MARK 13 - SAOPOBÜ LAI (BSI)

Jisuei Lembüchem Leilulabü shanga Laubü

¹ Hao lembüchem ka ngaijinei, hao eikshuong yoka cheei laukei, “Lenbou, chühashi, ailaibü laang hoba ailaibü chemyaang!”

² Jisuei hao to laukei, “Habü chemyaang shuong nyi hapdaoba lo? Alusaktiko hanei laang che thüka che jouan akiteilabü.”

Khonku hoba Shieikoe

³ Hao Oliv Shongha Lembüchem tangküngyoko setjinei Peter, Jakob, Johan hoba Andriaei hao to huphangshoua phekei,

⁴ “Khübü kho ladang loushadla? Hobaje khübü pendou loushadlabü jih nyangko lotjinei amaaphilabü ai yingla, kün la lenbüma.”

⁵ Jisuei haoen to laukei, “Kan aoeikei ayinglam to aleilangtila maangsangashi.

⁶ Juongei kü nyena, ‘Ngo hao’ dogo lauko loulabü, hoba haoenei juongnyu ayinglam to senlanglabü.

⁷ Lausikei ladang kanei wapyosuyo hoba wapyolabü langh ditlaje kanei mokde tüpyo. Ho loushadlabü, lausikei thonje molousühkei.

⁸ Aishanga phangshuongei phangshuong khulimbo, hoba sangleei sangle khulimbo loulabü; kaoen kaoena selonyilabü, hoba mühsinou kilabü. Khübü kho khonkula khangbü ki.

⁹ “Lausikei kan lolo maangsangashi. Haoenei kan thangyen la matjemshang to kulabü, kan sinagoga ngümeilabü; hoba governor si choba shuong thedanga kü shanga haoen to aukabü künla shanga kan lolabü.

¹⁰ Phangshuong pendou to Ngühlang Maibü kho shaang phinthonjan.

¹¹ Ladang haoenei kan matjemshang to leilaje, kanei ai laulaje jih mosühko tephenyem, lausikei kho jih kan la ai ong kulaje, kho kanei laushi; aishanga laubou kho kan aying lausikei Soushou Saopobü.

¹² Jaisinaei jaisina, hoba bouei shou haitila shanga khümbo kuan aplabü; hoba shousi shuongei nyusibou khulimbo lolabü hoba haoen haitilabü.

¹³ Kü laüa müt pendouei kan mangsenlabü; lausikei aoei thon sühko natenlaje hao khümenlabü.

Hatla Lühlabü hoba Mangsenlabü Jihsiphai

¹⁴ “Ladang kanei mangsenlabü maubü hao alojana loan haplaje (webouei shuokashi), kheijinei aoyou Judeaa ki haoen shongh to satashi;

¹⁵ hoba aoyou chemdaka ki haoen teyan, ayingsi haoen chemmang to ajanjan sungla tüt;

¹⁶ hoba ao seka ki haoei haoeibü neisimei sungla tengai.

¹⁷ Lausikei kho metena mang akongbü hoba senyopbü shuong shanga ügütü!

¹⁸ Kho khamalüha akühshuokla shanga welauashi,

¹⁹ aishanga khübü jihsiphai khünei khonsak khonku yaang kilabü, Mühghaüei kaodak yaü khangbü ka jaüan tou sühko ho tegü akitei, hoba ladangkei akilabü.

²⁰ Bunyubouei ho chalou ka pakan üpbu habü tegüje aokei telangkhoulabü, lausikei haoeibü pienbü shuong laüa haoei chalou thotikei.

²¹ “Kho jihsiphaia atei kan to, ‘Chühashi, Messia hanei kia; Chühashi, hao thinei kia’, dogo laua longa khüto maitelem.

²² Amlangbü Khrista shuong si amlangbü thuseibü shuong longlabü, hoba thükalongaje saopobü dan ayinglam to leilangla shanga amaaphilabü hoba maangpanglabü sei lenlabü.

²³ Lausikei kan maangsangashi; ngei ajanjan pendou thedangto lenkhüma.

Müteibü Shou Loubü

²⁴ “Lausikei khübü jihsiphaia, ho khonsak khonku danan phaia, chanyu nakthühan aplabü, hoba litnyuei jembü ngesakbü akulabü,

²⁵ Müh ka khanshoulitshou atlabü, hoba müha kibü sei shuong nyaakeilabü.

²⁶ Kheijinei haoenei Müteibü Shou sangmeia sei hoba soneikangbü yaanga louyenko haplabü.

²⁷ Hobaje haoei khuthük hangangbü shuong hautilabü, hoba kaothon ji aeka mühthon ji aenei sühko, kaonyek lei ka jembü pienbü shuong leishailabü.

Bhuklong ka Ditletlabü

²⁸ “Bhuklong ka hao ngühphatbü ditletashi. Ladang nyemshang haanbü sapbo yik longda, kheijinei kanei sulang nepa dogo ngeda.

²⁹ Kho tegü kanei ladang khübü loushadko haplaje, kanei Müteibü Shou kho nyangbüa, khei koukhüma loakei dogo ngeshi.

³⁰ Ngühmaia ngei kan to lenda, khübü pendou aloushad shongko ho meten adanlabü,

³¹ müh si kaodak dankhümlabü, lausikei kü ngüh adanlabü.

Aoeikei Chalou ayingsi Jih Angekei

³² “Lausikei kho chalou ayingsi jih shangabü, Bou to liman, hangangbü shuongeikei ayingsi Shoueikei ayingsi aoeikei angekei.

³³ Maangsangashi, pianleman kishi, aishanga takletbü jihsiphai kho ladangje kanei angekei.

³⁴ Ho müt che usa to wakou haubü phatkei, aoei jembü chem apyoan, sambü shuong la hau kuan, mütpem weko la lulu kümsilei jankukei, chem lombou tokei pianleman kishi dogo laukei.

³⁵ Hibü, pialemashi. Chembubou ladang longeilaje kanei angekei; kho chasem, ayingsi metuphang, ayingsi aukoujinei, ayingsi nge- yang yingla thükkei.

³⁶ Pishilemshi, khei yingsi ong hao mangde loujinei kan yepan ühüplabü.

³⁷ Ngei kan to ai lauda, kho ngei pendou to lenda, pialemashi!”