MARK 3 - SAOPOBÜ LAI (BSI)

Ik Pheibü Müt Che

¹ Hobaje Jisu sinagog to nyibou atkei, hoba khünei ik pheibü müt che kikei.

² Haoei Nounyet maitikuasaoje dogo hao la shed kula shanga haoenei chüheiko kikei.

³ Haoei ik pheibü müt khüto laukei, “Jenyua loashi.”

⁴ Jisuei haoen to laukei, “Nounyet maibü kümla si amaibü kümla sakkuda? Haitila si püetla sakkuda?” Lausikei haoen litham apbei.

⁵ Haoei khauangko haoen to sepeisai chühkei, hoba haoen tubüsekbü shanga maangto shatkukei, hoba haoei müt khüto laukei, “Kaibü ik shingashi.” Haoei shingkei hoba hao ik maian apbei.

⁶ Farisi shuong tongde tangto angkei, hoba haoenei hao lai haitila, hao khulimbo Herod eikshuong yoa huon takkei.

Yungkoa Noknyüh

⁷ Jisuei hao eikshuong yoa yungko to satkei, hoba Galil ka mütshang yaangbü cheei hao phai sembei. Tokei shuong yaangbü che Judea

⁸ hoba Jerusalem ka, Idumia hoba Jordan thidang ka, haoei kümbüleibü ditan hao jungto loukei.

⁹ Haoei hao eikshuong to mütshangei hao üaüeitila shanga hao la long che lamlekula lenkei;

¹⁰ aishanga haoei juongnyu maitikei, hoba shatsinyat thonbü danei hao to meitila shanga aüyokei.

¹¹ Ladang asaopobü soushou shuongei hao hapbei, haoenei hao thedanga khüpetkei hoba ngekkei, “No Mühghaü Shou!”

¹² Hobaje hao tang akhittila shanga haoei haoen to aeibou kaangko lenkei.

Jisuei Youkoikjai Anthüknyi Pienbü

¹³ Hao shongh to angkei hoba haoei mangsühbü shuong ngakei hoba haoen hao jungto haukei.

¹⁴ Hobaje hao yoa kila, hoba songlenko hautila,

¹⁵ hoba shabü soushou shuong shian sattila sei kila, haoei Anthüknyi pienkei, hoba haoei haoen la youkoikjai shuong dogo nyenkukei.

¹⁶ Haoei Anthüknyi kho pienkei: Simon, (ao la haoei nyen Peter kukei),

¹⁷ Zebedi shou Jakob, hoba Jakobeibü na Johan (haoei haosi la Boanerges, tetlabü, Langmak Mütshuong, dogo nyen kukei),

¹⁸ Andria, Filip, Bartholomia, Mathi, Thoma, Alfia shou Jakob, Thadia, Kurinibü Simon,

¹⁹ hoba Judas Iskhariot (hao haitila khümbo kubou).

Jisu hoba Beelzebul

²⁰ Hobaje hao chem to ngaikei. Hobaje noknyüh kho takshatsije haoenei nyakkei ashauen.

²¹ Kho ditan chempenei hao senetla angkei, aishanga mütshuongei hao dalada dogo laueiko kikei.

²² Jerusalem ka louyenbü Ngühkhüm lenbou shuongei hao to Beelzebul kia, hoba haoei shabü soushou shuong shian sattila shanga thükkabou shabü sou jungeikei dogo laukei.

²³ Haoei haoen ngakei hoba haoen to ngühphatbüei lenkei, “Satanei lai Satan shian sattienla?

²⁴ Sangle cheei jembü khulimbo janyina longaje kho sangle lola athük;

²⁵ chem cheei jembü lolo janyina longaje kho chem lola athüklabü;

²⁶ hoba Satanei hao lolo khulimbo losije hoba janyina longaje haoei lola athük; hao khonei thonlabü.

²⁷ Ayingsi hau kibü müt kho shaang haoei khühan aphokoje aokei hau kibü müt chem to atan haoeibü peisilei aaklangla athük.

²⁸ Ngühmaia ngei kan to lenda, müt la haoeneibü shabü hoba haoenei Mühghaü nyikuko angbü ngüh pendou amai apbulabü;

²⁹ lausikei müt cheei Soushou Saopobü khulimbo nyikua longaje hao la ladangkei üpbulabü; aishanga haoei thon akibü shabü shona.”

³⁰ Aishanga haoenei laukei, “Hao to asaopobü soushou kia.”

Jisueibü Nyu hoba Nasi shuong

³¹ Haonyu si nasi shuong loukei, hoba tanga lokei; haoenei müt hautiko hao ngakei.

³² Hao kaijembo shuong che setan kikei hoba haoenei hao to laukei, “Chühashi, kanyu hoba kanasi shuong tanga loakei; haoenei no lameida.”

³³ Jisuei haoen to jongaikei, “Künyu ayingsi Künasi shuong ao?”

³⁴ Hao kaijembo setbü shuong to chühan haoei laukei, “Habü ho künyu hoba künasi shuong.

³⁵ Aoei Mühghaüei maangangbü kümda, hao kho küna bousubou, küna yaksanyu hoba künyu ki.”