MARK 4 - SAOPOBÜ LAI (BSI)

Youli Saakbü Ngühphatbü

¹ Haoei tokei nyibou yungkoa lenla khangkei, hoba mütshang yaang hao jungto yoshaikei hibü hao long che to atkei hoba yungnyua khonei setkei. Noknyüh pendou yungnyu nyangko deikoatham kikei.

² Haoei haoen to ngühphatbüa juong lenkei hoba haoeibü lenbüa haoei haoen to laukei,

³ “Ditashi! youli saakbü che youli saakla koukei.

⁴ Haoei saakjinei youli at lamkhonga atkei, hoba aushuong louan hekhümbei.

⁵ Youli at kaomai juong akishang laangpünga shatkei, hoba kaomai shangko akisije kho enyu yembei.

⁶ Ladang chanyu longkei khüto jokko haukei, hoba hao to li üatsije linan apbei.

⁷ Lubü youli shuong jaklaaka shatkei; jaklong chingenkei hoba kho naükei, hoba haoei ai mai ehek.

⁸ Youli at kaomaia shatkei; kho yembei, chingkei, hoba youkung weko khujin, saosem ayingsi saongao onko youman hekkei.”

⁹ Haoei laukei, “Ao la nou yembei haoei ditashi.”

Ngühphatbü Nyekchüh

¹⁰ Hobaje hao mütpem kijinei, Anthüknyi yoa lubü eikshuong yoan, hao to ngühphatbü shangabü phekei.

¹¹ Haoei haoen to laukei, “Kanlaje Mühghaü Sangle huphang ngüh kuakei, lausikei aoyou kü phai sembü shuong aying, ajanjan pendou ngühphatbüa ong lauda,

¹² khoei ong, ‘Haoenei maimaitham hapje hapla thükkei lausikei ashenlabü, hoba haoenei ditlabü lausikei aditenlabü; aishanga haoenei chühena longa hoba ditena longa haoen sepeilabü hoba haoen la apbuan thonlabü.’ ”

Jisuei Youli Phinbü Ngühphatbü Wanan Lenbü

¹³ Haoei haoen to laukei, “Kanei ho ngühphatbü aditenda lo? Khülonga kanei ngühphatbü pendou lai ditenla?

¹⁴ Youli saakbouei ngüh kho phinda.

¹⁵ Hobaje lamkhong laonei ngüh kho saakkei khünei kibü shuong kho ho: haoenei ditda, kheijineitham Satan louda hoba haoen to wenbü ngüh kho japlangkuda.

¹⁶ Laangpünga shatbü youli tetlabü ngüh kho ditan kheijineitham olinko sungletda;

¹⁷ hoba haoen to li akibuba longche shanga ong yemda; kho phaiaje ngüh kho laüa khonsak ayingsi shieikoe louda hoba haoen atetda.

¹⁸ Jaklaaka shatbü youli kho habü: haoenei ngüh kho ditda,

¹⁹ lausikei kaodak maangmau, nyaksinam dühbü hoba lubü nyekdüh maangdüh louan apda, hoba mai ehektiko naülepnyu aptida.

²⁰ Kaomaia shatbü youli kho ho: aoyouei ngüh kho ditda, hoba sungletda, khübü youkung wekoei khujin onko, saosem onko hoba saongao onko youman hekda.”

Kammanga Phobü Wanthung

²¹ Haoei haoen to laukei, “Kanei wanthung kammanga ayingsi shen phanga küplepan phola sungbadalao? Kho wanthung anshanga anla sungbada aying lo?

²² Aishanga ngesakbü to akhuokenlabü lele aikei huan aki; tang akhitlabü lele aikei huan aki.

²³ Aoyou la ditla noukhün yembei haoenei ditashi.”

²⁴ Haoei haoen to laukei, “Kanei ai ditda maang kuashi. Ai takjina kanei takletkulaje khonei kan la takkulabü, hoba aeikei kan la jinyokulabü.

²⁵ Aishanga aoei ki, hao la aei kuyolabü, hoba aoei aki, haoei ai ki khokei hao ka langlabü.”

Yembü Youli Ngühphatbü

²⁶ Haoei laukei, “Mühghaü Sangle ho phatkei: müt cheei kaoa youli apda,

²⁷ hao nangnak yep hoba chaloua laksep dogo kitoua youli kho khitan yemda hoba chingda, lausikei kho lai chingdaje haoei angekei.

²⁸ Kaoei jembü lolo mai hektida, shangla yik, kho phaia youman, kho phaiaje youmana mai jinda.

²⁹ Ladang youman kho nyenda, khoyam haoei latla khangda, aishanga youlat jih lousüha.”

Yongkoshiklang Ngühphatbü

³⁰ Haoei laukei, “Senei Mühghaü Sangle lubü ai to takteila? Ayingsi senei ai ngüh- phatbüei wanenla?

³¹ Ho yongkoshiklang youli che phatkei, laobou kaoa wenjineije kaodaka youli pendou to hanbou,

³² lausikei ho wenan phaiaje yemda, hoba kesiong pendou to yaangbou yeida, hoba phek yaangbang khaüda, hibü mühkabü aushuong louan kho hamphanga langla thükda.”

³³ Kho tegü ngühphatbü juongnyuei haoenei ditenla thükbüa sühko haoei haoen to ngüh lenkei.

³⁴ Haoei haoen to ngüh- phatbü yoan ong laukei, lausikei haoei chemphanga hao eikshuong la ngüh pendou wanan lenkei.

Jisuei Yeinak Jemtibü

³⁵ Khünyet ladang chasem sühkei, haoei haoen to laukei, “Senei dei thidang to khatkho.”

³⁶ Haoenei noknyüh apyokei, hoba hao longa lai kiteikei kho tegü ong haoenei hao haoen yoa leian haukei.

³⁷ Kheijinei yeinak yaang lotkei hoba deishou kho longmang to shouetlangsije long kho shenko kiteikei.

³⁸ Jisu je longshing aenei amnyua yepan kiteikei. Haoenei hao kaangkei hoba hao to laukei, “Kün shemetla nyi aphokeida lo?”

³⁹ Kheijinei hao laksepbei hoba yei to hakkei hoba dei to laukei, “Ashoueiko sangsembo kishi.” Hobaje yei kho thakkei hoba jemetshouko kikei.

⁴⁰ Haoei haoen to laukei, “Kan aila hatda? Kan tou sühko mailem aki lo?”

⁴¹ Haoen aeibou hatkei hoba haoen cheei che to laukei, “Yei si deieikei ngüha lelabü lele ho ao?”