MARK 16 - SAOPOBÜ LAI (BSI)

Langngaibü

¹ Ladang Nounyet dankei, Mari Magdalin, Jakob nyu Mari si Salomeei hao la naangkula loula ponlem onang jekkei.

² Balea ngeyang shaangbounyet, ngeyang ete chanyu phambüsi haoen hee to loukei.

³ Haoen si haoen, “Sen la aoei heekhün ka laang kho yühan apbula?” dogo lauyokei.

⁴ Ladang haoenei chüh- antikei, haoenei laang kho yühan sattian hapbei; kho aicheküman yaangan kikei.

⁵ Hee maangto atsi haoenei heshou che neisimei thupaibü lean mae aenei müt che setan hapbei, hoba haoen aeibou maangpangkei.

⁶ Haoei haoen to laukei, “Maang tepang. Kanei peiseia thüngbü Nazaretbü Jisu lameida. Hao langngeia. Hao hanei aki. Chühashi, haoenei hao khünshang ho yingkei.

⁷ Lausikei hauashi hoba hao eikshuong si Peter la, ‘Hao kan to shaang Galil to hauda. Haoei kan to lenbü tegü, khünei kanei hao haplabü’, dogo lenashi.”

⁸ Haoen longkei hoba aeibou lühko hoba hatenan hee ka satkei. Haoenei aolakei ai alen, aieilausi haoen hatkei.

Jisu Mari Magdalin Jungto Longbü

⁹ Tou balea shaangbounyet enyu hao langngeian phaia, haoei shabü sou nyet shian sattikunyu Mari Magdalin to shaang longan lenkei.

¹⁰ Sao haukei hoba hao yoa kibü dan to, haoen mang haapbo hoba haapyoko kijinei lenkei.

¹¹ Ladang haoenei hao laang kia hoba Mari Magdalinei hapa dogo laukei, haoenei kho maialem.

Jisuei Eik Nyi la Longan Lenbü

¹² Kho phaia haoen yokabü müt nyi sangto hauko kijinei, haoei phangcheei haoen la longan lenkei,

¹³ haoen ngaikei hoba lubü shuong to lenkei. Haoenei haosi tokei maialem.

Jisuei Anthükche la Longan Lenbü

¹⁴ Hobaje Anthükche kho shaula yungla setan kijinei, haoei haoen la longan lenkei, hoba haoenei maialembü hoba maang- pon kaangbü shanga hakkei, aishanga hao langngeian phaia hapbü shuong to haoenei maialem.

¹⁵ Haoei haoen to laukei, “Kaodak pendou to hauashi hoba khunak shousi pendou la Ngühlang Maibü songlenashi.

¹⁶ Aoei maileman baptida hao khümenlabü, lausikei aoei maialemda hao la shedbü kulabü.

¹⁷ Hobaje aoyouei mailemlaje haoen shanga habü amaaphilabü kilabü: kü nyena haoenei shabü sou shian sattilabü, haoenei ngühyem haanbüei laulabü

¹⁸ hoba haoenei ikkei pinyu jungeilabü, hoba haoenei hailabü denche yungasikei, khoei haoen la ai khon akulabü; haoenei shatbü to ikei shanglabü hoba haoen mailabü.”

Jisu Khuthük to Anlangbü

¹⁹ Hibü haoen to lauan phaia Bunyubou Jisu khuthük to anlangkei, hoba Mühghaü maenei setkei;

²⁰ lausikei haoen haukei hoba pendou aenei songlenkei, hoba Jisuei haoen yoa kümsilei kümbei hoba hao ngüh amaaphilabüei aukabü loushadtikei. (9 Yaksa shuongei Peter si hao jambou shuong to heshoubouei lenbü pendou tuibouei ngetikei. 10 Kho phaia Jisuei chaang ka chanep sühko saopobü hoba thon akibü khümenbü aleilubü ngühlang haoen danko hautikei.)