje aila kipjimtila?”

³⁶ Lausikei lauko kibü ngüh kho Jisuei aditku hoba sinagog bunyu to laukei, “Tehüt. Mai ong lemashi.”

³⁷ Haoei Peter, Jakob, hoba Jakobeibü na Johan to liman aokei hao yoto alotti.

³⁸ Haoen sinagog bunyu chema sühlangkei, haoei panglangyobü hoba mütshuong juong kaangbang haapyobü hoba manghaapbü hapbei.

³⁹ Hao atkei hoba haoen to laukei, “Kan aila panglangyoda hoba haapyoda? Na kho ühaikei; sao yepbei.”

⁴⁰ Haoenei hao la nyikukei; lausikei haoei haoen pendou satkhümtikei, naeibü bou hoba nyu hoba hao yo kabü shuong leian na kishang to atkei.

⁴¹ Hobaje naeibü ika jenan haoei sao to laukei, “Talitha koum”, laobou tetlabü, “Medeinyu, ngei kato lenda, laksepashi.”

⁴² Kheijineitham yaksa nashou kho laksepbei hoba paikei. (Sao po anthüknyi nashou kiteikei.) Kheijinei haoen maangpangbü yaangei shenkei.

⁴³ Hobaje ho aoeikei angejan dogo haoei ngühkhüm kukei, hoba haoei medeinyu la denche okashi dogo haoen la lenkei.